Editoriale

Tachemo co ’l 40° ano de vita!
Co’ l’entusiasmo de senpre verzemo l’Ano Novo dopo ’ver conpìo 39 ani e dopo aver ricevù on riconossimento, a livelo nazionale, par l’inpegno messo ne la difesa de la nostra “lingua locale”. Cussì cresse la responsabilità par el nostro dialeto o “lingua veneta”.

Da sin., Consigliere Unpli Veneto, R. Furlan, G. Vaccari, L. Beltrame, A. Girlanda, Presidente UNPLI, A. La Spina, L. Gatti e N. Poggese.

Na parte de i partecipanti ne la Protomoteca del Campidoglio.

Na bela sodisfazion el regalo ricevù da Quatro Ciàcoe par el so conpleano che casca senpre te ’l mese de dissenbre. In sto tenpo de pandemia che ga condizionà e canbià i nostri raporti co i altri, a partire dal darse la man, on baso o on abracio par saludarse; par no parlare de l’incontro tra amici colaboratori Q.C., come quelo che jèrimo ’bituà de fare ogni ano a l’8 de dissenbre.
Propio davanti a tuti sti ostacoli xe deventà ’ncora pi inportante la forza del dialeto (anzi de i dialeti!) che ne fa “sentire a casa” e che trasmete emozion, inpiza ricordi, rispólvara tradizion e ne fa rivìvare momenti del nostro passato.
Solo el dialeto, infati, se porta drio el senso de identità e el rapresenta on patrimonio “immateriale” da salvare e tegnere ben in vista, riconossù anca da l’Unesco.
Co ste finalità l’UNPLI, che mete insieme tute le Pro Loco d’Italia, da ben nove ani l’organiza el Premio letterario nazionale “SALVA LA TUA LINGUA LOCALE”.
Quatro Ciàcoe la ga catà pan pa i so denti, partecipando al concorso e da na qualificata Giuria la ga ’vù la MENZIONE SPECIALE, parché “speciale” xe el so contributo nel “salvaguardare” le “lingue locali” del Veneto.
E insieme a la rivista, el 6 de dissenbre passà, ne la Sala Protomoteca del Campidoglio a Roma, xe stà presenti e premià on saco de veneti, conpresi nostri abonati: Giuseppe Vaccari (VR), Pier Franco Uliana (TV), Pier Giorgio Fontana (PD), Nerina Poggese (VR), Agnese Girlanda (VR), Luciana Gatti (VR), Pierino Lancerotto (VR), Lucia Beltrame Menini (Alfiere Q.C.).
Eco alora che, a sto punto, come persone e come rivista, sentemo l’obligo morale de ringraziare tuti quei che in sto ultimo ano i ga tirà el careto, a scuminziare, prima de tuti da:
– ARTE STAMPA de i Fradèi Corradin che ga el corajo de nare ’vanti e i continua a stanpare la rivista, anca se manca el sostegno de la publicità, dàndone la possibilità de publicare i nostri scriti; qua podemo anca fare de i nomi, parché i se senta gratificà anca lori: oltre a i titolari Ettore, Lidovino, Giorgia e Enrico, disemo anca che ghe xe chi inpasta e tira la sfoja de Quatro Ciàcoe: Fiorenza, Antonella, Chiara, Gianluca, Jonny, Simone, Maurizio, Luca, Daniele;
– ghe disemo grazie a tuti i nostri colaboratori che, co i so articoli, i continua a tegner vivo l’amore de le nostre raise e del nostro presente;
– po’ ringraziemo i nostri letori ch’i ga la pazienza, mese dopo mese, de spetare che el postin el se decida de tor sù la rivista e el ghe la porta a casa sua.
A sto punto, disemo che se sentemo orgoliosi de continuare a arare a fondo el canpo del nostro tenpo, somenando tradizioni e cultura veneta, a riprova che el nostro dialeto veneto el xe vivo e oncora bon de farne rumare e scalumare usi, costumi e ricordi, oltre che farne parlare de robe che càpita al giorno d’ancò.
Da questo nasse la nostra responsabilità ne l’onorare la “nostra lingua locale, continuando a darghe dignità e valore, magari zontàndoghe on poca de speranza, parché la vita de oncò la ghe ne ga tanto de bisogno.
Questo xe l’augurio che se femo de vero cuore!

[torna sopra]