Da San Stèfano de Zimela (VR)

Nostalgia

Naja: nostalgia de casa. (me disegno del 1960)

Un fisarmonicista a San Pietroburgo. (foto de Monica Bergamin)

Strissia del fumeto del sergente Rock.

Che strana roba la nostalgia, la te ciapa pianpianelo, la te vien drento da tute le parte e senza che te te inacorzi la se ingnara in te ’l core e in te ’l zarvelo. I la descrive ben Al Bano e Romina Power che i canta: “Ma che cos'è? Quel nodo in gola che mi assale che cos'è?... Nostalgia, nostalgia canaglia. Che ti prende proprio quando non vuoi… Nostalgia, nostalgia canaglia, di una strada, di un amico, di un bar, di un paese che sogna e che sbaglia…”
’Desso, che xe canbià i raporti umani e che ghe xe i videotelefonini che te mete in contato direto, a la xe manco sentìa, ma ’na ’olta, co’ i pochi mezzi de comunicazion che ghe jera, la jera tuta ’n’antra roba. Pensemo a tuti chei che jera emigrà in ’Mèrica, o i jera ’ndà in Francia a cavar biétole, o in Germania e Belgio in te le miniere, o pensemo a i milioni de soldà che in tute le guere che ghe xe stà el secolo passà i xe stà cavà ja da le so fameje e mandà a tribulare e patire in te i posti pi inpensài e distante, o a i prigionieri sarà come bestie drento a i reticolati: quanto gavarài sentìo ’sta nostalgia che ghe rumegava drento, che ghe ciapava tuti i pensieri. E anca el poeta Dante Alighieri, che ’l ga proà su la so pèle cossa vol dire èssare un profugo mandà ja da la so tera, el ga descrito con poche parole ’sti sentimenti: “Era già l’ora che volge il disio ai navicanti e ’ntenerisce il core lo dì c’han detto ai dolci amici addio…” (Purgatorio, VIII, 1-6)… e i naviganti no xe mia solo chei che xe su le navi, ma tuti chei che go dito prima.
Anca mi a go proà a sentire ’sta malinconia, specialmente durante i disdoto mesi de naja (1960/1961). Mi, tosato de vint’ani de un paeseto de canpagna, mandà a Ascoli Piceno e dopo a Cesano de Roma e dopo a Pieve de Cadore, che in tuto chel tenpo a so’ vignù a casa solo dò olte! A fantasticava de ciapare el treno e farghe ’na inprovisata a la me fameja, de rivar casa tuto vestìo ben e saludarli sbatendo i tachi e inmaginàndome le so face piene de sorpresa.
A ’sta esperienza de vita militare a xe ligà la canzon de Raoul Casadei, “Romagna mia” che la dise: “Sento la nostalgia d'un passato, dove la mamma mia ho lasciato, non ti potrò scordar casetta mia… Romagna mia, Romagna in fiore… quando ti penso, vorrei tornare dalla mia bella, al casolare. Romagna, Romagna mia, lontan da te non si può star!” Eco, ogni ’olta che la sento a me comovo e a me pare de èssare in te la caserma de Pieve de Cadore in te i primi mesi de l’ano 1961. Mi jera un tenentin fresco de prima nomina e i me alpini del me ploton a i jera de i veterani che i contava le setimane e i giorni par el congedo. ’Na sera so ’ndà in te la so camerata e a go visto uno che ’l sonava la fisarmonica co’ ’torno un pochi de conpagni che insieme i cantava “Romagna mia”. I jera tuti romagnòi e a jera tanti mesi che no i nava in licenza e védere ’sti omazzi co’ la barba longa e le face che, segnà da la fadiga e da le intenperie, le paréa chele de òmeni da trent’ani, che i pianzéa come toseti par la nostalgia, la xe stà ’n’emozion che dopo sessant’ani a no me la go mai dismentegà.
’Na vintina de ani fà xe vegnù a Sanbonifacio da l’Argentina un oriundo par conóssare el paese da ’ndóe che jera partìi i so veci e anca parché el gavéa da mantegnere ’na promessa che ’l ghe gavéa fato a so nono prima che ’l moresse: chela de portarghe su la so tonba un sachetin de tera sanbonifacese! Proemo a pensare quanta nostalgia de tuto chelo che ’l gavéa lassà la ghe ga rumà in te ’l core de che l’omo là.
Mi so’ un ’passionà de fumeti e in te le me colezion a gh’in xe de originài mericani de la metà del secolo passà. Ghe ne xe tanti de guera e el me disegnatore preferìo l’è Joe Kubert, che ’l disegnava le aventure de ’na conpagnìa comandà dal sergente Rock. In uno de chesti a ghe xe ’na storia che raconta proprio de ’na brancà de tera. I soldà mericani i jera sbarcà in Nord Africa e i dovéa conbàtare co’ i todeschi, co’ la sabia, co’ el vento e co’ la se’. In tute ’ste situazion a ghe jera un soldà contadin che ’l curava un poca de tera co’ drento ’na piantina, e tegnù i te un elmeto che ’l ghe faséa da vaso. I conpagni i lo toléa in giro e, quando che i se ga ’canpà par calche giorno, el ga sistemà la piantina in te ’na buseta fata in te la sabia i lo rinproverava parché el doparava aqua preziosa par beararla. El sergente el ghe xe ’ndà vizin e el ghe ga dito de finirla co’ che ’l baloco de tera lì. E el soldà-contadin, senza tanto sconporse, el ghe ga risposto che no la jera mia solo tera, ma la rapresentava l’Iowa e el Kansas e el Nebraska e che la jera… l’America, da indóe che tuti i jera ’ndà lì a conbàtare e a morire! Eco, par tanti nostri veci che xe ’ndà in giro par el mondo un sachetin de tera el jera el Veneto, la Sicilia, la Campania… el jera l’Italia.

[torna sopra]