Da la Bassa Padovana

Venezia la xe deventà granda anca grazie a le piègore
Con le so dejezion le inescava la formazion del salnitro, base par la pólvare da sparo, e ne le Basse le piègore le passava l’autuno, l’inverno e on tòco de primavera

Quante piègore ga contribuìo a far granda la “Serenissima”.

El tezon de Veronella.

Su i muri in tramontana de le càneve e stale de le vece case abandonà de canpagna, càpita de védare ’na barba griso ciaro, ’na mufa morbida: el xe el salnitro (nitrato di potassio KNO3).
El xe par tre coarti el conponente de la pólvare da sparo (el resto el xe sólfare e pólvare de carbon de legna), che la xe sta inventà in Cina pi de mile ani fà e che pi tardi la xe rivà anca in Europa, verso el 1300. Subito i la usava come medicinale e par fare i foghi artificiài ne le feste, dopo i ga scoperto che la se podéa doparare in guera par sparare co ’l canon.
E anca la Repùblica Veneta la ga montà so le navi tanti canoni e alora ghe xe stà la necessità de produre in gran coantità el salnitro, proprio con l’aiuto de le piègore. I gavéa scoperto che da le dejezion de le piègore, che le inbevéa la tera indove che le dormìa, a se podéa ricavare sto prezioso elemento, cossì la Serenissima la ga fato costruire tante tetoje (tezoni, dal latin tegere = coèrzare) par far dormire gratis sti s-ciapi de dosento piègore a la volta coando che le vegnéa zo da i monti a fine setenbre par pascolare drio a i fossi e a i àrzari de i fiumi de le Basse, gnancora coerte de neve.
Po’ le tranzumava a i monti a fine aprile. I tezoni i xe stà costruìi a Este, Montagnana, Legnago, Cerea, Minerbe, Verona (lì a ghe xe oncora via Tezone). A Thiene a ghe jera fin a ani fà via Salnitro. A Veronella a se intravede el coerto del tezon in te on fabricato dove a ghe xe la “Fattoria Sociale Tezon”. In tuto, ne la teraferma veneta i tezoni i jera 78, ma ghe ne jera anca nel Bergamasco, indove ca ghe jera tanti pastori. El tezon el jera gestìo da on “tezoniere” che el gavéa on contrato de apalto con Venezia co ’l coale el se inpegnava a fornire on tantunque de salnitro ogni ano a on prezo stabilìo e se no ’l rispetava el contrato el pagava penale, però el godéa de tanti privilegi, come la casa da bando par lu, i familiari e i operai, el podéa girare armà e nar tore el salnitro in te le stale private.
Ne i tezoni de le Basse a vegnéa a passare la bruta stajon pastori dal Trentino, da l’Altipiano de Asiago e dal Belunese e coalchedun el se xe stabilìo in pianura. A sto punto a xe giusto ricordare che la tranzumanza la jera de piègore e non de vache come ’desso; le vache le jera indispensabili in pianura par tirare el versoro e el caro. Adiritura i casari de l’Altipiano de Asiago, in dialeto, i ghe ciama oncora ’desso al formajo Asiago, “el Pegorin”.
Có xe cascà la Serenissima, i francesi i ga liberalizà la produzion del salnitro e i tezoni i xe nà in crisi, anca parché l’industria chimica la ga inventà novi esplosivi, fin a rivare a la dinamite, inventà dal sienziato svedese Alfred Nobel.
In te i ultimi zincoant’ani a xe stà inventà altri esplosivi chimici, pi potenti, purtropo usà da i militari e anca da i teroristi. La vecia pólvare da sparo la resta come base par la preparazion de le cartuce par la cacia e par i foghi artificiali da far scopiare a fine de ’na festa; in fondo el xe on ritorno a le origini, e magari se sparasse solo par coelo!

[torna sopra]