Da Verona

“Nodo d’amore”

Ghera ’na olta un re. E invesse nò. Stavolta l’è un conte: Giangaleazzo Visconti, sior de Milan… ma anca de Verona, da quando verso la fine del ’300 l’è riussì a parar via l’ultimo de i Scaligeri. Giangaleazzo el vien ciamà anca “Conte di Virtù”, ma no’ parché el sia virtuoso (in realtà l’è ’na pèssa da pié), ma solo parché l’è “conte” anca de ’na çità francese che se ciama Vertus, e da lì el nome. Intorno a un personagio del genere ci-sà quante storie sarà nate, e ci-sà quante legende… così ’desso ve ne conto una, ma no una qualsiasi: ’na legenda inportante! E a la fine capiremo el parché.
Semo a l’inissio del ’400 e Giangaleazzo Visconti co ’l so esercito el se sistema tra Peschiera e Mantova, su le rive del Mincio, da le parte de Valeggio. Vien note, e finché tuti i dorme dal fiume vien su qualcosa… A l’inissio la par ’na nebia, un fumo bianco che passa legero fra le tende e i soldà indormensà. Ma pian pian la nebia la se condensa in forme umane: i è streghe. Brute come el pecà. E le scominçia a balar in tondo, in pressia, inboressà. Però mia tuti i soldà i dorme… ghè un capitan de nome Malco che el vede tuto e che, vinsendo la paura, el se alsa de scato, tentando de ciapar almanco una de ’ste figure demonìache. Le streghe veloci come el vento alora le se buta in aqua, ma Malco, ’n àtimo prima che l’ultima la sparissa nel fiume, el riesse svelto a brincarghe el mantel e sbregàrghelo via. Malco el se speta de védar ci-sà che oror, e invesse el se tróa davanti ’na dona de ’na belessa da sogno. ’Na facia tonda, perfeta, contornà da cavéi biondi… e dó oci ciari e ne i oci tanta tristessa. La dona la vorìa indrìo el so mantel, ma Malco el vol prima saver ci l’è… e così ela la ghe conta che el so nome l’è Silvia, e che l’è ’na ninfa de l’aqua (’n’anguana… insoma), e che par via de ’n’antica maledission l’è costreta, come le altre, a far finta de èssar ’na strega.
Malco e Silvia i resta così a ciacolar fin al spuntar de l’alba, rendéndose conto de èssar ormai ligà par senpre da ’n amor sensa confini, più forte parfin del confin che separa i so dó mondi cusì distanti e diversi. Al momento de saludarse Silvia la fa ’n anelin, ingropando un fassoleto e la ghe le lassa a Malco come pegno d’amor. Al capitan ghe par de aver sognà, ma ’l fassoletin ingropà che el sera in man el ghe dise che l’è stà tuto vera.
El giorno dopo ne l’acampamento vien dà ’na festa in onor de çerti ambassiatori in visita al conte… imaginarse el stupor de Malco quando tra la gente el vede rivar anca Silvia. I dó i se buta i brassi al col e i scominçia a quèrsarse de basi. La roba però no la passa inosservà: Isabella, da sempre inamorà del capitan, brusando de invidia e de gelosia la va de corsa dal conte a denunciar chel’altra come strega. Riva le guardie, ma Malco el se ghe para davanti, lassàndoghe el tenpo a Silva de sparir nel fiume. El conte Giangaleazzo l’è rabioso parché è stà disobedì a un so preciso ordine, e el decreta che Malco el giorno dopo el vègna giustissià. A sera Isabella la va a çercarlo par domandarghe perdono: la vorìa far qualcosa, ma cosa se pol far? Eco però che riva anca Silvia: e la dise che l’unica maniera che el ga Malco de salvarse l’è andar con ela nel fiume. Così i dó amanti i scapa, inseguidi da le guardie che però le vien fermà da Isabella a ris-cio de la so stessa vita.
Silvia e Malco i salta, tegnéndose par man, e ’n àtimo dopo i è sparì nel fiume Mincio. Nissun da alora l’à più visti. Tempo dopo qualchedun catarà par tera ’na roba tonda: el fassoletin ingropà a anel. Così da quel giorno tute le butele de Veleggio ne i giorni de festa le usa ricrear con la pasta quel fassoletin ingropà: la pasta la ga da èssar fina come seda, e dentro bisogna métarghe un cuciarin de ripien fato con ovo, carne e formajo. Se ghe ciama “tortelin” e farlo l’è ’n’arte! Ma se ghe ciama anca “Nodo d’amor”, e l’è la specialità da Valeggio sul Mincio.
Vissin a Valeggio i Visconti i avéa costruì un ponte. Da brai milanesi oviamente i à volù farlo grande, ma grande veramente: 600 metri de longhessa par 21 de larghessa. A distansa de siesènto ani el ponte ormai l’è un rudere, ma l’è ancora in pié e a vardarlo el fa inpression. Ogni ano, nel terso martedì de giugno, sul ponte se tien la festa del “Nodo d’amore” a ricordo proprio de quela legenda che v’ò ’pena contà. Vien sistemà dó tole longhe come tuto el ponte, con posti a sentar par almanco 3.000 persone. Invitadi i è tuti i abitanti del paese, più ci altri par tenpo s’à prenotà. Oviamente se magna “nodi d’amore”, e le quantità i è da “guinness”: 1.000 botilie de spumante par l’aperitivo, 600.000 tortelini fati a man uno par uno, più 500 kg de grana, 10.000 ovi e 8 quintài de farina par el ripien… e par finir 4.000 botilie de Custoza (belo fresco) par parar zo el tuto. A la fine, foghi artificiali e brente de cafè. Ci-sà se, causa coronavirus, i riussirà a farlo anca st’ano… mi spero de sì. Comunque i tortelini de Valeggio te pol magnarli anca al ristorante, o cromparli e portàrteli a casa. E forsi quando i sentirè ciamar “nodi d’amore” ve vegnarà in mente la legenda che v’ò ’pena contà. Però, più semplicemente, i le ciama cusì solo parché par far de i tortelini così boni ghe vol veramente… tanto, ma tanto amor!

[torna sopra]