Da Lendinara (RO)

La Pina la ga avù na putina

Tuti tirà a balin… par el batezo.

E dopo… tuti a tola… là de fora…

“E bravo, Nane, go sentìo ca to mujer la ga avù na putina; beato ti, mi ca go na voja mata de aver na fémana, son pare de quatro mas-ci!”
“No sta’ tòrtela, Sante, fasì senpre tenpo a fàrghene nantro; te vedarè che la sarà na spissaciona.”
“No, caro. La Tonia la ga dito basta e po’ basta, no la vol savérgane de continuare a far fiòi.”
“Za ca semo sul dito, gavaréssito voja de far da conpare a la me putina?”
“Con piazére, Nane, e quando gavìo deciso de batezarla?”
“Ghemo pensà martì ca vien.”
El più gera stà fato, parchè catare chi ca tira fora de le palanche par le spese de la zena gera tanto difìzile trovarlo. Cussì, méssose in zerca anca de la comare, ca gnente la ga da spendare, Nane l’andava da la Marisa, faséndoghe la stessa dimanda. Ela ghe rispondeva che la jera contenta pure assè e, lu più che sodisfà el tornava a casa, contàndoghe tuto a la Pina.
“Tuto a posto, cara, diman vago dal pàroco e dal sagrestan a métarme d’acordo: el sarà un bel batezo.”
Rivava el martì e Nane, Sante, Marisa, Cesira la levatrice, e la Giselda co in brazo la putina, tuti tirà a balin, i se trovava inte la cesa de i Santi Piero e Paolo, che co el pàroco e sagrestan i se dava da fare par benedire in pressia sto pìcolo fagotin che ’l fifotava. Finìe prediche e lavade de testa, i andava in canonica a scrìvare la putina, che da ’desso la vien ciamà Roseta, intel libro de i nati e batezà e, dopo averghe dà al prete sessanta centesimi e raquante palanche al sagrestan, i lassava la cesa par andare in ostarìa.
Gera de dopodisnà e un leziero venteselo portava l’odore de i canpi, de erba ’pena tajà e de loàme de le boarìe ca se trovava intornovìa. El paese dove viveva sta zente gera pìcolo, un paese de canpagna, dove poco o gnente capitava, se non da San Piero e Paolo, quando tuti i andava a la procession. Ma dopo in piaza, davanti a la cesa se faseva festa, e alora la cucagna la se inpeniva de putèi, chi su par el palo a ciapare un salameto e chi zo a vardare se se podeva ociare qualche putelota o puteloto, par portàrselo più tardi al balo. A spetarli sti ultimi, ghe gera de solito Zelindo co la fisarmonica, bon toso, che co ’l so soriso contentava tuti fin a note tarda, sonando le più bele ande de quel tenpo. La pista da balo la gera in banda a l’ostarìa, soto a na giavascara de àlbari che dava frescura al piciare del sole infogà che stava lì fin a tarda sera, calando dedrìo a i Coli Euganei.
Chel dopodisnà l’ostarìa la gera squasi voda e i nostri amizi i se gaveva sistemà su la tola messa de fora là soto le piante, dove sbingolava da i rami raquante lanpadine colorà. Rivava l’oste co i piloni de vin, rosso e bianco, e so mojere la inasiava i piati co un bon brodin de polastro, da far sgrondare da la calura. Cussì spariva dal colo de i òmani le cravate e le done le restava in bluseta. La Roseta taseva, la dormiva contenta anche se la conpagnìa la se gera dà a ingalossarse. I goti ciamava el cheno e i piloni i se svodava. Intanto rivava el secondo piato de ’rosto profumà de erbe romàtiche che tirava l’ocio e l’aqueta in boca, e alora la Marisa ghe vegneva la mala idea de far un eviva a la Roseta che, sentendo tuto sto bacan, la saveva svejà, meténdose a zigare desperà.
“Ma la dormiva cussì ben, cossa te xe saltà in mente de farghe eviva?” ga dito la levatrice.
“Poarina la xe la so festa e mi go volesto che la veda quelo ca stemo fasendo per ela.”
“Ben, visto che te la ga svejà, ’desso te la ciapi sù e te la indormenzi de novo!”
“Dàmela a mi” diseva la Giselda che la faseva da balia, “xe passà za tre ore e la garà fame.”
Cussì dopo na bela popada la Roseta la tornava a dormire.
Passava le ore ca gera note e, na feta de luna spledeva in celo.
“Bela festa” diseva Nane, “ghemo magnà e bevù ben, tuto a onore de la me putina e de me mujere che, poareta, la xe a ca che la ne speta, cossa dito Sante?”
Lu, tirando fora dal tacuìn la parte de schei ca ghe spetava de pagare, ga risposto de sì, ca ’l gera contento e l’invitava Nane, un poco sù de giri, che ’l tirasse fora anca la so parte de schei, come da pati fati in precedenza. Dopo tuti insieme i lassava l’ostarìa, portàndose a ca de la Pina che aspetava so fiola, da tanto tenpo inte le man de quatro ciochi. E, quando i xe rivà a cao del leto de la mama, la Marisa ga messo in banda la so Roseta, daséndoghe un basin a la Pina, intanto che el conpare strucàndoghe la man ghe faseva tanti auguri par ela e la so putina:
“Che la cressa ben e la sia felisse!”
Raquante palanche la Giselda se meteva in scasela, ringraziando Nane e la Pina:
“E ve auguro bona note.”
No restava che conpagnare a ca comare e levatrice, l’ora gera tarda. Nane e Sante dopo aver fato el so dovere i tornava a le so famje.
“Ciò, Nane, te pare anca ti che la luna stasera la sia dopia?”
“Làssame vardare! No sò. Da che parte xela?”

[torna sopra]