Zente de Padova

Antonio Emo Capodilista

Antonio Emo Capodilista.

Vila Emo Capodilista, dita La Montecchia.

Stavolta parlemo de un omo che se ga interessà poco de politica, ma che xe stà un patriota ligà a ideali italiani.
Antonio Giovanni Carlo Maria Emo Capodilista xe nato a Padova el 30 majo 1837 da antica nobile fameja: i jera conti de l’Impero Austriaco e patrizi veneti. So pare se ciamava Giordano e so mama Elisabetta Vendramini. El jera secondo­genito parché nel 1833 gera nato el primogenito Leonardo. A vint’ani el ga sposà Adrianna Venier da la quale el ga ’vudo un fiolo, Giovanni Leonardo. El ga molà presto i studi par dedicarse a l’aministrassion del notevole patrimonio teriero de fameja. Tuta la Fameja Emo Capodilista gera, par chel tenpo, filo-italiana e quindi anti austriaca, anca se i Asburgo gheva inutilmente nominà la zóvane contessa Adrianna “dama di pa­lazzo” in ocasion de na visita nel zenaro 1857 de l’inperatore Francesco Giu­seppe a Padova. Antonio Emo Capodili­sta nel 1859 el xe emigrà in Piemonte, ciapando la citadinansa sarda e in chela ocasion el xe stà amesso nel Stato Mag­giore del re Vittorio Emanuele II fin a la fine de la guera del 1866. El fradèo Leonardo, che jera restà a Padova, el se ga reso benemerito del Comune parché a la so morte, che xe stà nel 1864, el ga lassà la so colession de quadri, formài da 543 dipinti, che i va dal 1400 al 1700, al Museo Civico, che stava nassendo proprio alora.
Quando Padova xe sta riunìa al Re­gno d’Italia, Antonio xe rientrà in sità e subito el xe stà nominà Maggiore de la Guardia Nassionale che se ga costituìo in chel momento. Nel lulio 1866 el comissa­rio del novo governo, Gioac­chino Napoleone Pe­poli, lo ga ciamà a far parte de la “Con­gregazione Provin­ciale Provvisoria”.
El 14 zenaro 1871 el Consilio Comu­nale de Padova ga aprovà el novo sta­tuto de la “Cassa di Risparmio” e ga formà el Consilio de aministrazion de sto novo ente, elegendo presidente Antonio Emo Capodilista.
El nostro el ga senpre dimostrà un scarso intaresse par i problemi politici, continuando nel so spirito patriotico e umanitario. El xe stà consiliere comu­nale e provinciale, presidente de la Provincia. El xe stà menbro de la depu­tassion provinciale e sindaco de Sac­colongo. El xe stà deputato a Roma par dó legislature e nel 1896 el xe stà no­minà senatore a vita. Ne la so vita ghe se stà riconossudo le onorificense de “Cavaliere dell’Ordine di San Maurizio e Lazzaro” e de “Commendatore de l’Ordine della Corona d’Italia”.
Antonio Emo Capodilista par cultura e par so indole el gera cressùo de idèe conservatrici, el gheva fato parte de l’Unione Liberale. Po’ nel 1876 el gaveva aderìo a “l’Associazione Costituzionale” sen- pre de idèe liberali. Nel 1877, quando “l’Associazione Indipendente” ga tentà de avere la supremazia su la “consorteria” moderata, lu xe entrà ne la lista de sta ultima che jera apogià da i clericali insieme a Gino Cittadella Vigo­darzere, Carlo Maluta e Francesco Pic­coli. Sta ultima la ga ’vudo el sopravento anca par el sostegno del “Giornale di Padova”. El 18 novenbre 1879 Vincenzo Stefano Breda el se ga dimesso da depu­tato del II colegio de Padova par incon­patibilità con la so carica de presidente de la Società Veneta di Costruzioni.
El comitato eletorale ga deciso che gavarìa sucedùo a Breda come candi­dato el nostro Antonio Emo Capodili­sta, in concorensa col candidato de la Associassion Progressista e democra­tica, G. Pacchierotti, medico e garibal­dino. El 4 zenaro 1880 sto qua ga vudo 196 voti contro el nostro Antonio che ga vudo 297 voti. Ma la 13ª° legislatura gera a la fine parché nel majo 1880 xe stà fate le nove elession, che ga vinto i moderati co candidato senpre el nostro Antonio che ga ’vudo 336 voti contro i 72 voti del candidato de la Sinistra, A. Baccarini.
Lasso stare del contarve quelo che ga fato a la Camera senpre in linea co le so idèe liberistiche, ma el xe stà aba­stansa assente a i lavori parlamentari, anca par fati familiari, parché nel 1881 el ga perso la mujere. Ne la sucessiva legislatura no ’l se ga presentà, ma el xe restà nel Consiglio Comunale dove che el xe stà anca assessore fin al 1889. Nal 1895 el xe stà consiliere provinciale e el xe stà Presidente del Consiglio de la Provincia fra el 29 agosto 1899 e el 12 agosto 1900. Dopo el ga rinuncià a la carica parché no ’l jera più in bona sa­lute. Anca in Senato, dove che el xe stà ciamà per censo el 25 otobre 1896, pa la so salute el ga ’vudo na scarsa pre­sensa.
Ne i ultimi ani de la so vita el so inta­resse par la politica, che mai jera stà forte, xe ’ndà sconparendo del tuto. La so preocupassion xe restà la “catte­dra anbulante d’agricoltura”.
El 14 febraro 1912 el xe morto dopo na penosa malatìa a Padova. I so fune­rài i xe stà inponenti e la so salma la xe stà portà a Montecchia.
Omo che ga fato storia, de na fameja molto stimà in sità, e a cui l’Aministras­sion comunale ga dedicà na strada, decidendo de onorarlo cussì.

[torna sopra]