Da Venezia

Venessia invisìbie

’A Basìica de S. Marco ne ’a so beessa. (foto de A. Mondin)

El mitico Leon de San Marco.

Me togo el ris-cio de tentar de contarve ancora ’na volta qualche mistero, qualche segno che no se pol far finta de gnente, tra i tanti che ghe ze a Venessia. No ze na roba fàssie parché forse i deve restar veài, missiài tra pensieri poco ciari, fati siensiosi ne ’a so grandessa, e anca parché ne i ultimi ani ghe ze massa zente che serca de contar de misteri come misero intaresse personàe e aparir sensa massa convinsion.
Però “l’ermetismo” ’assa un fià de spassio a qualchedun che de questo el se ga inpastà fin da toso, restando petà co ste conossense fin a créderse in dover de scrìvar un poco de ste storie incredibili che quasi ’e te rapisse, parché qualche altra persona fortunada ’a possa caminar par i fati che ’desso provo a contarve pena, pena.
Venessia, ’a prima volta che el visitator la vede, ’a te spara ’dosso tutta ’a so beessa fin a orbarte. Cussì ’a magioransa de nialtri ’a vien ciapada da questo e no ’a riesse a percepir, védar altro de l’infinità possìbie presente.
Nata, secondo el mito e ’a legenda el 25 Marso del 421 d.C., ’a so storia conta calcossa de aventuroso e inpossìbie. Anca qua ’e vicende se divide in almanco dó parti: quea storico-legendaria e quea inspiegàbie de i fati. El primo passo podemo mòverlo da Piassa San Marco e fermarse subito poco più in là, senò ghe vorìa ’na pagina sensa fine par scrìvar tuto o un fià de tuto. Vardando ben ’a Basìica de San Marco, insieme a tuta ’a piassa non ’a par massa tagiada da linee de piere e marmi ben driti e ’a par portarte in ’naltra dimension tra linee e curve almanco par chel primo momento.
’A Basìica ne ’a so beessa, amiràndoea co el pensiero giusto, ’a se vede co più entrate che ’e par a curve o a spiràe, e sta forma ’a rapresenta l’infinìo e anca calcossa che no se pol più fermar. Costruìa nel 832, brusada da un incendio nel 976, rifata dal Doge Pietro Orseolo I nel 978, e me fermo qua a ste date, a sto Doge, par no entrar in tuta ’a storia mienaria de sta meravegia costruìa par stupirne.
’A Capèa del Doge, come ’a ze stada par sècoi, ’a se arichisse de coeone, marmi che vien da l’Oriente, de un mosaico dorà, e del tesoro de San Marco, botin de guera de ’a IV Crociata che el sarà ’naltro segno forte de sta cesa, insieme a i quatro cavài in bronzo che vegneva da Costantinopoli. Vardando co atension sta costrussion unica, se trova qua e là na sinbologìa “esoterica” che intimorisse parché ’a ze na missèa de elementi “ermetici” e “alchemici” de ’a tradission greco-bizantina e de quea latino-germanica.
A i visitatori el cònpito de sercar sti segni che ve portarà lontan come dentro na bea fàvoea, ma anca de più.
Se voemo vardar i nùmari, queo de ’a Basìica el ze el sinque, come ’e cinque cùpoe, el cinque visìbie sul dado de l’architeto sensa nome nel mosaico de dentro, e anca qua tufeve ne i misteri da svear da soi o lezendo rari libri magici che parla in detalio de questo e tanto altro.
’A cità Marciana ’a ze consacrada al Pianeta Venere, e a l’interno de ’a cesa del Doge se trova imàgini de Venere che sinboegia l’armonia del Cosmo: eco forse, parché Venessia ’a par cussì fora dal mondo normàe, gavendo un legame sicuro co el Cosmo. El mitico Leon de San Marco, presente anca in cesa, ne ’a tradission “ermetica” el rapresenta el Sol. E sto sìnboeo el ze tra i più grandi che na Nassion ’a pol ’ver.
Tuto questo el ze na parte pìcoea come un granèo de sabia de tuto quanto che ghe ze in quea che ze ’a cesa più inportante de Venessia.
’Naltro passo che fasemo el ze queo verso el tacà Canal Grando che, visto da l’alto, l’apar come ’a figura de un serpente, ne ’a normaità de i più, come na “S” roversa. El serpente che apare a i destinài el ze un drago, sìnboeo “esoterico” de ’e fòrse oculte. A la fine del Canal Grando, vedemo l’ìsoea de San Giorgio; San Giorgio el ze el santo che ne ’a tradission cristiana copa el drago, come per farne capir, in qualche maniera, che tuto no ze ’assà al caso, parché ne fa védar na forsa che esorciza el serpente venessian che rapresenta el mal o ’a cativa sorte.
Nel spassio disponibile me resta sóeo de segnalar el Paeasso Ducàe, stupendo e pien de segreti da decifrar stanza par stansa, pavimento par pavimento, sentìmetro par sentìmetro ne i tanti spassi de sta dimora che incanta.
Ca’ Dario segnà da un destin de morte che se ripete. Ca’ Malipiero vecia, dove Giordano Bruno el ze stà denuncià par ’ver fato pratiche magiche.
Sti primi posti mi ghe so ’ndà da sóeo sensa che qualchedun me ’o gavesse dito, e me so’ incaminà su ’a strada difìssie del non conóssar gnente de l’oculto e del ris-cio del no saver dove ’ndavo a finir. Qualchedun de nialtri el podarà provar a entrar in ste prime piere, sconte a i più par assarne el peso de ’a scoperta e del tenpo destinà a i riti e a eà speransa de apartegner in qualche modo a l’infinito de Venessia.

[torna sopra]