Da l’Alta Padovana

’A medusa

A Aquileia tuto ze ’ndà ben in medo ’e rovine antiche…

So ’a sabia rente l’acoa se ghea spiajà na medusa enorme, orìbie…

I ze partìi pa’ ’ndare in gita scoeàstica co du pulman pieni a ’e sete parché jera longa ’a strada par Aquileia e Grado. In medo l’alegria infantìe de scoeari e professuri, sòeo Piero jera ciapà come senpre da l’ansia che no capitasse problemi co i fiòi de chealtri in “afido”.
Se jera a i primi de majo: céo coasi seren ma co siroco umido. A Aquileia tuto ze ’ndà ben in medo ’e rovine antiche, inte ’a fantasmagorìa de ’a Basilica e inte i scavi soto ’l canpanìe, ma fin che i jera drento el Simitero de i Eroi, Piero ga visto de ’e nùvoe negre a strati vegner ’vanti dal mare.
“Ragasse, (a ’e professoresse) ’ndemo via suìto a l’agriturismo prenotà ché gnen sù tenporàe.”
Chi che conosse ben ’e fémene cò ’e ciàcoea, sa cossa che vol dire el so “vegno suìto”, difati Piero, scorlando ’a bandiera zàea el ga zhigà:
“Tosati, co mi, ché ’ndemo magnare!”: paròea che ga on raciamo potente so ’a fame de ’a carne che cresse.
Inte on àtimo se ga inpienà ’a coriera e in poco tenpo i ze rivài a l’agriturismo ’ndove che i ga fato ’pena ora scaricare i zaini che ga tacà ’e prime josse cative del tenporàe bruto co ’a piova che fazéa ’e bole so ’e pozhàngare; ma chealtra coriera no rivava. Cò ga tacà tenpestare ze rivà ’l pulman de ’e coleghe cioacoeone e cussì lore e i so tosati ga ciapà na lavada e na rata de sassàe de tenpesta inte i 50 metri tra parchejo e riparo.
“Coeste no ze persone serie – pensava Piero de ’e guide – sarà ché no ’e ze bone lèdare ’e nùvoe!” Comunque inte ’l saeon de l’agriturismo tuti se ga sugà e ga magnà in pace fin che fora vento e piova lavava i viri. Ora de partire pa Grado, ghe jera on bel soe, ma se sentìa da l’afa che ’a jera na sbaearòea che co ’a so luce calda piturava de coeuri speciài ’a laguna de Grado. Co sto soe d’oro i ga visità el Batistero e Sant’Eufemia: co ’a luce de ’e finestre, ’a catedràe in medo coeòne e mosaici ’a jera on giardin luminoso. Ma coesto ghe paréa sòeo a Piero ché chealtri, tuti, voea ’ndare al mare.
In spiaja ga tacà ranuvoearse. A Piero, armà de on zoom 35-85 mm, òtimo pa ’e gite, ghe restava sòeo du fotogrami del rolin de diapositive. I tosati de ’a so classe ’o ga ciamà: so ’a sabia rente l’acoa se ghea spiajà na medusa enorme, ceeste e grisa, orìbie come on secondo de vaca, e on bontenpon ghe ghea messo na meda sigareta so coéa che parea ’a boca. El la ga fotografà, pensando che dopo el garia butà via tuto, e so coéo na toseta dadrìo de lu ’a fa:
“Ma no ’e se vergogna mia de mostrare chii du obrobri là?”
Sentindo tauscare, el se ga girà de colpo e, senzha pensarghe e védare ben, el ga incoadrà e scatà so du tafanari bruti de dó tedescone in tanga che caminava a paro. Finìo el rolin, el ga vardà el céo. Naltro tenporàe vegnéa dal mare co strisse zae tra i strati de nùvoe. Coleghi e tosati voéa ’ndare a ’a fine de l’ultimo pontìe:
“Vardè che tenpesta!“
Gnente da fare! ’Lora el ga ciamà quìi de ’a so classe:
“Dài! Vegnì co mi che ve ofro el geato!” e, sentài so ’a veranda de ’a geatarìa in spiaja, co ’l geato in man i vardava chealtri romai distanti. De colpo lanpi, tuni, scravazho e tenpesta, grossa come zhiarese, che ghe batìa ’dosso a i tosati inbronbài che rivava de corsa co ’e man in testa. Ultima ze rivà na prof. che coréa de travason da grossota, co ’a permanente desfà e i caviji de picoeòn come ’e rece de on còcari, che a Piero ’a ghe ga fato:
“E ’desso no stame dire che te ’o ghìi dito!” E lu:
“Mi te digo sòeo che co mati come voaltri in gita no vegno pi!”
Tre dì dopo Piero ga organizà ’a proiezhion in classe de ’e dia de ’a gita, ’pena ritiràe dal fotografo senzha controearle e, fin che l’inpienava el caricatore, controeando anca i tosati, no ’l se ga pi ricordà de i du ultimi scati, siché, a ’a fine de 34 fotogrami gustosi par tuti, cò ze conparsa ’a medusa so ’l schermo 3 x 2 m, orenda e schifosa, co sti coeuri esasperài da ’a peìcoea, tusi e tose ga espresso co bordèo tuto el so ribresso. Ma cò ’l timer del projetore ga fato entrare l’ultima dia: coatro enorme, terìbie ciapone sbainàe co efeto-fràgoea, oltre al resto, lora ze esplosa ’a classe e Piero ga pensà: “Desso go fato ’a fortaja!” Pa fortuna che, in medo ’a confusion, ga girà tuto in ridata on tosato co i ormoni in voeàta, che ga zhigà:
“Jera mèjo ’a medusa!”

[torna sopra]