|
Editoriale
A proposito de “vaccini”…
Oltre al “vaccino” contro el coronavirus, ghe ne vorìa anca qualche altro, tipo quelo par salvare la lingua italiana e quelo par tegnere in vita el nostro dialeto che po’ el sarìa la “nostra” lingua. Prima de tuto vien la salute e el laoro, ma se no se tegnemo strete ste nostre dó lingue, ris-cemo de pèrdare anca la salute e el laoro!
No ’l xe on problema nato ’desso, ma sia l’italian che el dialeto, i xe drio infetarse on fià massa.
Xe soto i oci e le rece de tuti che, propio al dì de oncò, con la novità de l’epidemia da coronavirus on stramaro de parole straniere (el virus anglico) el ga ciapà el posto de quele che, essendo noantri in Italia, le podarìa èssare dite con l’italian.
Par prudenza, ne xe stà racomandà de stare distanti da le droplet (goccioline di saliva), le jozete che va in aria quando uno el stranùa, ma anca quando se parla o se respira. Giornài e television i parla del timing (tempo di diffusione), che sarìa l’andamento de l’epidemia; i ne spiega come bisogna stare in lockdown (isolamento forzato), che vorìa dire de stare sarà in casa, par no ris-ciare de finire te on Covid hospital (reparti per ammalati di Covid), chei bruti posti da dove xe fadiga vegnérghene fora. Bisognarà ’ndare a fare on test (breve esame) par védare se se xe boni de doparare el kit (attrezzatura) par farse in propio l’esame del sangoe; e bisognarà scaricare el software (programma) per le app (applicazioni), pìcoli programi da métare, par esenpio, te l’iPhone (telefono cellulare), chel trapelo che de solito ciamemo telefonin.
In sto periodo viene fati zentenari de screening (controllo sanitario), par védare se uno el xe “positivo” o “negativo”, dopo che la febre misurà co ’l termoscanner (termometro) la xe massa alta.
Par studiare, i tosi i ga da ’vere el tablet (tavoletta) co ’l videotutorial (programma di istruzioni) par poder doparare l’e-learning (didattica a distanza).
Bona parte de i lavori de uficio i viene fati in smart working (lavoro da casa o a distanza); se te ghè da nare in uficio, al posto de l’autobus, te poi doparare la bike sharing (bicicletta in noleggio) e có te ghè da pagare te lo fè in contactless (pagamento senza contatto).
El coronavirus el ga infetà, dunque, anca la lingua italiana; no ghe xe pi anbiente o setore de l’economia che el sia restà “immune”.
Tuto questo ne fa capire che, a partire da i posti de comando, cioè da la pùblica aministrazion, ghe xe poca sensibilità e poco amore par el patrimonio de la lingua italiana. Al contrario de l’Italia, quando se xe tratà de darghe on nome a l’isolamento forzato, in Italia ciamà lockdown, la Francia e la Spagna, doparando la so lingua, i lo ga ciamà confinement e confinamiento, che i corisponde apunto al nostro confinamento.
Avanti de sto passo, tra mascarina, no darse la man e distanza de sicurezza… semo drio ’lontanarse non solo da la nostra lingua nazionale, ma anca da le nostre raise culturali e “antropologiche”.
A l’onbra de l’italian xe drio risentìrghene anca el nostro dialeto o lingua veneta, anca ela – e non da adesso – poco amà e poco considerà, prima da l’“alto e po’ dal “basso”. Solo la volontà de pochi apassionati – che la parla, la scrive, la lèze – i tiene viva la cultura de sta parlata che de le volte la fa fadiga a stare in piè co le sole so ganbe.
E par quanto riguarda el nostro Quatro Ciàcoe, la prima dose de “vaccino” ne la ga fornìa Arte Stampa, soto el controllo sanitario, atento e sapiente, del prof. Michele Cortelazzo; inveze, par la seconda dose de reciamo del vacino, femo afidamento su i operatori sanitari de sta lingua – i colaboratori – parché i la scriva al mèjo possibile, nel rispeto de la ormai famosa Grammatica Veneta de Silvano Belloni, e del manuale de la Grafia Veneta Unitaria de la Giunta Regionale Veneta.
Sti me pensieri no i ga gnente de sientìfico; i vole solo partecipare in qualche modo al “ruolo delle responsabilità”, in te on mondo che xe veramente drio canbiare.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
A proposito de “vaccini”…
Oltre al “vaccino” contro el coronavirus, ghe ne vorìa anca qualche altro, tipo quelo par salvare la lingua italiana e quelo par tegnere in vita el nostro dialeto che po’ el sarìa la “nostra” lingua. Prima de tuto vien la salute e el laoro, ma se no se tegnemo strete ste nostre dó lingue, ris-cemo de pèrdare anca la salute e el laoro!
de de Mario Sileno Klein
Musica e memoria
“I GIOVANI”
Pìcola storia de un conplesso “beat” de ’a Bassa Padovana
de Fiorenzo Zampieri
|
