El filò de i Wigwam

Antonio Giraldo
El tenpo passa, ma senpre inamorà de la vita

Tra i tanti brai che sa contare de come che na olta jera i fossi, i trosi e le caresà, le bustije che inframesava i canpi, e dopo ’ncora le case e i veci mestieri de ’e ande tra Vallonga e Arzergrande ghe xe l’amigo Antonio. Na bona memoria, voia de scrìvare e na vena poetica che la buta come un posso artesian. Un omo de altri tenpi, un fià su le sue e che co ’e paròe no ’l ga tanta confidensa, ma bon de pena par tramandare ricordi, pensieri, considerassion e fati de la storia minima de ’a nostra zente. Quea co i cai su le man spessi un déo, duri ’fà el curame, co la pèle cota dal sole e tuta a rughe come inquò xe raro védarghene, parfin tra i ’grìcoi che anca lori dopara creme e cremete e la fadiga, giustamente i ghe la lassa a i tratori.
Antonio mi lo definirìa un cantore de la tradission contadina, sensa nostalgia però, parché i jera tenpi grami, anche de fame, de pelagra e de tanta ignoransa, ma dove che l’anbiente jera vivo, l’aqua ne i fossi neta, tanto che la se podeva anca bévare, ghe jera osei e oseeti de tante sorte che faseva gnari dapartuto, e po’ lièvori e fagiani, no inbatunìi come quei de ’desso che i xe de alevamento e i tira sù a mangime e po’ i li mola na setimana prima che i vèrza la cacia. La gran parte de queo che se podeva métare in tola jera de l’orto drio casa, o i vovi del ponaro, lardo del porsèo de ’a casa, la poenta de fromenton maran o maraneo portà a masenare, un saco a la olta al mulin del paese, i fasiòi de ’e gonbine in mezo al soturco, i pessegati, le tinche e i bisati, e po ’ncora le scàrdole e le rane che el so popà pescava in te i tanti fossi, canali e vae che inframezava eà canpagna zo par la via Caresin, dove che la se vèrze in te le Comunanze co a Sud, in fondo, dove l’ocio se perde, l’àrzare del Bachilion.
Altri tenpi parché, bastava poco par far festa, na feta de salado, na ciopa de pan biscoto, na onbra de vin grinton, na pàciola e na butada tra amissi e magari, se le brave fémane de casa, chel dì le gaveva fato la fugassa, quea cota soto el cuercio in su la rola del fogolaro, con sora le bronse alora sì che se verzeva le porte del paradiso. E alora la festa la jera anca pa i putèi che in chei ani ogni fameja ghe ne faseva na sgnarà. El tenpo che va, ma senpre inamorà de la vita come in te na so poesia: “Anca se semo strachi no saremo mai rassegnà, a un mondo che ghe manca la belessa, e non pensaremo mai che la possa èssare finìa parché semo, de pi de prima, inamorài de la vita.” antoniogiraldo@libero.it

[torna sopra]