Da Vigonza (PD)

Emigrassion de na volta

La fameja numerosa de Alessandro Breda, có la xe partìa par emigrare in Francia.

Alberto Breda, l’ultimo de la coà, nato te ’l 1951, a man de mama Assunta.

Alberto Breda, deventà pi grandeto, insieme con so mama Assunta e popà Alessandro.

La xe senpre stà na condission difìssile da controlare, sia par l’emigrante, costreto a espatriare par miseria o altre dificolta, sia par el Paese “ospitante” che gavéa l’òbligo de tegnere soto controlo el fenomeno uman e sociale.
Coalche mese fà me son catà con dó me cugini: Alberto e la Elda so mojere, nati in Francia e tuti dó fiòi de emigrati, che i xe vegnùi a catare parenti e amissi a Bosco de Rubano (PD) par Alberto, e a Villafranca Padovana e Piazzola sul Brenta par la Elda.
Con Alberto semo nà in discorso su come so popà da Bosco el xe nà in Francia. El me ga contà na storia che sicuramente, par tante rason, la sarà stà simile a quela de tanti altri emigrati de chei tenpi.
Finìa la Seconda Guera Mondiàe (1940-45), l’Italia e i italiani i se ga catà in condissin pietose, tiràe a l’osso, fra distrussion, miseria, disocupassion: mancava tuto. L’unica roba abondante ne le fameje jera la fame: ghe ne jera senpre tanta!
Alessandro Breda (popà de Alberto), par sercare de ciapare coalche palanca in pi de coelo che se ciapava qua te ’l Veneto, el xe partìo par el Belgio, par lavorare so na miniera de carbon, lassando da sola la mojere Assunta a tegnere in piè la baraca e starghe drio a i fiòi Rita, Anna, Antonio, Egidio e Mario, tuti ’ncora in vareso. La vita in miniera la jera tremenda, i vegnéa tratà coasi come schiavi: orari de lavoro disumani, nessuna precaussion par la salute, insoma na vita infame.
Dopo coalche ano no ’l ghe la ga pi fata e el xe tornà casa, ma el ga suìto fato domanda de ’ndare in Francia, dove se naséa solo co on contrato de laoro. Finalmente, dopo poco tenpo, xe rivà el contrato par nare a fare el contadin soto paron. Sta volta el xe partìo da Bosco con tuta la fameja numerosa e… come “samartin”, el se ga portà drio on armaron e na valisa de strasse.
Come ch’i xe rivà in Francia, a Les Baccarets, te la region de Tolosa, i xe stà suìto rancurài dal Servissio Emigrassion, ghe xe stà dà na casa e poche regole de conportamento con la racomandassion che, se i gavesse ’vudo coalche problema, de no parlare co nessun e de rivòlgiarse diretamente al Servissio; de no farghe coalche mancansa a i paroni e de no ’vere beghe co la Giustissia. Se no vegneva rispetà ste regole, come ch’ì jera rivài, i sarìa stà manda casa.
’Torno a sta gran canpagna, dove i jera nà a stare, ghe jera coasi tuti italiani, par la magioransa veneti: praticamente i se sentiva come s’i fusse stà in Italia.
Alberto, ultimo de i fradèi Breda, el xe nato nel 1951. Da boceta no ’l xe mai nà a l’asilo; so papà e so mama no i ga mai inparà a parlare in francese: i ghe parlava solo in dialeto padovan. I problemi pa ’l toseto i ga tacà coando che ’l ga scomissia a nare a scola: la lingua francese jera la prima volta che ’l la sentiva. I so conpagni de scola (i putèi i xe tremendi có i se mete!) i lo toléa in giro, diséndoghe: “Talian, magna subioti” e ogni altra menda par farlo criare. Có ’l rivava casa disperà, el se sfogava co so popà e so mama, che i sercava in coalche modo de consolarlo. I fradèi ghe diseva: “Difèndete! Dighe anca ti: – magna patate, magna fasòi”, ma no ghe jera verso de calmarlo. Dopo coalche ano el ga inparà la lingua e le robe le se ga messe a posto.
’Desso Alberto, la mojere Elda e i fiòi Carol e Stefan i xe francesi a tuti i efeti.
A Alberto, però, na raisa de veneto la ghe xe restà, forse tramandà da so popà e so mama, che i xe restà veneti fin a la fine.
Có zuga la Nazionale Italiana de calcio contro la Francia, lu tifa par l’Italia!
Me nasse on dubio: che ’l lo fassa par vendicarse de i conpagni de scola che i lo cojonava có ’l jera putelo? Mah! Ghe lo domandarò.

[torna sopra]