|
Editoriale
A l’inproviso, l’istà!
Se sa che co i averbi xe mèjo no scherzare, ma co quelo de sto titolo no se ris-cia: a l’inproviso, dopo na penosa primavera piena de piova, senza nessun preaviso… l’istà la xe rivà e la s’à fato subito sentire co i so 27, 28, 31, 34 gradi (almanco qua da noantri) in pochi giorni. Cussì par Lujo e Agosto a semo a posto.
Anca se in tuti i canpi del nostro vìvare de oncò no femo ora bituarse a calcossa de sicuro, parché capita senpre sorprese, l’ arivo, de punto in bianco, de la bela stajon, coalche fastidio el ne lo ga creà. Dal resto ghemo poco da lamentarse: dovemo ciapare quelo che vien, parché xe on tòco che le stajon no xe pi le stesse e quindi la nostra vita no la ga pi i ritmi de na volta.
Gnanca i proverbi no i va pi ben; na volta a se diséa: Quel che giugno t’à negà, lujo e agosto no i te darà, copà la speranza, quindi gnente bone nove! E ’ncora: l’istà xe la mama de i poareti: na volta i poareti i naséa par carità e d’inverno i patìa le pene de l’inferno e no i vedéa l’ora che rivesse l’istà, ma ’desso, i poareti, anca se no i va par carità, d’istà i stà ’ncora pezo; l’omo prudente el cronpa d’istà el paletò par l’inverno: oncò, gnente de pi falso: adesso, né al marcà, né ne le “notti bianche”, d’istà no te cati de sicuro on paletò da poder cronpare par l’inverno.
Come se vede no ne resta che armarse de pazienza, de condizionatore e tanta aqua. Me contava on amico de la Croce Verde che no ’l ga mai laorà cussì tanto come in sti primi giorni che xe scopià l’istà, spece tra noantri veci che semo tra la “popolazione a rischio”. Donca, zerchemo rechie, meténdose in testa l’idea de ciapare quelo che giorno dopo giorno ne vien regalà, anca se gnente ne inpedisse de sognare de catarse in crocera per mari mai visti, e magari inveze a semo t’on lago de sudore, dopo che n’à becà na sginzala maledeta.
In teoria, có riva l’istà xe fadiga laorare, magnare, caminare, respirare, dormire… e ‘lora via, in zerca de fresco, de rilassamento, de riposo… in teoria. Ma ne la pratica le robe le va in modo difarente e ’lora taca el nervoso, i avilimenti, le delusion: ne manca massa pedoine par inbastire la corona de i giorni estivi.
Ghe xe chi pole e chi no pole permétarse de fare progeti de vacanze, de ferie al mare o in montagna co la fameja o senza… I “nuovi poveri”, fati i conti del mese, no ghe resta on sisin par scapare dal caldo. Po’ ghe xe anca chi, ga altri pensieri, catàndose te on leto de ospedale, spetando de guarire opure on trapianto. E ghe xe chi, servi buoni e fedeli, i xe al servizio, in albergo, in spiaja, in cesa o in oficina, in strada o al volante, e i laora e i vìgila su le vacanze de i altri. Se po’ vardemo un fià mèjo, la podarìa èssare anca on’istà poareta: vivemo oncora on tenpo de crisi economica. La notizia de fàbriche che ogni giorno sara e lassa senza laoro zentenari de operai, la te cava el fià da la boca. Altro che vilegiatura!
Alora, visto che “el poco” el cresse dove more “el massa”, armémose de corajo e pazienza: pitosto de sararse in casa, mèjo on capelo in testa e via so na stradela in mezo a i canpi, so l’àrzare vizin de casa, na aqua tònica al bar de l’Auser, na ’marena a l’onbra de on moraro, na feta de anguria e, a la sera, dó costesine al capanon de la Pro Loco o a la sagra de la parochia. In altre parole, bisogna fare de necessità virtù, anca se qualchedun dirà che no xe pi tenpi de anguria e pan biscoto. ’Desso le esigenze de la vita le xe tante. Prova ti a tegnere i fiòi... se no te li porti al mare o a i monti. Giusto, bisognarà che tornemo a canbiare anca ne l’educare i fiòi ch’i ga da savere che ocore èssare preparà al pezo, e non solo al mèjo.
Insoma anca st’ano, la stajon estiva la ne porta calcossa de novo: se xe necessario, inparemo magari a fare on passo indrìo par poder dopo fàrgheme mezo, o quel che se pole, in avanti.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
A l’inproviso, l’istà!
Se sa che co i averbi xe mèjo no scherzare, ma co quelo de sto titolo no se ris-cia: a l’inproviso, dopo na penosa primavera piena de piova, senza nessun preaviso… l’istà la xe rivà e la s’à fato subito sentire co i so 27, 28, 31, 34 gradi (almanco qua da noantri) in pochi giorni. Cussì par Lujo e Agosto a semo a posto.
de Mario Sileno Klein
Padova viva
Aldo Rossi e la Ragione
Architetture 1967-1997
de Lidia Maggiolo
Da Verona
A proposito de neodi
de Giacinta Dall’Ora
|
