Editoriale

De le volte bisogna contentarse
Sognare, desiderare, zercare de miliorare xe consentìo, anzi necessario, parché la vita la possa ’ndare avanti, ma bisogna anca fare i conti co l’andamento generale de le robe, de i tenpi, de l’età, de l’inprevisto…

Sto ano, tra decreto 1, decreto 2 e decreto 3, xe passà l’inverno, la primavera e xe rivà l’istà.
El tenpo, le stajon, la natura i ga le so regole, el so ritmo, difarente da quelo de l’omo che ’l dipende propio da la natura e da le so stajon. E, come xe giusto che sia, se l’omo el ga rispeto par la natura, el ghe ne ga senpre on utile, se inveze el la maltrata, la ghe pensa ela, a la fine, a presentare el conto.
Come ne xe capità sto ano! E ’lora eco che l’ista de sto ano la xe l’istà del coronavirus, co tute le conseguenze del caso: mascarine, goanti, distanziamento, ocio qua ocio là; in cesa xe mèjo no ’ndarghe e, se te ghe vè, te ghè on banco tuto par ti; sta’ senpre atento a quelo che te tochi; in spiaja, atento a quelo che te goardi, ché par caso l’ocio no l’incontra el coronavirus drio ciaparse el sole so le ganbe de chela bela scajona bionda che te ghè so l’onbrelon davanti… E speremo che le distanze tra le sdrajo no le sia tarocà!
Insoma, a ghe xe poco da dire e da scherzarghe sora: la xe na facenda seria. Vegnarìa voja de butare par aria tute le carte e ciamarse fora da sto bruto zugo.
Calchedun, za stufo prima de scominziare le vacanze, el naséa disendo: “Fermè el mondo, ca vojo desmontare!”, ma l’è ’ncora qua e, ociài da sole e mascarina te ’l muso, el va a fare le so passejate in riva al mare.
De sicuro el ghe ga ripensà: vòi par l’età, vòi par chel poco de bonsenso che no ’bandona mai l’omo fin a la fine de i so giorni, el ga da ’verse dito che de le volte xe ben contentarse.
E bravo! Semo dal tuto d’acordo anca noantri, parché ne la vita riva el momento che, pi che vardare distante, se preferisse vardarse intorno.
De solito, sta roba la càpita quando bona parte de l’esistenza la xe ormai a le spale e se capisse che se xe quelo che se xe.
No ’l xe on zugo de parole: se ghe mola de far xolare in cielo la propia aquila, e se preferisse far sù el reve che ’l pol senpre vegnere bon. No se trata de rinunciare, ma de constatare: scominzia on raporto novo con la realtà, che no vol dire molarghe de fantasticare e de pensare positivo, vol dire stare na s-cianta piassè calmi, magari co na delusion de manco, anca parché, come dise el proverbio, “chi se contenta gode”.
Uno de i “aforismi” pi famosi de Sant’Agostino, adato a credenti e non credenti, el dise: “La felicità sta nel desiderare ciò che si ha.”
Tuti, ne la nostra vita, ghemo fato de i progeti, ghemo realizà de i sogni e soferto quando, inveze, semo stà delusi. Ma, considerando quelo che semo riussìi a fare e vedendo quelo che efetivamente gavemo e quelo che, in realtà, semo, questo ne lìbara da l’ansia de quelo che no semo stà boni de avere e de èssare.
Quindi, pur credendo nel futuro, pur sperando de poder tornare a on’istà senza virus, démoghe el benvegnù a l’istà che riva e contentémose de quelo che la podarà regalarne.
Lassè, a sto punto, che femo na pìcola schincarola, canbiando argomento. Sta primavera passà, xe rivà anca par Quatro Ciàcoe el… bloco intestinale de la publicità, a causa del “bao cinese”. La rivista, come quasi tute le atività lavorative, la gavarìa dovesto fermarse. Inveze, l’editore ARTE STAMPA el ga deciso de stanpare regolarmente Aprile, Majo, Giugno e Lujo/Agosto…, sia pure ridusendo el nùmaro de le pagine.
La xe stà na decision as-cia che se ga acordà co l’amore che noantri ghemo pa ’l dialeto.
Grazie a i Fradèi Corradin, podemo dire che, contentàndose de le pagine che ne viene dà, el dialeto ga vinto el coronavirus.
E ’lora, na volta tanto, contentémose del presente!

[torna sopra]