Da la Marca

Un trevisan a la corte de i Tartari

Ritratto di Ezzelino, opera de Cristofano dell’Altissimo.

Papa Innocenzo IV, a partire dal 1245, el manda Ezelino co i frati francescani e domenicani da i Tartari.

Ezelino da Romano el xe passà a la storia come un tiran sanguinario, un anticristo fiol de diavolo e de ’na striga toscana, ma in realtà, almanco a l'inissio de la so cariera, el jera un personagio inportantissimo, benefator de monasteri, protetor de poeti e artisti. Inparentà co l'inperator Federico II che ghe gavéa dà in sposa so fia Selvaggia, el xe stà sielto dal Papa Innocenzo IV par ’na mission diplomatica a la corte de i Tartari che gavéa za conquistà meza Asia e l'Europa oriental fin a la Bosnia, minaciando da viçin la Cristianità. Ezelino insieme a un grupo de frati domenicani el xe partìo da Venessia par l'Asia Minor co ’na létara del Papa che prospetava al Gran Khan la conversion de i Mongoli al Cristianesimo e l'aleansa contro i nemici comuni, Arabi e Turchi, de fede musulmana.
Inperator de i Mongoli jera Kujuk de la stirpe de Gengis Khan e governator del cosideto "uluss" o distreto feudal de la Siria, el jera Baitsciù, un condotiero famoso, anca lu dissendente de Gengis Khan, che ga acolto la delegassion co favor, ma subito el se ga ofeso par el rifiuto de Ezelino de inzenociarse davanti al funsionario e soratuto par la mancansa de regali par i cortigiani.
Vista la missiva, el governator ghe ga ordinà a Ezelino de andar a Karakorum e dàrghela personalmente al sovrano, al che el trevisan se ga rifiutà, disendo che i so ordini jera de consegnar el messagio al primo uficial mongolo incontrà; alora el governator senpre pi inbestià el ga deciso de mandar la létara co un so inviato, obligando Ezelino a restar là finché no rivasse la risposta e lassàndolo squasi sensa magnar e bévar soto el sol par punission.
I cortigiani i se ga riunìo e ’na gran parte i voléa massacrar subito tuti come spie, altri inveçe i voléa copar solo el capo de la delegassion, rimandàndoghe al Papa la so carcassa inpajada come risposta a la so oferta, altri ancora i voléa métar tuti in preson par provocar l'intervento de i Franchi che jera a i confini de la Siria, in modo da saldar i conti co lori.
Par fortuna la prima mojer de Baitsciù la ga convinto el marìo a no far gnente parché ìna solussion cruenta la gavarìa dissuaso altre delegassion da rivar co i regali che par tradission i ghe spetava a la mojer del governator. Cussì, al ritorno de l'inviato, Ezelino ga podùo tornar in Italia insieme a ’na delegassion de notàbili mongoli che ga portà al papa la risposta amichevole de l'inperator insieme co regali pressiosi che el pontefice ga gradìo: la prima anbassiata mongola al papato no la ga avùo seguito, parché xe morto el Gran Khan e po’ Innocenzo IV el ga scomunicà Ezelino, fasendo sterminar la so fameja.

[torna sopra]