Musica e memoria

“I GIOVANI”
Pìcola storia de un conplesso “beat” de ’a Bassa Padovana

“I GIOVANI”. Da la parte sanca a quea drita: in piè - Fiorenzo (Renzo), un amigo, Marino, Mario, incuciài - Galdino e Enzo.

“I GIOVANI” ancuò: da sanca a drita: Fiorenzo (Renzo), Mario, Enzo e Galdino.

Gèrimo in te i ani ’60 del secolo passà quando i zóvani de alora gera drio a fare chel ’68 che passarà a la storia come un periodo de gran casin e de rebalton contro le vece règoe, in nome de na nova libertà. In tuta sta confusion anca la musica ga dovesto ’bandonare i veci schemi de la cansoneta melodica par butarse in quela che gera la moda foresta del “beat”.
Noantri ’taliani, che semo na s-cianta provinsiài, se ghemo subito messi a mimare sti novi “complessi musicali” inglesi e ’mericani, scavejoni e marajoni. Xe stà naturàe la nàssita de na scaretà de conplessi de tute le fate, in tuta Italia.
Da ’e nostre parte de ’a Bassa Padovana, non xe mancà che un mucio de tosati, che gnanca saveva sonare, gavesse messo insieme batarìa, chitare e microfoni par simiotare quei che se vedeva in TV o che se sentiva à l’aradio.
Anca mi, che me pare me gaveva cronpà na chitara ’lètrica a rate, me so’ messo de voja a provare a sonare. Tanto go fato che so’ stà ciamà da de i amissi, mati come mi, par métare sù, anca noantri, un conplesso.
E cussita xe nato el conplesso de “I GIOVANI” (nome davero originale!…) che, anca se par poco, ga ’vudo un serto sucesso in te le sale da balo de la Bassa.
Pochi ma boni:
– Mario Biscaro, batarista, de Triban;
– Marino Marinello, deto “bicio”, pianola e chitara, de Conselve;
– Galdino Marcato, chitara e vose, de Conselve;
– Enzo Cavallaro, chitara e voce, de Conselve;
– Fiorenzo (Renzo) Zampieri, chitara basso, de Bagnoli di Sopra.
Purtropo el bàgolo xe durà poco parché chi xe partìo par el militare, chi gaveva problemi de lavoro, chi gaveva casini casa: el grupo s’à desfà.
Quarant’ani dopo però se ghemo sercà e ritrovà par na sena casa de Mario dove, tra un goto e un dolse, xe stà beo ’ndare a ricordare quei ani indove I GIOVANI gera zóveni sul serio!

[torna sopra]