|
Editoriale
Salvemo el Creato!
Questo l’ivito che se leva da tuto el mondo par salvare la Tera e le so Creature: xe dal 1° Setenbre del 2006 che viene celebrà la “Giornata per la salvaguardia del Creato”. Sto ano l’iniziativa de “conversione ecologica” la xe nà ’vanti par tuto el mese passà e la dura fin al 4 de Otobre, festa de san Francesco d’Assisi.
 | | Inparemo da la natura a zercare el ben del Creato e de le Creature. |
No credemo che ocora èssare cristiani o catòlici par sentire el bisogno de sèliare de vìvare te na maniera difarente, dove possa stare insieme el vèro, el belo e el bon che riguarda i consumi, i risparmi e i investimenti. Adesso xe pi che urgente el canbiamento de mentalità ne i confronti del Creato: l’omo, le bestie, le piante…
Non a caso, in tanti loghi del nostro “Bel Paese” el mese passà xe stà fate manifestazion de “risanamento e speranza” con vision cristiana par no desmentegarse de l’omo, de l’anbiente e del Creatore, come za sugerìo da l’enciclica Laudato si’ de Papa Francesco.
El tenpo che stemo vivendo xe pien de problemi, contradizion, degrado sociale e anbientale che se zonta a la pandemia de sti ani. El canbiamento del clima, rivà prima del previsto, xe soto i oci de tuti: uragani, tenpeste, aluvion, sicità, persone costrete a scapare, l’aqua da bévare senpre pi scarsa, i ghiaciài che se desfa, el livelo de i mari che se alza, teremoti, vulcani che se sveja, incendi che distruge foreste… I dani de tuto questo i xe senpre pi grandi e disastrosi.
Come in tuti i canbiamenti de mentalità, de abitudini, de lavoro, ghe vole corajo, ma par el nostro ben e par el ben del pianeta, dovemo abandonare certe idèe, acetare rinunce e capire che se trata de na crisi in parte prevista, ma rivà prima de quelo che se pensava.
La storia de l’umanità ne ricorda che questo el xe on periodo de grande prova. Se acetemo de sfojare le pagine del “Vecchio Testamento”, incontremo propio la prova del popolo de Israele che, ne i quarant’ani de passajo da la schiavitù verso la tera promessa, el ga dovù afrontare decision inportanti.
Ghe xe el pericolo de rinpiànzare el passato, de zercare qualche scusa par no canbiare e de no avere fiducia nel futuro. Abandonare el modelo de consumo che gavemo ’desso e che crea difarenze e ingiustizie, no xe facile. De sicuro tuto d’on colpo no se pole, ma on poco a la volta sì. La nova mentalità su economia, lavoro, cultura, salute e anbiente, la ga da deventare na selta de vita.
Femo on confronto: la pandemia de sto momento no la colpisse i popoli ne la stessa misura: in Africa solo l’1% xe stà vacinà. El 90% de i Paesi del mondo no ’l sarà in grado de vacinare gnanca el 10% e i dovarà spetare el 2023 par avere el vacino.
In sto percorso “innovativo” ga da jutarne le organizazion mondiali, i singoli Stati, le aziende, i consumatori, i siori e i poareti, i inprenditori e i lavoratori, le vece e le nove generazion, le diverse religion e… e on poca de bona volontà.
La parola che pi ne pol jutare in sto progeto de rinovamento la xe “insieme”. Solo cussì se passa dal dire al fare e el Laudato si’ pol incontrare la testimonianza de tuti. Quelo che no faremo oncò, dopo ghe vorà tanto tenpo par poderlo fare: guai se ne vegnesse da dire: “ma se ga senpre fato cussì!”
Concludemo osservando che, come san Francesco ga vudo l’incarico de “riparare la casa de la Cesa”, tuti noantri ghemo la responsabilità morale de riparare la “casa comune”.
Forse, se ghe domandemo aiuto diretamente al Creatore, sta volta ghe la femo a salvare el Creato.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Salvemo el Creato!
Questo l’ivito che se leva da tuto el mondo par salvare la Tera e le so Creature: xe dal 1° Setenbre del 2006 che viene celebrà la “Giornata per la salvaguardia del Creato”. Sto ano l’iniziativa de “conversione ecologica” la xe nà ’vanti par tuto el mese passà e la dura fin al 4 de Otobre, festa de san Francesco d’Assisi.
de Mario Sileno Klein
|
