Na fameja granda assè

Otobre, mese de la suca

Suca baruca, ciosota.

Ghe xe anca le suche da ornamento…

E ghe xe i fiori de suca…

Quale mese, se no otobre, par parlare de la suca. In te sto tenpo, sagre e feste regionali par tuti: chi premia la suca pi grossa, chi presenta mile modi de cusinarla e farla gustare; ghe xe anca chi la propone par la festa de Aloi (Halloween), suche sprecà.
Sto gran fruto, colorato e gustoso, fa parte de na gran fameja, le cucurbitacee, ’ndove catemo le suchine, i meloni, i cetrioli, l’anguria e tanti altri tipi de fruti e ortaji che rende senpre pi creativa la nostra cusina italiana. Sta fameja ciapa drento prodoti de grosse dimension e che par èssare coltivà ga bisogno de tereni grandi e ben consài, pieni de sostanze nutritive; le xe piante che ama créssare al sole e xe par questo che chì da nialtri le cresse ben. Ghin’è una che sgara, conossesta da pochi, la se ciama la “Luffa”, che produse na spugna vegetale al 100%, che calchedun ga sercà de valorizare sensa gran sucesso.
Se vardemo la suca come pianta, vedemo che le ga fiori ciassosi, mas-ci e fémene: quei mas-ci i xe boni da fare inpanài e friti, na vera goduria; quei feminìi i xe quei che produse el fruto: suche, sucati, cetrioli…
D’istà el melon e l’anguria, anca lore de la stessa fameja, le xe le principesse par rèndare pi vivìbile el caldo, piene de vitamine e sali minerali, le se magna volentieri: el melon co ’l prossiuto cruo come conpànadego al pranzo, l’anguria, fresca da mastelo, par rinfrescare el pantasso durante el dopopranzo o a la sera, sentài fora in conpagnìa, come sfissio. La suca però la xe la pi atraente dal punto de vista de l’ocio, ghin’è na serie de mile forme e colori come le tante suchete decorative che trovemo d’inverno anca ne le bancarele pa i marcà. In giro pa ’l mondo, svodà da le so semense, i la dòpara come na boracia par béare có i va in canpagna, o par fare el Chimarrò, el tè de mato, che in Brasile i lo beve in conpagnìa come digestivo e tocasana par la vita.
La nostra tradission gastronomica la xe na miniera de piati a base de suca, basta pensare a i risoti, a i tortelini, i gnochi e a le tante ricete che la vien doparà e preparà, al forno o frita.
Na volta chi ’ndava a catare la morosa de sera, se diseva: “Veto magnare la suca?”, propio parché a la sera, ne le case de canpagna la jera considerà come un dolçe e la se magnava in conpagnìa ’pena tirà fora dal forno de la stua co la so crostina dolçe e gustosa, (cussì anca i morosi jera soto i oci del pare e de la mare…). La suca, la xe e la resta na cucurbitacea pressiosa anca dal punto de vista nutritivo, ma la xe anca el centro de tante legende, come par fare la note de Jack-o’-lantem in te i Paesi del nord Europa, quela che ne l’America, al dì de incò la se ciama la note de Halloween che se crede la para via i spiriti maligni par na sbrancà de dolseti. Come par la anguria, par fare na bona sielta, basta bàtarla co la noca del déo par sentire se la dà un rumore sordo; xe ben tignerla in te un posto suto e fresco, ma dopo ’verla scuminsià, xe da métarla in frigo o magnarla a le svelte.
No xe fàssie, ma gnanca difìssile tirar sù in orto calche suca, bisogna stare atenti a la concimassion de la tera. Na volta, in canpagna, i semenava le zuche sul leamaro proprio par la necessità che ga la pianta de concime naturale.
Essendo la suca de grosse dimension e quindi pesante assè, se te la lassi créssare posà par tera come naturalmente la nasse, la podarìa smarsirse e vignere ’tacà da i parassiti, alora xe ben métarghe soto na toleta e tignerla solevà al sicuro de tuto. La sarà madura quando che ’l mànego se ga secà o, fasendo la prova co l’ongia, no se riessirà de sgrafarla parché la crosta la deventa senpre pi dura. A ghin’è de varie forme e gusti: catemo la zuca ciosota, verde e sgropolosa, granda assè; la romana a forma de violin; quela mantovana, tonda e zala, regina de la sagra de Mantova, e tante altre, gran parte doparà par dar da magnare a i mas-ci e ingrassarli par far saladi e parsuti.
Anca le seme de zuca vien doparàe par ronpi-digiuno; na volta i le vendeva rostìe e le se magnava ronpéndole fra i denti e mastegando le mandolete salade bagnàe da qualche bussoloto de grinton. La suca la ga el so momento de gloria ne la storia de “Biancaneve”, quando la fata la trasforma in te na carossa principesca tirà da na dozina de cavài bianchi.
Ghemo dito de le sagre, ghi ne xe tante, sparpajàe par tuta Italia: a Mantova la dura dó o tre mesi; in Toscana se premia le pi grande e grosse; nel Friuli la ricorda la legenda de la suca d’oro de Verzone; a Quero la xe ligà a la festa de Halloween… Xe da ricordare anca i vari modi de dire: “suca baruca”, quando par sbalio se se scontra co la testa; opure “cossa gheto drento te chela suca” quando uno sragiona o no capisse gnente; “andare fora de suca” quando se perde la ragion, se se confonde co gnente o se deventa squasi mati: “te ghè la suca piena de sémola”…, “te si senza sale in suca”… Eco che anca la suca ga el so mondo de inportanza, e par quanto la se daga da magnare a i mas-ci, anca nialtri òmeni se lechemo i bafi có se catemo davanti i manicareti che la ne ofre.

[torna sopra]