Le Feste continua

Cossa fémoi par la Befana?

La sfida continua in Canal Grando…

La Befana… a Sappada Vecia.

Dopo Nadale e ’l Novo Ano, la festa de la Befana ne regala un ultimo fine setimana de festa, fra dolçi, Befane e tanta scaramansìa par el novo ano.
Da l’Alta Italia fin zo a la Sicilia, feste a no finire, dapartuto giornate speciali co la Befana par protagonista che animarà le piasse, dispensando dolçi, carbon e caramele. Co ’l dì de la Befana se sara le Feste de Nadale e la xe l’ultima ocasion de far festa prima de tornare a scola e al laoro: eco infati el dito: “l’Epifania tute le feste porta via”.
Come disévimo sora, par sta festa tante xe le manifestassion in ogni sità e paese, ogni piassa se movimenta co alegrìa e vece tradission par festejare la Befana e l’arivo de i Re Magi, anca lori par portare ciuci, dolsi e anca regaleti vari par chi xe stà bon e bravo.
La festa de la Befana la ga inissio ne i ani antichi, vece tradission pagane; infati la festa jera ligà a credenze agrarie par sperare che la tera vardasse co’ bon ocio la zente e la dasesse un bon racolto. Anca qua la Cesa condana le vece credense e l’Epifania se trasforma in un rito contro le strighe: vigneva inpissà un gran fogon e fato brusare un pajasso che voleva somejarghe a na vecia strigona. Sto ano, el 6 de genaro el casca de zoba, proprio a metà setimana, na ocasion unica par far festa e profitare par torse na ultima setimana de vacanza pa ’ndare in montagna (na setimana bianca) o viajare par gustarse o scoprire le tradission in giro par el nostro stivale.
Manifestassion religiose: Presepi viventi par ogni angolo, spece ne i paesi fora sità, organizà da grupi folcloristici, pa’ ricordare la nàssita del Banbinelo e l’arivo de i Magi a la capana, e manifestassion çivili, par far trovare la zente e vìvare un momento de comunità.
Senpre ne la note tra el 5 e ’l 6 de genaro, in provincia de Treviso se ricorda la festa del “Panevin”, dove raquanti foghi, se dize pi de 200, vien inpissài in giro par le canpagne poco prima de mezanote. Ne l’antichità el jera un rito par farse boni i spiriti de la canpagna e augurarse racolti abondanti durante tuto l’ano e a seconda de ’ndove girava le favile se prevedeva l’andamento de l’ano ’pena scuminsià. ’Desso tuto questo xe conpagnà da cante, bali e tanto vin brulè come i sa farlo i trevisani. La podarìa èssare na ocasion bona par visitare Treviso, na tera piena de posti misteriosi e pieni de fate e fantasmi.
A Venessia invense, la Befana la riva logicamente dal mare. In chel dì la festa xe ricordà con la regata de la Befana, na sfida de canotagio co i personaji in costume: Befane, Befani e Babi Nadài i fa la gara par ciaparse el premio, remando longo el Canal Grando. La gara la parte da la fermata de San Tomà, da rente el Palasso Balbi, par finire al Ponte de Rialto. Par chel’ocasion calchedun de i soci del canotajo, sielti fra i pi zóvini e i veci pi famosi, travestìi da Befane e Babi Nadale, i se sfida vogando nel Canal Grande. Anca questa la sarìa na bona ocasion pa’ ’ndare a Venessia a fare quatro passi par cali e ponti e bévarse na bona ciocolata calda al bar de l’amicissia.
Restando da le nostre parte, a Verona par esenpio, el 6 de genaro ghe xe l’apuntamento co ’l Brucialavecia: la festa la taca a la matina co la Befana del Vigile, na tradizion nata ne i ani del dopoguera, andove na sinquantina de màchine e moto d’epoca sfilarà par i mèjo posti de Verona pa’ rivare a Piassa Bra dove, a spetarli, ghe sarà un vigile sora a na vecia pedana da dove i dirigeva el tràfico in chei ani passài. Rivài qua, i partecipanti a la sfilata, metarà ’torno a la pedana de i regali, panetoni, botilie de vin e altre articoli che dopo vegnarà portà in case-fameja e altri posti par beneficenza. Ma no finisse tuto qua, parché la festa continua co ’l brusare la Vecia, un gran fantocio al centro de la piassa co un gran spetàcolo de foghi artificiài.
Restando tacà de casa, a Rovigo, grassie al Comitato Polisportiva, el dì prima vien verta la caseta de la Befana dove i putèi i portarà la leterina e, chela stessa sera, i podarà ’ndarse tore i dolseti e el regaleto che i desiderava. El dì dopo, a le 3 e meza del dopopranso, zoghi e divertimenti par finire a l’inbrunire co ’l “brusavecia” e, anca qua, ciocolata calda, pop-corn, tè e vin brulè par tuti. Ne i paesi ’torno sfilata de i presepi co l’arivo de i Re Magi, la Befana riva tra le bancarele de i mercatini, cori e premiassion de i presepi pi bei. Spetando l’inmancàbile Brusavecia se se pol consolare co ’l vin brulè, ciocolata calda e ogni altro bendedìo.
A Belun e ne i paeseti de montagna: presepi, mercatini de Nadale, concerti, foghi artificiài; anca qua, spetando el tradissionale fogo de la catasta de legna, se se scalda ’torno a i sòchi de legna, bevendo vin brulè; la sera prima la “Caspbefana”, na caminada soto le stele, se no nèvega. A Pedavena se fa la corsa de la Befana e in alta montagna, su le piste, la tradissionale Fiacolata co i maestri de le scole de sìi. A Sappada Vecia, invesse, se pol gustare na sinquantina de presepi fati da i paesani ne i angoli pi carateristici e stranbi.
Qua da nialtri, a Padova, in Prà de la Vale, la piaza pi granda d’Italia, l’incontro co la Befana e la distribussion de le calzete al dopopranzo pa’ finire a l’inbrunire quando se inpissa el gran falò ”Brusa la Vecia”. Anca qua, in giro par i paesi, i Presepi viventi, mercatini vari, dolseti par tuti e, par farla conpleta, l’inmancàbile falò soto la vecia. Come se vede, solo qua da nialtri, tuti se dà da fare par sta ricorenza, ma se pensemo cossa che capita in giro par l’Italia, podarìssimo scrìvare naltre vinti pagine, quele che xe le region, parché ogni dove, eventi e vece tradission ghin’è par tuti i gusti.

[torna sopra]