|
Editoriale
Inventarse “la peza del nò”
Co sto anbaradan de verde, de zalo e de rosso, de giazo che piove dal celo, de navi che salva migranti, de pìcoli delinquenti che brusa barboni o che còpa carabinieri, de giustizia e finanza che ga mal de panza… xe fadiga far finta de gnente. Bisogna inventarse calcossa…
 | | “Vien qua che te dago on baso, valà!” |
Ormai no ghe xe dubi: l’anbiente de l’omo, prima ’ncora de quelo de la natura, el xe inquinà, malà, incatejà, intorcolà, intronà ca vien da domandarse cossa che càpita te la testa de i mati quando se frantuma el zarvelo.
Xe lanpante che la storia se ripete senpre: a longhi periodi de pace e benèssare segue senpre ani de guere, carestìe e miseria; a tenpi de vero “umanesimo” se alterna quei de l’homo homini lupus. Insoma no sarìa da maravejarse: gnente de novo soto ’l sole, questi xe i tenpi ca se catemo da dover vìvare.
Ma vìvare vol dire partecipare, fare la nostra parte, métarghe el nostro pìcolo o grande contributo, senza creare tragedie e senza eroismi. Come consilia el “saggio”, metémose tranquili e tachemo a pensare, a riflètare su cossa podemo inventarse, in piena libertà e senza scontrarse con nissun, par métarghe na peza al sbrego de sta “normalità”.
Intanto tachemo co ’l dire che “dire senpre de sì” no va ben, come xe sbalià “dire senpre de nò”.
Se ga da poder “dire de nò” qualche volta, ma con bela maniera, parché convinze de pi on soriso che non na parola storta. Anca el nò bisogna che ’l sia on fià inzucarà, che ’l vaga verso l’incontro, verso el zercare l’acordo, el saver molarghe on ponto da na parte e da st’altra. Rivare a questo no xe come dirlo, ma se pole senpre provare.
Ma… volendo “dire de nò”: a chi? e de cossa?
Tachemo da noantri genitori che semo i primi a ’ver perso le bone abitudini e l’autorità de “dire de nò” a on fiolo có xe el caso de dirghe che chela roba lì no se fa, che chela parola no se ga da dirla, che chela conpagnìa no ’l ga da frequentarla, che chel modo de fare da strafotente no ’l fa sinpatìa… “Vien qua che te dago on baso! Dài, nissun xe parfeto, caro el me tesoro…” On baso, on strucon e… la xe na peza! Na pìcola “peza del nò”.
Nemo a védare na partìa de balon: dó squadre che se afronta, dó eserciti de tifosi che se scontra. Tacà de ti a ghè proprio on “nemico”, uno de la squadra aversaria. E dài, e dài… a on zerto punto te scapa da dirghe:
“Ciò, gheto visto che lazaron de terzin che ghe xe te la me squadra? A me vergogno, varda, ch’i lo faza ’ncora zugare… Me maravejo che l’arbitro no ’l lo gabia gnancora sbatù fora… Ti, cossa te pare?”
“A so’ d’acordo co ti!... L’è on zaltron, l’è on gladiatore no’ on zugadore!...”
A sto punto calcossa canbia. No si pi “nemici”, a si sportivi! Calcossa del to “nò” ga funzionà, xe canbià el raporto de vicinanza. Ga vinto na spece de la to “peza del nò”!
Dire la to rason el xe on dirito, ma quando te la disi no la ga da deventare na provocazion, no te ghè da métarte in trincea contro qualchedun. Tuto dipende da come te te esprimi. Inveze de dire subito che no la xe mia cussì, prova a ciaparla a la larga, disendo:
“Mah! Lo salo che xe proprio el caso de rajonàrgane, parché de le volte na roba la te pare drita e inveze la xe storta… Tuto xe possìbile! La podarìa èssare proprio come che ’l dise lu! Va’ a capire ti, indove che l’aqua ronpe!”
Co ’l to modo de fare, probabilmente te ghè propio fato na pìcola róta so l’argine de l’idea contraria a la toa e con bela maniera te ghè fato trionfare on poco del to nò. Insoma te ghè doparà na pìcola “peza del nò”.
Qualchedun dirà che questo vol dire barcamenarse, rinunciare a on to sacrosanto dirito de sostegnere le to idee, i to princìpi de vita, ma me nono me ga insegnà che con i soli “sacri princìpi” no se sta mia a tola e che xe senpre mèjo vegnerse incontro. Eco, de sicuro gavéa rason me nono: l’incontro par corègiare i difeti del fiolo, par frenare la furia del tifoso aversario, par no provocare le “ire funeste del pelide Achille”, questo el xe propio el mèjo modo de civile convivenza, parché come ga dito Dante: “fatti non foste a viver come bruti, ma per seguir virtute e conoscenza.”
Eco, co l’aiuto del ragionamento, del saere de me nono e de Dante, podemo rivare a inventarse na pìcola “peza del nò”. E nare d’acordo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Inventarse “la peza del nò”
Co sto anbaradan de verde, de zalo e de rosso, de giazo che piove dal celo, de navi che salva migranti, de pìcoli delinquenti che brusa barboni o che còpa carabinieri, de giustizia e finanza che ga mal de panza… xe fadiga far finta de gnente. Bisogna inventarse calcossa…
de Mario Sileno Klein
|
