|
Da “Il bambino invisibile”
Le paure de i putèi
 | | El jera uno de chei rospi grossi, maron e co dó oci rossi in te ’l muso. |
Purtropo savemo, anca se femo finta che no capita, che in tanti Paesi de l’America Latina e de l’Africa, in India e anca in serti Paesi civili de l’Europa, i putèi, có i nasse, no i xe considerà come persone normài.
Quelo che scrivo, el xe el riassunto del primo capitolo de un libro: Il bambino invisibile, scrito da Marcello Foa e Manuel Antonio Bragozzi. Manuel el xe el nome de sto putèo, nato in Cile, e questa la xe la so storia: un putèo abandonà al so destin che el ga ’vudo el bon senso de voler vìvare nonostante tuto. El xe rivà a 5-6 ani co un vecio, che ’l ciamava nono, ma che del nono no ’l gheva proprio gnente, fin che a ’na serta età el vien adotà da ’na fameja italiana par vìvare come na persona civile.
Xe da dire che sto poro putèo, no vedéndose considerà da nissuno, senpre solo come un can randagio, el gheva deciso de vìvare nel bosco in mezo a la natura dove i àlbari ghe dava riparo e rose (rogge) ghe cavava la sen, i giavaschi de i rovi ghe dava fruti da magnare e i gati ghe gheva insegnà a ciapare i pessi co le man. La sera el tornava a casa da so nono a dormire e là, le jera solo parolasse e inquadramenti, robe da fare e da no fare.
Me xe piasso sto primo capitolo parché me so’ riconossùo in serti so modi de fare e de créssare…
Jera el 1981 e Manuel descrive come che ’l ga passà la giornada nel bosco: el conta de èssare stà a cacia de lusèrtole, no par farghe del male, ma par védare chi jera pi scaltro e furbo: lu o la lusèrtola. El se armava de ’na stropa, bela scatante, el ghe faseva nel fondo ’na àsola (strossa-gola) e el se postava tacà ’na piera dove le lusèrtole le ’ndava a ciapare el sole. L’àsola de la stropa la jera armà par ciapare la lusèrtola che l’ociava: el jera un lavoro longo e atento, de passiensa e de fermessa, e lu passava le ore a farghe la corte a la so preda par spetare el momento giusto par molare l’argagno micidiale che ’l gheva parecià.
El jera un tosatèo pìcolo e nero come Calimero, magrissimo par el poco magnare, onto e infangà, pien de sgrafade, le man picenine ma forte da no farse scanpare gnente. Nel pi belo de sta so cacia, quando la lusèrtola jera oramai sua, eco ’na mosca che vien a rónpare l’incanto: prima la se posa sul naso e dopo la taca a passegiare par el viso e sul colo; no ’l podeva ciaparla al volo, movéndose, la lusèrtola la sarìa scanpà e tuto sarìa dovùo scominsiare de novo. Finalmente, supiando, fasendo smorfie co ’l naso e la boca, la mosca ga ciapà n’altra destinassion, lassando libero Manuel a la so lusèrtola. La preda la jera senpre ferma là co le so quatro satine posade su l’erba, el so corpo verde e scuamoso e la so coa ferma al sole. Manuel la gheva abituà al lazo fermo davanti al muso, senpre pronto par sararla ne la so àsola; in chel momento ghe vien da pensare cosa che la podeva pensare de lu la lusèrtola, magari la lo credeva un sasso grosso o ’na bestia granda e sti pensieri a i lo gheva portà a farse mile dimande:
“Ma le lusèrtole pènsele? E le vache? E i cani feroci che ’l trova passando davanti a i palassi de i sioroti? Ma parcossa le bestie no le parla e nialtri òmeni sì? E i pessi? Puareti, senpre siti e senpre bagnài!”
Tute ste robe ghe passava par la testa e lu, senpre co’ i oci fissi su la so lusèrtola: quelo jera el so inpegno pi grando. I déi i jera fermi sul lazo e, pian pianin el ga tacà l’ataco finale: el ga tacà avissinare senpre de pi l’àsola verta a la testa de la bestiolina, el tenpo strenzeva e “zàchete…” el ga fato scatare la tràpola micidiale, ciapàndola dentro al strossa-colo.
Anca sta volta Manuel gheva fato centro e la lusèrtola, picà via a la stropa, la se stironava sercando de scanpare. La sodisfassion de ’verla ciapà jera granda, ma subito, Manuel, par no farla patire massa, la ga liberà.
El sole jera oramai drio a la montagna e solo adesso ghe jera vignesto in mente che ’l jera in volta da la matina: squasi diese ore fora de casa, el gheva fame e el jera stufo orbo. Dentro de lu el se sentiva perso e el gheva perso anca l’orientamento: el se xe ranpegà sù su un àlbaro, ma co ’l scuro no ’l se catava pi, el se ga inpaurìo co ’l core che ghe saltava fora dal pèto. El rimorso de avere disobedìo el jera forte, e ghe xe vignesto in mente quelo che so nono ghe diseva ogni matina:
“Pena spunta na stela in celo, torna casa parché xe l’ora de ’ndare in leto! La note la porta el diavolo che ’l se sconde drio a i giavaschi de rovi e el ciapa i putèi disobedienti.”
Pensando a quelo che ghe diseva so nono co fare cativo, Manuel se sentiva perso e pien de paura. Un rumore strano drio a i “cespugli” lo ga blocà, “Maria!” el ga pensà “eco el diavolo che ’l me ciapa!” La paura faséa novanta e no ’l jera pi in grado de mòvarse; el core ghe saltava fora dal sen e gnanca el riessìa a sigare. Bisognava tornare casa, el vardava el punto da dove el gheva sentìo el rumore e el gheva deciso de bàtare de asso. In chel momento a salta fora na bestiassa: “Crahh-crahh!”, el jera uno de chei rospi grossi, maron e co dó oci rossi in te ’l muso. Spaventà, Manuel, visto che no ’l jera el diavolo, el xe partìo de corsa verso el prà che lo portava a casa; in cor suo no ’l gavarìa pi fato tardi e sarìa tornà casa ’pena che sarìa spuntà la prima stela in celo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Inventarse “la peza del nò”
Co sto anbaradan de verde, de zalo e de rosso, de giazo che piove dal celo, de navi che salva migranti, de pìcoli delinquenti che brusa barboni o che còpa carabinieri, de giustizia e finanza che ga mal de panza… xe fadiga far finta de gnente. Bisogna inventarse calcossa…
de Mario Sileno Klein
|
