Da San Stèfano de Zimela (VR)

La rua la gira e el tenpo canbia le robe

Sgàlmara.

Bala da brustolare l’orzo sul fogo del camin.

Antico stema de Volpin.

La lapide romana.

Anca ’sto ano le maestre de le scole elementari le me ga ingagià a fare dó giornate co’ i so tosi de scola. ’Na matina a go fato quatro ore de lezion a le terze e a le quarte. Co’ l’aiuto de un proietore e co’ le dó sportà de robe vece che me gavéa portà da casa a ghe go contà tante robe de come la jera la vita de quando che mi jera toseto e frequentava le so stesse classi. I me ga dà sodisfazion parché i jera ’tenti e i seitava a fare domande e me godéa quando che calchedun el me diséa che anca so nono el ghe contava ’ste robe chì.
A calchedun ghe xe restà inpresso l’esenpio de l’àlbaro che ghe fo senpre quando che scominzio la me lezion. A ghe digo che l’àlbaro el ga de le bele raise fonde, che le lo sostien e le pesca le sostanze nutritive; el ga un bel tronco forte par stare belo drito e el ga tante rame che de istà le se cuerze de foje, fiori e fruti. E dopo ghe digo che le raise semo noantri noni, el tronco i xe i genitori e le rame i fiòi; e se no ghe xe le raise che ciucia da la tera i elementi vitali e el tronco che el li porta a i rami, questi no i farìa mia foje, fiori e fruti. E da questo l’inportanza de volerse ben, de jutarse e rispetarse parché semo anèi de ’na stessa cadena.
I vardava co’ i oci spalancà l’astucio de legno, la pena co’ el penin, la carta calcante, el silabario e el libro de letura picinini, picinini e i quaderneti co’ la copertina mora, la ponpeta par dare el DDT, i graneti de polenta che i maestri i ne metéa soto i zenoci quando che i ne metéa in castigo de drio a la lavagna, la figarola per nare a tore i fighi o i peri e i pomi quando che i jera bei alti, la bala par brustolare l’orzo, parché de café no gh’in jera mai. Ma el sucesso pi grando lo ga ’vù le sgalmare: ghe le go fate passare uno par uno e i tastava el corame grosso, la sòla de legno e le broche piantà soto par no consumarla.
El giorno dopo a so’ andà par i canpi de Volpino di Zimella co’ le maestre e i tosi de la quinta. El percorso l’è senpre quelo, ma el me fornisse motivo par tanti argomenti da presentare a i scolari. Ghe go parlà de i fati de guera che xe capità proprio in te chei posti lì, de la centuriazion romana del primo secolo dopo Cristo, ghe go fato notare che le stradele che faséino le jera ancora tute che le se incrociava a angolo reto. Ghe go spiegà l’origine d’i nomi de le vie che le ricordava i vari dominatori e ghemo finìo el giro a la cesa, dove che ghe xe tacà ’na preziosa lapide romana che certifica la presenza de ’na inportante vila, senpre del primo secolo d.C. Ma co’ tanta tristezza ghe go spiegà anca che in tanti ani a xe canbià tuto el paesagio. Xe sparìi i fossi, i àlbari, le saraje e cussita xe spario tuta la flora e la fauna che a go ’vù la fortuna de vèdare quando che se vivéa in te la civiltà contadina. In te ’l celo no ghe jera gnanca un oseleto che volava e partera gnanca ’na bissòrdola o un ligaore. Par un momento a me ga parso de rivèdare in te ’l celo lìnpido ’na lòdola. Me ricordo che la sbatéa le ale in modo da restare ferma in alto e la cantava senza mai fermarse che paréa che no la tirasse mai el fià e che dopo, de colpo, la se lassava cascare zo drita par finire tra le strèpole del fromento, indóe che ghe jera el so gnaro. Me gavéa ciapà un poco de magon, ma dopo a go vardà i tosi e le tose che gavéa ’torno de mi, che i me scoltava curiosi e pieni de voja de sentire ’ste storie de robe vece, che i ridéa e i scherzava in te ’na giornata piena de sole e ’lora a go pensà che la rua la gira e el tenpo canbia le robe.

[torna sopra]