Storia visentina

La Bataja de Bressanvido
Xe passà oto secoli da quando se xe scontrà el Comune de Vicensa e Ezelin III da Romano, che chì el ga catà la so palestra de guera.

Ezzelino III da Romano, el “Tiranno”.

Imàgine aerea de l’area ’ndove ’ntel 1221 se xe conbatùa la Bataja de Bressanvido: in fondo a sinistra Poianella, a destra Bressanvido.

Otosento ani fà ghe xe stà la “Bataja de Bressanvido”, conbatùa tra i esèrciti del Comune de Vicensa e i Ezelini ’nte l’area ’ndove tre secoli dopo sarìa nato el paese de Poianella. Assoluto protagonista de sto scontro armà, e po’ del Dosento vèneto e visentin in particolare, xe stà Ezelin III da Romano, ciamà “Tiranno” (1194-1259), fiolo de l’omonimo pare, mensonà “Monaco” par ’vere ’vuo el corajo, poco dopo sta bataja, de ’ndar rento al monastero de S. Spirito de Oliero par finire lì la so vita.
Ezzelino III xe stà donca el primo atore de un scontro armà avegnùo cò ’ncora el ghe coreva drio a le caìce de l’anzian genitore, co la voja mata de darghe na stosada al Comune de Vicensa che gaveva la sfaciatàgine de tratar male i so partigiani pi fedeli.
Na matina de l’ano 1220 o 1221 el futuro “Tiranno”, co la boria de i so vintisié ani, el ga lassà a le spale Bassan, cavalcando co un s-ciapo de fanti e de cavalieri. Dopo èssar ’ndà fin San Piero in Gu, romai in teritorio che considerava nemigo parché vissin a Vicensa, el ga voltà par Bolzan, robando tuto queo che ’l trovava e lassando dadrìo solo fogo e fiame.
I Visentini, savesto queo che gera sucesso, i ga pensà de prepararghe un bel scherseto. El cronista dosentesco visentin de fede ezeliniana, Gerardo Maurisio, scrive che l’esercito comunale se xe piassà tra Bressanvido e Bolzan, ’nte l’area de l’atuale Poianella, co l’obietivo dito ciaro e tondo de mèterghe le man sul zòvane Ezelin, vivo o morto che ’l fusse.
Da chel’altra parte Ezelin stava rivando a Bressanvido, co la boca za predisposta a gustare n’altra vitoria. De boto el se xe fermà, vedendo da lontan le odiate bandiere del Comune. A colpo d’ocio queo che ’l se parava de fronte a lu el gera un esercito grosso tre volte el so poro s-ciapo de òmani. Ghe gera bisogno de tanta forsa e corajo par mètarse a cofronto.
Come scrive Maurisio ’nte la so “Cronica dominorum Ecelini et Alberici fratrum de Romano”, che se pole lèsare in copia anca in Biblioteca Bertoliana a Vicensa, el futuro “Tiranno” ’lora ga ciamà i sui e el ga dito ste parole: “Ringrassiemo el Signore, parché ne ga dà raquanti nemici da bàtare. Ognuno de voaltri ga da èssare scaltro e conbàtere co corajo, parché co l’aiuto del Signore li coparemo o li faremo prigionieri!” E a chi no gavesse gnancora capìo el ga dito anca che chi no gavesse tirà fora anca le buele o fusse ’diritura scapà via, el lo garìa copà lu co le so man.
Co ste premesse, ognun se pole imaginare come che ga dovesto ’ndare la bataja. Inpressionà da un ataco rivà de boto, i Visentini ga dovesto presto alsare bandiera bianca: pareci xe stà quei che ga bagnà co ’l so sangue la tera bressanvidese; altretanti xe scapà verso la vissina Vicensa, spaventà dal bruto muso del da Roman che, come el se xe divertìo a cojonarli Maurisio, “el digrignava i denti e rugiva cofà un leon” par fàrghea fare ’nte le braghe al nemico e tirarghe sù el morale a i sui; altri ’ncora xe ’ndà a inpienare le preson ezeliniane de Bassan.
Dopo sto scontro armà, Ezzelino III no l’è pi tornà a Bressanvido, almanco uficialmente. El paese da tre sècoli gera feudo del monastero de San Felice de Vicenza e questo xe bastà par no zontarlo a la lista de le so propietà visentine.

[torna sopra]