Da Verona

A proposito de neodi

Sicome l’è prestin vao fin zo al Ponte e fao un giretin par lustrarme i oci co ’l slusor de l’erba de i prè.

Al centro del piassal ghè par monumento un caro armato, par onorar i caristi.

Cato la me amiga al bancheto del frutarol al mercatin de l’Arsenal. “Ciao, bela!” La me saluda con i sòliti tri basi con s-cioco e stanpo e la me dise:
“Te speto al bar de i giardineti. Móete che femo dó ciàcole.”
Me destrigo inte na pressia e me ghe sento denansi al taolin del bar.
“Son straca copà” la taca ela “con i pié che sfoga, la carnegréa a le pùpole e un pié stralossà par via de la pertegada che ò fato ieri in mezo a i boschi da le parte del Ponte de Véja.”
“Sito stà a la Basasenoci?*” ghe domando.
“Sì, propiamente. A propòsito de la Basasenoci, ghe n’ò una de bele da contarte…” e la taca con n’altra de le so storie.
“Donca, mi e el me omo partemo a le 7 da Verona che pióe che dio le manda, rivemo a Negrar che spuacia, desmontemo da la màchina nel parchegio del ponte con un soleto timido, che nel giro che n’oreta el se mostra in tuto el so splendor. La corsa la scominsia a le 9.30 ma me marì, che l’è l’organisator, quel che à studià e segnà el percorso, che l’à deliberà i sentieri da le ramaje, che el ga regolà la sfransa a le sese ingatejé, che l’à spanpanà frece e segnài, el ga da controlar che ghe sia tuto a posto prima che riva la gente. Mi ghe vao drio e me ciucio 7 km. Sicome l’è prestin vao fin zo al ponte e fao un giretin par lustrarme i oci co ’l slusor de l’erba de i prè, a gustarme el profumo de le ginestre, a spassesar tra i castagnari, a sossolarme inte sto silensio grando: altri 3 km. Taca a rivar gente; ne conossemo tuti. Inte un fià el piassal el se inpienisse de màchine, de fameje, de ciasso, de alegrìa… Finalmente se parte, ghe n’è pochi che core. I òmeni i camina discorendo de sport e i ghe dise sù a le mojer; le done le se lamenta de i marì. Che comarego! Pian pianelo la procission la se desròdola inte ’l parco naturale de la Lessinia. Al traguardo ghè tè, aranciata, biscotini, pontine de formajo, quadratini de bóndola, patatine, giardiniera e… el me omo con i nostri du neodeti: Givani e Facheco (i se ciama cosita tra de lori). Basi, struconi, caresse a i picenini che no i ga tenpo de ricanbiarme parché so nono, che l’è piassè butin de lori, l’è invià a conpagnarli al centro del piassal ’ndo’ ghè par monumento un caro armato, par onorar i caristi, con tanto de canon spianà in diression de la val. I me du principini i par mati. I ghe gira ’torno, i ghe toca i cìngoli, i séita farghe domande a so nono. Intanto l’è ora de premiassioni, tuti i serca e i ciama me marì e lu –piro ma cogno– ghe toca lassarme a mi i buteleti anca se lori i le reclama lu e no i lassa de pesta el caro armato. Vien ora de sentarse a tola ma no ghè verso che i se slontana da la zona de guera. Par fortuna riva so mama e so papà che i serca con le bone de far convinti i fioleti a nar a magnar… Maché! I resta inpilonè in adorassion del cingolato. Alora i so genitori i passa “all’azione” (par restar in tema) strapegando i du aspiranti cadeti disperè in tratorìa. Quel che no i à pianto, pore creature! E… tuto par colpa de so nono.”
“Parché?” salto fora mi.
“Parché, bela, el gavéa dito a i du picenini che el canon del caro armato ogni tanto el sbara caramele e ciocolatini e de istà anca gelati!”

* La Basasenoci è una marcia competitiva organizzata dal Circolo Dipendenti Unicredit di Verona la cui partecipazione è riservata ai dipendenti della banca e alle loro famiglie. Si tiene annualmente e questa, tenutasi il 26 maggio 2019, è stata la 47ª edizione. Il percorso di circa 7 km. si snoda tra i boschi ed i castagnari che fanno da cornice al Ponte di Véja nel cuore del Parco naturale della Lessinia. A conclusione della camminata seguono le premiazioni dei vincitori delle varie categorie e il tradizionale pranzo presso la locale trattoria.

[torna sopra]