Robe de Ciósa (VE)

’Na Accademia Maccheronica a Ciósa?

"Macaronèa" o "Carmen Macaronicum Patavinisis".

Giacomo Casanova

Teofilo Folengo.

Metemo subito le man avanti: no se trate qua de ilustrare l’enesimo piato a base de macaroni, anche se in parte i macaroni – come vedaremo pi avanti – i à la so parte… Macaronèa o Carmen Macaronicum Patavinisis (= Poesia Macaronica de Padova) no ze nepure ’na spessialità padovana o el termine sientìfico de qualche produssion locale… Se trata de ’na poesia comica in voga nel XV secolo (1488-1489), scrita da un poeta padovan, poesia che s’à ciamà cossì dal titolo de un poema burlesco, òpara de un serto Michele di Bartolomeo degli Odasi alias Tifi degli Odasi.
’Sto poema ze considerà el primo esempio de poesia “macarònica”, scrito per tòre in giro ’na brigata de “macaroni”, un termine questo usà alora per indicare prima “zente stupida e volgare” e po’ dopo la ben nota pasta alimentare. Uno dei prinsipali esponenti de ’sto gènare strambo de poesia ze ’stà ’n altro padovan, “adotivo” stavolta, e cioè Teòfilo Folengo, l’autore del Baldus. Ovio che el titolo de ’sta poesia provien dal termine macaroni, un tipo de pasta ancora in uso e – a quanto pare – particolarmente consumà da i paesani de quel’epoca.
’Sta Macaronèa se ciama cossì perché scrita in un latin grotesco, missià a forme dialetali, in esametri (= poesia de sìe versi) imitando, o mègio storpiando aposta, el stile classico latin. A so tempo la deve aver riscosso un enorme sucesso, se la ze stà ristampà diverse volte, fonte de ispirassion per altre òpare simili. Da ricordare che, diversi ani pi tardi, nel 1517, veniva stampà a Venessia un volumeto in latin macarònico, in versi e prosa, scrito – come za dito – da un serto Merlin Cocai, poeta mantovan, pseudonimo de l’ansideto Teòfilo Folengo (1491-1544), òpara insentrà su la figura de un serto Baldus o Baldo, protagonista de ’n’aventura cavaleresca a similitudine de Rinaldo, el famoso paladin de Francia.
Su la sia del Folengo, ze nate a so tempo de le “Academie macaròniche” formà da “soci” che se divertiva a declamare le proprie composission scrite, apunto, in “latin macarònico”. Anche se pare che ste “academie” le fosse formà invesse da alegri bontemponi, amanti de la bona tola, che i vedeva la poesia “macarònica” come un bon pretesto per trovarse, “consàndola” co abondanti piati de macaroni al sugo…
Una de queste “academie” pare sia esistìa anche a Ciósa nel 1743, stando almanco a quanto à lassà scrito ne le so “Memorie” el fantasioso aventuriero libertin venessian, sedicente cavaliere de Seingalt, Giacomo Casanova (1725-1790), aprodà a Ciósa a i primi de otobre del 1743. Costreto a lassare Venessia per portarse a Roma, a s’à imbarcà su ’na peota, l’à fato tapa a Ciósa, dove i ’à magnà in te ’na tratorìa e po’ dopo a s’à dà a la scoperta de la sità. Entrando in un cafè, l’à incontrà un vecio amigo de i tempi de l’università, che lo à presentà a un colega, titolare de ’na farmacia poco distante, dove se radunava de solito i consoci de ’na pseudo “Accademia Maccheronica” (sempre a deta del Casanova). In ’sta “Accademia”, dove afluiva touts le gens de lettre de la sità, oni membro gera paron de ressitare prose o poesie à sa façon (a suo piacimento e modo), leture alternà da abondanti pique-niques (che no i gera i atuali e frugali pic-nic, ma lauti pransi a base de macaroni): chi divorava pi macaroni gera proclamà su l’istante, anche se a gera persona de passagio (come el Casanova), prìnsipe de l’“Accademia”.
Chi à compagnà a ’sta ipotetica “Accademia” el Casanova? Secondo lu ze stà un serto abate Corsini (cossì a ze ciamà), monaco giacobin, conossùo a Venessia, un poco de bon, che s’à preocupà prima de tuto de spenarlo per ben, tanto da ridurlo al verde… Casanova vien invità a ’na riunion de ’sti “academici” e a onorare l’assemblea lezendo ’na so produssion poetica. El giorno dopo a se vede eleto – dito fato – membro de l’Academia: ansi, dopo aver divorà macaroni e macaroni in gran quantità, tanto da maravegiare tuti i presenti, a se sente proclamà per aclamassion prìnsipe de l’ “Academia Macaronica Ciosota”… El sudeto abate provede dopo a compagnare el sedutore venessian in te ’na bisca, dove de i birbanti, zogadori d’azardo, i lo spene ancora del tuto. Sperando de recuperare i schei persi nel ziogo, Casanova impegna quelo che l’à in te la valisa da viazo: a riotien altri trenta zechini co la certessa de riavere presto quelo che l’à impegnà. E invesse no a riotien un bel gnente e, dopo sinque giorni de permanensa a Ciósa, a ze costreto a lassare la sità co tre camise, calse e fassoleti oltre al solo vestito che l’à indosso… De ’sta “Academia” no se trova nissuna tracia, nissun ricordo al mondo, gnanca a Ciósa: solo le poche righe scrite dal birbante venessian. Per la verità, un ricordo ze restà: ’na sorta de “brindisi” (se cossì se pole ciamarlo) che fa cossì: “Qui bene bibit, bene dormit; qui bene dormit, non peccat; qui non peccat, in paradisum trottolat; ergo rebibamus, et in paradisum trottolabimus.” El che, tradoto pi tardi in un deto venessian, sóna cossì: “Chi ben beve, ben dorme: chi ben dorme, mal no pensa: chi mal no pensa, mal no fa;chi mal no fa, in paradiso va; orben bevé, che in paradiso andaré”…
Forse le “composission macaròniche” de ’sti acadèmici casanoviani, se mai le ghe sarà stae, no le sarà andà pi in là de ’sto brioso brindisi…

[torna sopra]