|
Editoriale
Tornaremo a la normalità?
’Desso che riva l’istà, la domanda che pi se sente in giro la riguarda el ritorno a la vita de prima che saltesse fora – ‘ncora no se sa da indove – sto bao maledeto che ga la pretesa de farne canbiare vita. Ma me sa propio che indrìo no se torna!
 | | Fin qualche tenpo fà i se godéa cussì: ma st’ano?… |
El bisogno de riavere tante de chele robe che se ghea prima de la pandemia, el xe forte. La speranza de svejarse e provare la sensazion de avere fato solo on bruto sogno, la xe na roba normale. Ma pensare de podere far girare a l’incontrario le raze de l’orolojo, la xe na pura ilusion. Quelo che xe stà, xe stà: se pole solo nare avanti, sperando che le robe de ’desso, le possa almanco somejarghe a quelo che le jera prima de la rinuncia.
Na roba xe certa: la casa che zerchemo de tirare sù oncò, la xe la casa che ga da ’ndarne ben anca doman.
Secondo i esperti, grazie a le vacinazion, sto istà dovarìssimo ciamarse fora da la situazion de i mesi passà. Se l’obietivo del 70% de i vacinati se realizarà, se prevede che a cavalo de l’istà tornaremo a èssare piassè liberi de mòvarse so la strada de na quasi-normalità.
Ma, tornemo a ripètarse: gnente sarà tale e quale a prima: la “normalità”, el passato de ieri no ’l podarà èssare el presente de oncò, par tante rason: la question sanitaria con le varianti del virus, l’economia, el turismo, el lavoro, la situazion de le difarenze sociali, i canbiamenti del clima e de l’anbiente… Tuti quanti problemi seri che ne farà vìvare oncora con mile precauzion: mascarina, distanziamento, rinunce a viagi, piassè atenzion a quelo che se beve e se magna…
Insoma l’istà saràla oncora el periodo de le vacanze? Quasi tuti i “esperti” i dise de sì: le vacanze le se farà anca st’ano ma, come xe facile imaginare, le sarà oncora diverse da quele che jèrimo ’bituà a fare.
In spiaja, ogni onbrelon… 10 m2 (metri quadri); i “kocco-bello” de na volta, deventà “assistenti di spiaggia”, i narà avanti e indrìo a disinfetare letini, sdrajo, onbreloni, sabia, piè e par sbalio) ganbe de i clienti…
Insoma, robe nove, mai viste prima…
In montagna, dove xe belo incontrare altre persone, saludarle e fare dó ciàcoe, pare che le autorità del posto le gabia da colocare cartèi su i sentieri che i deventarà a senso unico, pa inpedire vicinanza e assenbramenti!
Dunque, sognare mari e monti no ne sarà proibìo, ma preparémose a fare i conti con la realtà, parché podemo sognare de navigare per mari mai visti e svejarse de colpo par on becon de sginzala e catarse inveze t’on lago… de sudore!
In teorìa, se co ’l caldo de l’istà, semo stà ’bituà a zercare rimedio, nando in vacanza al sole in riva al mare o al fresco de la montagna, in pratica le limitazion e i inpedimenti oncora necessari i tacarà a provocarne delusion, depression e… sangoe amaro. Parché questo no suceda, bisogna acetare la quasi-normalità.
E ’lora, forse xe mèjo acetare quel che vien, con tuti i “quasi” e tute le difarenze del prima-Covid-19, pensando magari a chi xe blocà in casa, sprofondà ne la pezo solitudine, o a chi che s’à catà a far parte de la categoria de i “nuovi poveri” e no ga gnan’ on sisin par permétarse na vacanza.
Questo ne porta de sicuro on fià de equilibrio te ’l vìvare l’istà 2021.
Se trata de na costatazion pratica, doverosa, concreta e che ne lassa un grande insegnamento: gòdare senpre anca del poco che se ga, contentarse de quelo che se ga adesso, senza rinpianti par le tante robe che semo stà costreti a lassare da parte.
Se xe vèro che “chi se contenta gode”, la sarà istesso na bona istà. Se lo auguremo de tuto cuore!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Veneto vivo
A Cittadella (PD) el novo Museo del Domo
de Lidia Maggiolo
Editoriale
Tornaremo a la normalità?
’Desso che riva l’istà, la domanda che pi se sente in giro la riguarda el ritorno a la vita de prima che saltesse fora – ‘ncora no se sa da indove – sto bao maledeto che ga la pretesa de farne canbiare vita. Ma me sa propio che indrìo no se torna!
de Mario Sileno Klein
Da la Bassa Padovana
Venezia la xe deventà granda anca grazie a le piègore
Con le so dejezion le inescava la formazion del salnitro, base par la pólvare da sparo, e ne le Basse le piègore le passava l’autuno, l’inverno e on tòco de primavera
de Roberto Soliman
Storia visentina
La Bataja de Bressanvido
Xe passà oto secoli da quando se xe scontrà el Comune de Vicensa e Ezelin III da Romano, che chì el ga catà la so palestra de guera.
de Giordano Dellai
|
