Da Adria (RO)

Munari

Un mulin su l’Àdese; sul sfondo el Domo de Cavàrzere.

El mulin su l’Àdese, a Rotanova, distruto dal fogo. (foto del Comitato Cittadino de Rottanova)

El mulin de Rotanova prima che ’l ciapesse fogo.

El m’à tirà in lengua Renato (Renato Scarpi – Q.C. Lujo-Agosto 2020), sproloquiando su i munari. E particolarmente su i munari in Po. Bon!
Mi go ’vù più d’un munaro inte la mi assendensa: nono Doro de rassa Camisotti, padre de mi mama, che mi ò ben conussù quando che ’l gheva du bei bafuni bisi, el jera da zòvene sul mulin, int’i ultimi ani de l’esistensa de sti machinari; ormai però ciapava senpre più piè i cosideti mulini terani, dove la forsa par far girare la màsena la gheva origini diverse: dal musso a l’aqua e finalmente dal vapore, cussì lu, senpre par star sul filo de la corente, l’à fato el passadore su Po Pìcolo, a la Calà d’i Cati, su la strada p’r andare in Arian.
Ma jera za un mi trisavolo, un Camisotti Salvatore insieme a so fradelo Gabriele, che masenava su Po e forse anca Carlin Luca, mi bisnono, anca se de st’ultimo no’ go nitissie massa sicure.
Da la parte de mi papà, int’el ramo de mi nona Rusina, i Vicentini i à lassà anca luri le so peche int’el mestiere: mi bisnono Dumissio l’à scuminsià da bocia e l’è ’ndà ’vanti fin che l’è stà bon, ma prima de lu d’i Vicentini munari ghe n’è stà na marùgola intiera.
In genere tuti i se distingueva da l’altra zente par via de la ganassa bona: magnaduri e bividuri da lassarte sbasì solo a vardarli, capassi de ciavarse un pasto de brasole penà cavà da le bronse, scolàndose un fiasco de moro o de far fora na polenta intiera par sunar sù toci e ruvinassi, sensa sindacare la qualità.
Sul mulin, p’r esenpio, dove ch’a no gh’jera tanta tànbola, par scaldarse el stómego tra na masenà e n’antra, i se preparava na sfojada, fata solo de aqua e farina, o la pinsa grassa co’ le cìciole, più lavorà, parchè gh’jera aqua, struto, farina da polenta, farina bianca e un bel spugnoto de cìciole e, s’la jera sotoman, anca na sbrancà de fighi sichi o, più raramente, de uveta. Naturalmente par parar zo sti smacafame ghe voleva senpre el fiasco a portata de man, sensa star lì a speociare s’a se tratava de clinton, raboso o friularo, basta che ’l fusse nero e forte.
D’inverno, co ’l fredo, la bora e cle fumare ch’a no te lassava vista oltre el to naso, la grapa la se ciuciava a onbre. Forse l’è par questo che ogni tanto i saltava fora co’ storie vere, inventà o inmaginà ch’a faseva vegnere i sgrìsuli inte le ciape a chi che le scoltava, come par esenpio quando ch’i s’inbateva inte le lumasse o i sentiva el strussiar de cadene strassinà da i spiriti o i vedeva svolare in cielo la barca de le strighe che le ’ndava o tornava da l’Egito; podeva anca capitare ch’a s’incrichesse la roda, p’r un morto negà che, vegnendo zo par Po, s’ingatejava lì.
De le volte el cicheto el ghe voleva parchè gh’jera da spostare el mulin, o par portarlo un fià più al largo sul filo de la corente se Po el se catava in magra, postàndolo al centro de la piarda e cadeva destacarse ben dal froldo; altre volte cadeva ligarlo più a riva, parchè Po in piena el lo distansiava massa da i àrzeri.
Có Dio lo voleva se podeva ponsarse na s-cianta sul pajon de la cucia, ma i jera senpre pisoliti co’ recia a penelo, par star atenti al canpanelo che ’l sbatociava quando jera ora de butar sù o de cavar cassa. La jera na vita dura e cadeva èssere almanco in du: un munaro da mulin, quelo che provedeva a cargar la tramogia, a cavar cassa, a insacar el masenà e a star drio a tute le inconbense necessarie, un munaro da fòra, che praticamente el faseva el fachin e el caretiere, p’r andar a tor sù le biave da i diversi clienti e menarghe a casa le farina masenà.
A proposito gh’jera parici dubi su l’onestà de munaro, che ’l gheva la fama d’èsser inbrojon e birichin, amigo e ospite de contrabandieri, banditi e soversivi, tanto ch’a jera previste sansion de le varie autorità, specialmente de Adria e Ferrara. A parte questo, no mancava diversi tipi d’inbrojo ligà al mestiere: el saco mojo, el missioto e la zonta de sémola o sabia, la valutassion de l’olativa, la staliera tarocà e cussì pure el staro trucà, e chi più ghe n’à più gh’in meta. Tanto che se diseva: “a canbiar munaro a s’ canbia ladro” e al dito ghe faseva da contrapunto la regola del munaro par la molenda: “80 chili a tuti, 90 a qualchidun, sento a gninsun”.
A gh’jera contadin, naturalmente malvisti da i munari, che par sicuressa de portare a casa el masenà de le so biave, i se sentava in mulin e i voleva védre co’ i propri oci i so gran butà su la tramogia e i spetava ch’a vegnesse zo la so farina.
Par tradission de la categorìa, fra de luri no gh’jera basacristi o magnapartìcole, puntualmente giustificà dal fato che par tèndar al mulin no se distingueva la festa da i giurni de lavoro. Però el 17 de Genaro jera na giornata sacra: lavà, sbarbà, co ’l vestito in grìngola, de prima matina, a t’i catavi tuti, ma propio tuti, sul piassale de la cesa de Santa Maria, ch’i ne pareva più luri, pronti par la messa de Sant’Antoni dal busghin e la benedission par luri, le so bestie e i so artegagni.
Se qualchidun, par conbinassion, no essendo al corente, el domandava cossa ch’la jera tuta cla baraonda, el vegneva ciapà a male parole:
“Come? Ne te sa che anquò l’è Sant’Antoni, la nostra festa, la festa d’i munari. Ma gnonde vìvito? Da gnonde viento? Dal regno de la suca? Valà, valà, ch’a ti è proprio un salamon!”
E cussì el se ciapava anca le sue. Finì la Messa, ciapà la benedission, portà le bestie a ponaro, scuminsiava la ganzega: magna e bivi, bivi e magna, leva el canto e alsa el goto, se rivava a note fonda, quando la marùgola, mèsi inbriaghi o inbriaghi spolpi, ognuno in qualche modo riussiva a catare la porta de casa e co’ na bela durmì, se concludeva la giornata. Domatina sù bonora chè el mulin jera là, pronto a spetare l’arivo del so munaro.
L’unico ricordo ch’a go d’un mulin l’è stà chel’ano ch’ò insegnà a Rotanova. Proprio lì, su l’ Àdese, a quatro passi da la scuola, gh’jera piassà se non l’ultimo, uno d’i ultimi mulini a aqua.
El jera un tantin scassadelo, ma ancora el tegneva bòta.
Passà i ani, quando ormai la mi profession la esercitavo in altri posti, so’ vegnù a savere che ’l mulin l’éva ciapà fogo e inte sto modo l’éva finì i so giorni.

[torna sopra]