Da Roma, in diaeto de Este (PD)

Giorgio Trevisan
disegnatore, ilustratore e pitore

Uno de i so primi lavori: l'ilustrazion de la "SPEDIZIONE DEI MILLE"...

Primi studi a matita con ritrati del famoso ranger Tex.

Raconti disegnà ne i ani ’70 per la francese Semic in dó volumi de 562 pagine l’uno.

I so genitori: eu xe de de Rovigo, éa,Alba Ballarini, de Sant'Elena. El nostro Giorgio nasse nel 1934 a Merano, dove el pare fa el segratario comunal. Fin da i primi ani el disegna su qualsiasi carta che ghe vien soto man e, ciapà eà maturità classica, el vorìa afinar sta propension naturàe. Però so pare, che no ga considerassion pa i artisti, eó manda a studiar agraria a Mian.
Semo nel ’57; de maea voja el ga dà qualche esame, ma in testa ghe xe senpre el ciodo fisso del disegno.
Un giorno, spetando na pissa, el tira fora l'inseparàbiee matita e su eà tovajeta de carta el trategia un cavaeo. Un sior vede el disegno e el ghe dimanda se ’l xe un professionista. “Magari" risponde eù. "Disegno par passion, ma so’ qua par studiar agraria."
Sto qua ghe dise che ’l ga de ’a stofa e l’invita al so studio. Giorgio ghe va e el se trova in una casa editrice de fumeti: "Studio Dami". I ghe dà da copiar de ’e vignete. Visto el risultato, el paron lo ciapa a tirocinio. So pare, có ’l vien a saerlo, se inbufaisse e ghe taja i viveri. Giorgio ga da rangiarse. Par fortuna, dopo gnanca un mese, eco el primo laoro retribuìo: disegnare na storia de guera. Da lì taca eà so cariera che ’ncora ’desso, a 86 ani, ne fa el pi longevo ilustrator d'Italia. Nel 1960 el se trasferisse stabilmente a Este. El coeabora co ’l Corriere della Sera, co ’l Corriere dei Piccoli, co ’l Messaggero dei Ragazzi de S. Antonio, e par questo l’ilustra a fumeti ’e vite de i Santi pi rapresentativi del cristianesimo, tanto che nel ’71 el vinse el 1° premio europeo par eà stanpa reigiosa. In seguito el disegnarà par tute ’e case editrici pi inportanti. Ma el laoro che ghe darà fama internassional sarà na serie de episodi a fumeti su Sherlock Holmes, che, tradoti in inglese, vegnarà publicà in tuto el mondo anglosassone. Mi qua, par rason de spassio, ve go fato sóeo un sunto de ’e infinite òpare de sto nostro artista.
Se voì rèndarvene conto, tra i siti che ghe ne parla, digitè: "Giorgio Trevisan, disegnatore, illustratore, pittore" e bravi se rivarè in fondo eà lista de ’e ilustrassion! Po', se ve va, digitè el sito de ’a fioea: "Elisabetta Trevisan pittrice" e vedarì che... bon sangue no mente!

[torna sopra]