|
Da Verona
Storie de contrabandieri
 | | Val de Revolto - cipo de confine co ’l Tirolo. |
 | | Alta Val Fraselle, via batùa da i contrabandieri. |
 | | Ala, primi ’900 - coà vegnéa prelevà le merce di contrabando. |
 | | Bocca Pertica - in testa a la Val de i Ronchi. |
L’è el 30 novenbre del 1874 quando tri fradèi de contrada Cattazzi de Durlo, Domenico, Luigi e Angelo, i parte, zaino in spala, con rento quatro fete de polenta, salado e formajo, a la volta de Ala, alora soto el Tirolo.
Jè contrabandieri.
Cade ricordar, che el fenomeno del contrabando el ga ’vuo el so massimo svilupo tra el 1866, con l’anession del Veneto a l’Italia e el 1918 con la fine de la prima guera mondiale e l’anession del Trentin a l’Italia.
Co la forte crisi economica vegnù dopo l’Unità d’Italia, i dazi su le merci, la tassa su la màsena de i cereali che la gavéa messo in denocio i molinari de la Lessinia, darse al contrabando con Ala l’era diventà par i Cimbri un normale (anca se ilècito) mestier che el giutava a sbarcar el lunario. Le merci pi comercè jera: tabaco, alcol, sùcaro, sale, pólvere da mine, spessie.
El Stato par far fronte al fenomeno, el gavéa dislocà longo la fassa de confin, tra val de Revolto e val Frasele, caserme e postassion de la guardia de finansa. Spesso le barufe sortìe tra i contrabandieri e i finansieri, le finéa in sparatorie da le tragiche conseguense. I Cimbri i vedéa de malocio i finansieri, abituè come i jera al tenpo de la Serenissima a èssar lori stessi a sorveliar i confini e no èssar comandè da nissun.
Serto, che far el contrabandier l’era on mestier tribulà e pericoloso, ma anca i finansieri i gavéa vita dura; pori butèi de 20 ani, quasi tuti del Sud, catapultè su on teritorio inpervio che no i conosséa. Tante volte, sia contrabandieri che finansieri i s’à catà a sfidar ’na montagna che no la perdonava e le perdite jè stè tante da tute dó le parte.
Tornando a la nostra storia, i tri fradèi i parte verso sera da i Cattazzi, batendo la Via Vesentina, direti in Ala. Par longhi trati de la val de Revolto i fa sentieri che solo lori i conosse. La neve alta e el forte vento, i ghe rende difìssile el camin. Rivè a la Boca de Pertega, i infila la Val de i Ronchi e i riva driti in Ala. Là, i tol sù ’na carga de tabaco paromo e subito i ciapa la via del ritorno.
El tenpo l’è bruto e i ga da frontar longhe e erte tormentè, con la pesante carga su la schena. Rivè sul Zevola, i ven traolti da ’na bufera de vento e neve. No i tornarà pi a casa...
I genitori, disperè, no i sa indo’ sercarli; la montagna l’è querta da metri de neve!
I corpi de Domenico e Luigi i ven catè l’11 e el 13 febraro del 1875 nel vajo soto el baito de Frasele; Angelo, el pi dóeno, che el gavéa perso el contato co i so fradèi, el ven catà el 23 majo, zo in te ’n anfrato rocioso.
I ven sepelìi tuti tri in Giassa. Sta storia, sentìa tante olte, la me ga senpre comosso; penso che Angelo prima de morir l’abia patìo ’na longa agonia.
Imaginando i so ultimi pensieri go volù farli mei, dedicàndoghe ’sti quatro versi:
E L’ANIMA
VOLERÀ NEL VENTO
Longa la strada
strova la note
sconta la luna
el zaino pesante,tanto pesante…
Go perso me fradèi
go perso el sentiero.
Làsseme nar, Signor
son straco, tanto straco.
Mai pi fredo, mai pi paura
mai pi dolor.
Neve lidiera
querdarà el me corpo,
la montagna la sarà
el me sepolcro.
E la me anima
la volerà libera nel vento…
Antonia Stringher
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Zóvani “a mano armata”
La violenza giovanile de sto periodo la xe come el coronavirus e le so “varianti”: la resiste, la se inventa de tuto e la crea dani inpressionanti. Come xe possibile che sti tosi i viaja co ’l cortelo in scarsela? A la prima malagrazia… na scortelà e ghe scapa el morto. Che la sia tuta colpa soa o anca de noantri adulti?
de Mario Sileno Klein
El filò de i Wigwam
Antonio Giraldo
El tenpo passa, ma senpre inamorà de la vita
de Efrem Tassinato
Ciàcole visentine
I polastri de Tonezza
Xe passà pi de trentasinque ani da quando che go fato la me prima risserca stòrica, quea su la me fameja, jutà da un par de animali co le ale.
de Giordano Dellai
Da Verona
Storie de contrabandieri
de Antonia Stringher
|
