Da Brugine (PD)

Padova lirica

Orfeo ed Euridice de Gluck.

L’elisir d’amore de Donizetti.

Turandot de Puccini.

L’opera lirica xe na forma musicàe e teatràe che par farla bisogna métare insieme i solisti de canto, on coro misto, na orchestra co’ almanco na quarantina de sonadori, senografìe, costumi, balarini e on regista che move tuti sti artisti, pretendendo anca de farli recitare. Insoma podemo ben dire che l’opera xe el spetàcolo pi conpleto che ghe sìa e anca on vanto tuto italian, parché la xe stà eà nassiòn che la ga inventà fin dal Sinquesento. Cussì penso che semo tuti d’acordo cha anca Padova la se possa permétare na so stajon lirica che d’ altronde la conta na tradission storica ancora prima che la deventasse popolare.
El teatro Verdi de Padova jera nato proprio come teatro lirico che alora el se ciamava Teatro Nuovo, inaugurà l’11 giugno 1751 co’ la opera “Astaserse” de Baldassare Galuppi su libreto del Metastasio, e dal 1773 el ga scominsià a fare anca el teatro de prosa. L’8 giugno del 1884 el vegniva intitolà al nostro pi grande operista, Giuseppe Verdi, co’ l’opera “Aida”. Ma el gran maestro purtropo no ’l ga vossùo vegnire. So la létara che Verdi ghe ga mandà al diretore de sto teatro, se lese: “… cosa verrei a fare lì? Per farmi vedere? Applaudire? Ciò non può essere…” E come savemo tuti, Verdi el jera on omo schivo e riservato e no se podéa meravejarse de sta risposta, in coanto no ’l jera ’ndà gnanca nel so paese, Bussetto, coando i gavéa intitolà el teatro co ’l so nome. Comunque ne ’a létara no ’l se ga desmentegà però de ringrassiare eà sità de Padova par el pensiero.
Dal dopoguera el nostro teatro Verdi xe deventà comunale, organizando senpre stajon liriche e metendo senpre diretori artistici conpetenti. Difati par merito de coesti ’e stajon liriche padovane le xe senpre stà pi che dignitose e le se ga senpre distinte parché se ga visto passare artisti inportanti e anca fasendo debutare cantanti che subito dopo i xe deventài famosi; ricordo fra i tanti Marcello Alvares, Leo Nucci, Luciana Serra, Ferruccio Furlanetto, Katia Ricciarelli, ecètera.
I melomani i ricordarà sicuramente i ani Setanta, coando ghe jera organizatrice l’ex soprano Iris Adami Corradetti, portando in sto teatro i pi grandi artisti de coel tenpo; tanto par fare on esenpio, ne l’opera “I due Foscari” de Verdi, cantava Piero Cappuccilli e Katia Ricciarelli e ne “Il Piccolo Marat“ de Mascagni, Nicola Rossi Lemeni, Virginia Zeani e Nicola Martinucci, ne la “Boheme e Buterflay” de Puccini, Raina Kabaiwanska e po’ Aldo Protti, Giorgio Zancanaro, le padovane Mara Zampieri, Luisa Nave, Lucia Valentini Terrani ne ’a Cenerentola de Rossini, i grandi cantanti veneti Gianfranco Cecchele, Giuseppe Giacomini, Renato Bruson, Agostino Ferrin, ecètera.
Ne i ultimi ani xe diretore artistico Federico Faggion, del coale podemo dire solo on gran ben, parché gavemo visto spetàcoi che secondo mi, no’ i xe stà par gnente de manco de le fondassion liriche pi inportanti, fasendo laorare squasi tute forze padovane come tecnici, coro e l’Orchestra de Padova e del Veneto.
Fra i tanti spetàcoli visti, bastarìa ricordare “La vedova allegra” de Lehar co’ la regia de Hugo De Hana che co’ na brancà de artisti famosi el ga fato vegnire fora on spetàcolo longo pi de tre ore e tanto xe stà el sucesso che el xe stà ripetùo par tre ani. Faggion no’ solo xe riussìo a far vegnire in sto teatro i cantanti pi famosi, ma gavemo visto ciapare el volo zóvani cantanti che subito dopo i xe deventài famosi. Eco, par esenpio, el fenomeno del momento, el baritono Enkhbat Amartuvshin che el vien da la Mongolia e che ’desso tuti i teatri lo vòe, ma che noialtri invesse gavemo sentìo par primi l’ano passà, inpapinài a sentirlo cantare il “Trovatore” e “Nabucco” de Verdi.
Sto ano ’e xe stà coatro ’e opere programàe: dó ’e xe stà fate l’istà passà so ’l cortìe del Castelo Cararese: “Orfeo ed Euridice” de Gluck e “L’elisir d’amore” de Donizzetti, e a fine otobre in teatro gavemo visto na bea e coloratissima “Turandot” de Puccini. Ghe resta ’ncora da védare el “Don Giovanni” de Mozart, che el xe in programa el 29 e 31 dissenbre e, par finire, el primo de l’ano ghe sarà el concerto de Capodano.
A sto punto no’ me resta che fare i auguri par la stajon del 2020, permeténdome on consilio: coéo de ricordare el concitadin Arrigo Boito, co’ la so opera “Mefistofele” e magari, chissà, par fine ano el “Pipistrello” de Strauss.

[torna sopra]