|
El filò de i Wigwam
Bimbi Botanici
Putèi amissi de i àlbari
Sta volta, ve conto de i putèi de la nostra comunità che in tuti i fine istà i vien al centro estivo del Circolo Wigwam de Arzarèo. I xe putèi da i 5 a i 13 ani che grassie al laoro de l’associassion “Si Può Fare” e de Wigwam i ga la oportunità de vìvare na esprienza de diese giorni in canpagna, in te na casa vecia da contadini co ’l pòrtego e el sélese de piere par conóssare la natura. Xe stà difati, costruìo aposta par lori “El troso de i Bimbi Botanici” un percoso che el parte da un piagno de legno che ’l traversa un pìcolo stagno e po’ el continua drio i fossi. Ogni pianta del troso ga la so tabela co el nome in talian, el nome sientìfico in latin e el nome in veneto-padovan. I putèi rancura le foje de i diversi àlbari, che rapresenta el canpionario squasi conpleto de quei de canpagna e po’ li mete a secare soto pression dentro a giornài veci. In fine i taca le foje su de i foli de carta spessa, i scrive par ognuno la so eticheta tanto da fàrghene un vero e propio erbario. I putèi i xe organizài da tosi, zóvani e apassionài: da Luca Giuseppe Bianchi che el xe el coordinatore; da Irene Xodo e Stefano Massari, che ghe dà na man, tuti de la zona de Piove e, in fine, da Valerio Snichelotto de Rovigo che ghe insegna la difarensa tra un àlbaro e nantro, ne la so veste de esperto, studente laureando in siense forestài e sacratario de l’Associassion Universitaria de i Studenti de Siense Forestài de Padova.
La formula ga avudo cussì tanto sucesso che senpre de più vien zente da fora a védare sta atività, sènplice ma tanto educativa par salvare sto mondo poco tegnùo da conto e desfà da la avidità de pochi e la ignoransa de i tanti. L’erbario, el rapresenta la metafora del valore de la diversità che la xe un gran capitale sia che la sia biologica che culturale. Come un porta carte da visita de persone che le se conosse una par una e par questo se ghe porta rispeto. Piove di Sacco (PD) +39 049 9704413 bimbibotanici@wigwam.it
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Inventarse “la peza del nò”
Co sto anbaradan de verde, de zalo e de rosso, de giazo che piove dal celo, de navi che salva migranti, de pìcoli delinquenti che brusa barboni o che còpa carabinieri, de giustizia e finanza che ga mal de panza… xe fadiga far finta de gnente. Bisogna inventarse calcossa…
de Mario Sileno Klein
|
