Da Ponzano Veneto (TV)

El Rosso

La sposa del Rosso xe brava e bona come la mula de Papa Sarto.

Silvano Salvi
Anca ne l'universo del Luna Park ghe xe stà momenti difìssili par i tanti giostrari, parché anca se ghe xe chi varda a ’sto mondo co oci straviài e lo vede solo pien de ciasso, colori e svaghi, più de coalche drito no ga ’vuo la fortuna al so fianco.
Xe el caso de un toso che, par via del color de i so cavéi e le tante lentìsini su la mutria, tuti lo conosseva co la nomenansa de el Rosso. Prima de maridarse el stava in fameja co un fradelo, mare e pare, paroni de ’na giostra par putèi, tegnùa come un bisù, e un barsalio dove so mama se dava da far qual baro pischerla par incuculir, cioè inbonir e ciamar aventori.
Un dì, in ocasion de ’na legra patronal, ’sto toso ga pusà i oci su una de le dó sorele, ciamàe Sgarbeose, che co la fameja se guadagnava da vìvar co ’na simì, ’na giostra tipo montagne russe picenine, e come par incanto xe scatà tra de lori l'amor, coronà co el sposalissio. Un ano dopo, xe nata ’na creatura e pareva che la vita par lori ’ndasse par la giusta strada.
I dó sposeti se gaveva anca cronpà ’na pìcola atrassion e ’na carovana che altro no gera che ’na roulotte picenina, par seguitar a ’ndar drìo a i parenti, de qua e de là, de sagra in sagra.
In ocasion de ’na legra ne la zona de Treviso, ’sta carovaneta xe stà postà vissin a la cesa; se gera a i primi de marso, tenpo de le prime legre setimanali, faseva ancora fredo, cussì par scaldarse, i doparava ’na stueta elètrica; xe sta cussì che ’na note, un drito, da la finestrela de la so carovana el ga visto un slusegar sinistro drento la carovaneta del Rosso e de la so sposa. Incuriosìo, el se ga tirà sù dal leto par védar e capir de cossa se tratava, anca parché capitava che coalche drito, doperasse remedi personali par comodar question co altri giostrari; e uno de ’sti remedi gera petar fogo a la atrassion de quelo che gera da avertir de rigar drito. Sta volta, però, el slusor vegneva da drento un carosson: proprio da la carovaneta del Rosso, che in dó e dó quatro xe stà involtolada da le fiame.
El giostraro ga tacà a sigar: “Al fogo, al fogo!” svegiando tuti che de paca se ga scaraventà sul logo. Coalchedun, co corajo se ga butà nel fogo, tirando fora da quel desìo de tramesi de plastica infogài, chi che gera più a portata de man, e che sarìa stà el Rosso.
’Sto omo, intossegà dal fumo no gera ne la possibilità de far gnente, xe stà naltro giostraro che, sfidando le fiame, el xe stà bon de tirar fora la sposeta, anca ela intossegada e piena de scotadure su tuta la pèle; no xe stà possìbil, però, salvar el mucineto, parché oramai no se podeva più ’ndar drento la carovana che brusava. Tuti ga dovùo assìstar sensa poder far gnente a la gran disgrassia che gera drìo consumarse, conpreso el Rosso che tacava a vegner in qua co i sentimenti; urlando cofà un mato el voleva butarse nel fogo par ’ndar a salvar el so tato, solo a fadiga i lo ga tegnùo duro, fasendo in maniera che no morisse brusà anca lu.
La tragedia xe sta granda, tute le done crussiàe pianseva e sigava, intanto rivava anca l'anbulansa par portar via la mama, mujer del Rosso; la ga podùo salvarse, ma ghe xe restà i segni nel cuor e su la pèle de ’sta desgrassia.
La causa de ’sto assidente xe stà el mal funsionamento de la stueta e anca el fato che i gas gaveva fato pèrdar conossensa a i dó sposi che dormiva, tanto da no poderse incòrsar de gnente.
’Sto fato ga lassà el segno tra i driti de quel Luna Park picenin, che se ga dà subito da far a far sù i love, par cronpar ’na carovana nova par i dó sposeti, mostrando cuor grando e senso de solidrietà fora dal comune.
El gran dolor par la perdita del so tini mucino lo se ga senpre podùo lèsar ne i oci de la dona del Rosso, anca coando xe nate altre creature.
Ancora ’desso se pol védar el Rosso co la stupenda giostra par putèi che ghe ga lassà in eredità so mare e so pare, el continua a vìvar nel mondo del spetàcolo viagiante che sèita a donar contentessa a i picenini che par fortuna xe ancora inamorài de quele giostre che ga fato sognar un poco tuti ne l'età de la maraveja, età però che passa massa presto sensa che se ne rendemo conto.
El Rosso ’jutà da so mujere, va ancora de paese in paese, de contrà in contrà, e grassie al so far zentil, rufian e franco el fa più belo e pressioso el Luna Park.
No mancarà tanto che el lassarà la atrassion a uno de i fiòi, che de sicuro sarà bon de portar ’vanti el mestier co inpegno e costansa, par donar ancora godimento e legreza in ’sto mondo pien de caigo, come diseva ’na canson.
Tuti có se deventa veci, varda indrìo e renpianse quanto ne la zoventù ga dà la forsa e corajo de ’ndar ’vanti par crearse un avenir, e anca se la vita no senpre xe stà ’na passegiata e no senpre tuto xe ’ndà par el verso giusto, se vede i ani passài come calcossa de straordenario. Cussì xe anca par el Rosso, ma grassie a l'amor de la so sposa, brava e bona come la mula de Papa Sarto, el sa védar ancora el belo de la vita.

[torna sopra]