|
Editoriale
Li ciamemo “clandestini”…
El problema de i imigrati inte ’l nostro Paese el xe come i scaravazi de aqua che xe drio destrùsare anca la nostra bela Italia. Se trata de on problema talmente ingrejà che, par desgatejarlo, podemo provare a no ciamarli pi “clandestini”, ma “migranti irregolari”.
 | | Eco na scaretà de quei che la stanpa ciama “clandestini”. |
“Clandestin” xe chi entra in te on Paese, violando la lege su l’emigrazion, ma soratuto chi lo fa descondon, “di nascosto”, recita i vocabolari de la nostra lingua italiana. Se vardemo ben, la pi parte de sti poricristi i scapa da la fame, da la guera e dal bisogno de on laoro umano... No i xe fantasmi che, partendo, metemo, da la Libia i deventa visibili solo a Lampedusa, Pantelleria, Linosa, Augusta, Vibo Valentia, Porto Empedocle... No i se sconde quando che i parte, no i se sconde quando i patisse le pene de l’inferno so le carete del mare, e no i se sconde quando i domanda aqua e na coerta a chi ghe va in aiuto. I sconpare, come i fantasmi, solo quando i finisse in fondo al Mediteraneo!
La polemica su la “sicurezza”, parché tra i i tanti riva anca pi de qualche delinquente, ga fato discùtare se mandarli indrìo opure no; xe stà zercà de fermarli a la partenza, ma no vien rispetà nessun acordo da i Paesi de indo’ che i parte. Ormai se trata de on fiume umano che score a la luce del sole. Se parla de “tsunami”, de “ondata migratoria” de “esodo biblico”.
I ultimi dati uficiali so ’l nùmaro de i migranti rivà in Italia dal 1° genaro al 15 novenbre 2021 xe de 59.260 contro i 32.228 del stesso periodo nel 2020 e contro i 9.994 del 2019. E par i dispersi (morti) in mare se parla de 1.146 da genaro a giugno 2021. La pandemia ga fato de sicuro aumentare la pression migratoria e anca zercare de fare i viaji pi curti rispeto a prima.
Ghè chi dise che xe disumano fermare sta imigrazion da i Paesi africani verso l’Italia; ghè chi vede che da soli no ghe la faremo mai, parché dal momento ch’i xe qua, bisogna curarli e istruirli: cussì no i xe pi “clandestini”.
Ma, anca, noantri no semo mia la Mèrica del zio Tom... che, se po’ te te mali in Mèrica, i te buta fora da l’ospedale in pigiama, se la te va ben!
La Cesa insegna che i xe tuti nostri fradèi e che xe on delito no vèrzare le nostre case e no spartire i nostri beni. Ma… no xe mia solo colpa nostra se stemo vivendo on cristianesimo difarente assè da quelo fato nàssare da Cristo. Non par gnente Papa Francesco el se dana l’anima par canbiare la Cesa.
Nel nostro pìcolo, calcossa dovemo pur fare anca noantri, pur vedendo che el problema xe pi grande de le nostre bone intenzion. Par afrontare sto “esodo” senza fine, ocore jutarli so i Paesi da dove i scapa sti pori disgrazià, e dove la libertà costa pi del vìvare.
Anca parché se sa che “ai bordi” del Sahara ghe xe almanco 20 milioni de disperà pronti a scapare da la fame, da le guere, da le malatìe, da l’ignoranza, par rivare a le coste italiane o europèe. Tanto, par sta pora gente, che difarenza fa morire so la sabia o morire in mare?
Da qualche parte viene giustamente fato rilevare che so le nostre spale xe precipità el peso de la storia: i canbiamenti politici, i falimenti de i governi, le ditature che xe vegnù fora, i ga finìo par scaricare le conseguenze su Paesi come i nostri, dove in qualche modo se pole parlare de libertà e democrazia.
Eco parcossa el bon senso ne dise che dovarìssimo ciamarli “persone” o “migranti” quei che inveze ciamemo “clandestini”, come s’i fusse tuti delinquenti, par el fato che i vien qua senza carte, senza documenti. Anca le parole ga el so peso!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Li ciamemo “clandestini”…
El problema de i imigrati inte ’l nostro Paese el xe come i scaravazi de aqua che xe drio destrùsare anca la nostra bela Italia. Se trata de on problema talmente ingrejà che, par desgatejarlo, podemo provare a no ciamarli pi “clandestini”, ma “migranti irregolari”.
de Mario Sileno Klein
|
