Da Venezia

L’Arsenal

Eà porta de tera de l’Arsenal.

Eà porta de aqua co ’e dó alte tori.

I dó leoni a l’entrata de tera, portà dal Pireo da Francesco Morosini.

Spetacoeare creassion fata da i venessiani a cominciar dal XII sècoeo par costruir navi e armamenti par ’a Marina de ’a Serenissima: a ze estesa su 48 ètari, el 15% del totàe de ’a cità. Un miràcoeo de l’industria de chei tenpi mai ripetùo fin ’desso. Quando gera necessario, se costruiva na nave da guera conpleta de armamenti in un soeo giorno.
Ricordà da Dante Alighieri ne ’a Divina Comedia (Inferno, XXI, vv 7-18), conossùo in tuto el mondo antico come el più potente cantiere navàe mai costruìo. El nome Arsenal el vien da l’arabo “daras-sina ’a”, che significa “casa del mestier”: quindi in venessian darzanà o arsenal, fin a litalianizà dàrsena.
Ne i sècoi el ze stà ingrandìo continuamente fin a portarlo par senpre ne ’a storia par come se costruiva, se armava, se faseva ’e vée, el cordame, ’a pece per calafatar i legni. Apressà in particoeare par ’a altissima bravura de i marangoni de nave che i gera faegnami che tajava e meteva insieme i tòchi de legno più inportanti de ’e galèe, galeasse o altre navi, rispetài dal potere poìtico tanto da ’ver de i priviegi come queo de èssar l’equipagio del Bucintoro, e de montar ’a guardia de onor al Doge.
Ghe vorìa senteneri de pagine par contar par intiero ’a storia de sto posto incredìbie e qua no ze possìbie ma, zontando ancora qualche informassion, son sicuro che ’a curiosità de i letori li podarà portar a conóssar segreti e misteri che ancora i ze sconti tra ’e pagine de ’a storia e dentro queo che ze stà el cuor de ’a potensa navàe de ’a cità de San Marco.
In particoear me piase ricordar che ’a Repùblica ’a ga fato costruir ’e prime case popoeari al mondo, che ga consegnà a i arsenaeoti, e ste case ’e ghe ze ancora ancùo in Riva de i S-ciavoni, bèe e abitàe.
El lavoro de i arsenaeoti e el potere poìtico de ’a cità el ’ndava a brasseto e questo el ze stà el motivo de ’a potensa de ’a Marina de Venessia e de Venessia stessa regina de i mari.
Fasendo un giro dentro l’Arsenal da eà porta de tera – ghe ze anca quea de aqua – distante da eà potensa de queo che el gera durante el tenpo de ’a Serenissima, ti pol védar ancora ’a grandessa storica de sto posto: un inpianto grandissimo in armonia co l’anbiente circostante.
A l’entrata da tera ghe ze de i leoni mienari, queo a sinistra, el più grando, el ga scrite in caràteri rùnici risaenti al XI sècoeo, se pensa scrito dal futuro re de Norvegia, Harald III, che el comandava soldài nordici de l’esercito bizantin. Sta scultura inpressionante alta tre metri ’a ze stada portada da Francesco Morosini dal Porto del Pireo, in Grecia, da dove el Morosini ga bonbardà el Partenone che gera deventà na polveriera nemica.
Tante storie misteriose se conta capitàe dentro l’Arsenal, ma anca qua bisogna sercarle e no dar mai gnente de scontà e no inpressionarse se qualchedun te conta de leoni de piera che ga sbranà cristiani.
El fato stesso che sto cantier el sia stà, in qualche forma, come l’inferno, tanto gera el fogo e el caeor che se vedeva e sentiva, par mi, el ga un significato da sercar. ’Desso se respira serenità dentro i manufati in parte restaurài quando che se vèrze ’e entrate che ne porta oltre i alti muri, fin a ’e dàrsene.
Eco ’naltra curiosità: ’a cità de Venessia no gaveva muri, sóeo l’Arsenal li ga. No ve par strano? Cossa se doveva scóndar oltre Venessia?
Dal canpanil de San Marco se vede oltre i muri de sta meravegia e mi me so’ acorto sóeo dopo tante volte che so’ ’ndà sù che ghe ze un somergìbie che se vede. No gavevo mai savesto che el ze queo che go visto tirà sù come monumento parché ’e distanse qua ’e se perde ne ’a narassion favoeosa del cuor navàe de ’a Repùblica del Leon.

[torna sopra]