|
Editoriale
Riva Nadale, ma no par tuti
Sarìa belo che sta Festa la rivesse par tuti, come na volta, quando grandi e putini, siori (on fià manco!) e poareti, basabanchi e magnapreti, in qualche maniera i sentìa che Nadale el portava na ventà de umanità e i faséa festa pa ’l conpleano del Banbin Santo. Oncò no la xe pi cussì!
 | | Finché vedaremo ste tragedie… sarà fadiga dirse: “Bon Nadale!” |
Co ’l passare de i ani, xe canbià tante robe: nel caso del Nadale le xe canbià in pezo.
No pol rivare Nadale par i 1.041 morti (ne i soli diese mesi del 2019) ne le aque del Mediteraneo.
No ’l riva par i pi de 4.000 cristiani, vìtime de i massacri durante le Messe e ne i giorni che i se catava par pregare.
No riva Nadale par tute chele done, copà – propio parché le xe done – da uno de fameja: marìo, moroso, conpagno o parente.
E gnanca par i zentenari de morti par droga, che i continua a créssare anca qua te ’l nostro Veneto.
La lista de i “assenti” inte ’l Nadale de st’ano la fermemo qua, parché, con dolore, la narìa ’vanti oncora tanto.
Ghemo dito che ’desso no la xe pi come na volta: xe canbià sul serio tante robe. A partire da i cristiani che no i xe pi come quei de na volta: generosi, altruisti, canpioni de na fede ben inraisà che rispeta le regole che na volta la Cesa faséa inparare a memoria. E guài a chi sgarava!
Al dì de oncò – salvemo pure la Messa de mezanote – l’inpegno de Nadale xe quelo de sicurarse che no manca gnente in tola e che ghe sia regài par tuti. No semo pi el Paese de la religiosità popolare, del presepio e de la Ciarastela, de quando la tradizion la ne faséa imaginare le parole e i pensieri de chi, in chela Note Santa, jera a Betleme, tuti insieme, òmani e bestie, incantà davanti al sòno del Banbin Gesù che rapresentava tute le speranze, tuti i sogni, le profezie.
Oncò la zente la va de corsa, la va in zerca de on laoro che xe senpre pi fadiga catare; la fameja xe raro che la riva a le noze d’argento, viste le barufe e i omicidi che inpina i telegiornài e no ne mostra on celo seren.
Se ga perso el vero senso del Nadale: el stare insieme, el volerse ben, el perdonarse. E par riavere questo, no serve strade piene de luminarie, vetrine colme de lustrini che te fa sbarlucare i oci, magari co lì vizin el barbon che no se sa come che ’l passarà Nadale.
La stìrola de brute notizie, de maleducazion, volgarità e violenza, anca su i putèi, el vento de guera che supia parfin su quelo che dovarìa èssare on momento de serenità... fa el resto. Sentimo el bisogno mentale e fìsico de calcossa de manco tormentoso, calcossa che ne faga caricare le baterìe de l’anima che xe drio scaricarse e la ris-cia de no nare pi in moto.
Solo el soriso de chel Banbin pole convìnzarne a nare incontro a chel straronpi del vizin de casa, al colega che tenta de farne le scarpe, al vigile che ne ga messo la multa, al toso che no ne ga cedù el posto so ’l tran…
La sera del 24 dissenbre, la pi parte de le persone le se incontra, la se senta co i piè soto la tola, dove xe stà preparà magnari gustosi in linea co la tradizion. Se ciàciara, se magna e se beve, magari on fiatin massa, e no se se domanda cossa de inportante se xe drio festejare.
Insoma, come diséa i antichi, bisogna avere “oci de lucerna”, cioè oci pieni de luce par védare tuto quelo che ne circonda e soratuto riscoprire che el Nadale xe la tenereza del passato, el valore del presente e la speranza del futuro.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Riva Nadale, ma no par tuti
Sarìa belo che sta Festa la rivesse par tuti, come na volta, quando grandi e putini, siori (on fià manco!) e poareti, basabanchi e magnapreti, in qualche maniera i sentìa che Nadale el portava na ventà de umanità e i faséa festa pa ’l conpleano del Banbin Santo. Oncò no la xe pi cussì!
de Mario Sileno Klein
Da la Marca
Un trevisan a la corte de i Tartari
de Emanuele Bellò
|
