Da Arzergrande (PD)

Considerassion

Se vegnesse catarme calchedun…

Savere de podere oncora contare qualcossa, a na serta età, xe inportante, parché se se rende conto che se xe oncora vivi. Èssare considerà, avere el rispeto de ’e persone, soratuto quée pi vissine co ’e quai se vive tuti i dì, porta l’omo e la dona a védare eà vita co ’n’altra visuàe.
Savemo ben quanto che xe inportante avere un posto e un ruòeo so sta socetà, magari anche marginàe ma avere eà convinsion che eà jossa che semo fa parte del mondo.
Ne ’a vita go avùo a che fare co tanti anziani e me so’ fermà a ’scoltarli, tuti senza distinsion, co l’unico obietivo de farli sentire oncora vivi, nonostante i vivesse so de ’e fameje che i faseva sentire manco de gnente. Persone messe in parte come na roba de eà quae vargognarse parché tanto, i xe veci e no i conta pi.
Na dona anziana eà me gaveva cossì tanto a cuore che eà me spetava co candenza setimanàe, parché eà diseva che eà fasevo sentire oncora viva dentro eà casa de riposo ’ndove che eà jera. E me vien spontaneo pensare a quante volte che go incontrà par eà strada persone anziane a fare na passejata, che me ga saeudà pur no conosséndome.
E in efeti no serve èssare anziani, no serve conóssarse o èssare zóvani par saeudarse parché el saeudo el xe un segno de rispeto, de benevoenza; el xe qualcossa de positivo, de beo. Qualcossa che protende a eà vicinanza pitosto che a eà distanza; parché semo tuti uguài so sto mondo de soferenze e se ne incorzemo propio so i casi de malstare, magari dentro un stanzon de ospedàe, quanto che xe inportante avere na persona amica che passa a saeudare, a domandare come che eà va.
Eà considerassion par un anzian, voe dire speranza e se no ghe xe considerassion voe dire che xe finìo tuto, che no scalda pi gnanca el soe de agosto, che tuto ga na patina de coeori che tende a eà sfumatura.
Eco parché no ghe moeo de scrìvare de sto argomento; parché se sente poco parlare de questo e parché me piasarìa tanto che tute ’e persone che no xe vece ’e provasse a pensarse tai par qualche minuto al dì.
’E gavarìa modo de rèndarse conto che eà vita xe vita fin l’ultimo istante, fin l’ultimo soriso ricevùo.

[torna sopra]