Da Venezia

I cavài de Venessia

I cavài originài, restaurài e portài dentro ’a Basìica de San Marco.

I cavài in bea mostra su ’a terassa in faciata de ’a Basìica de San Marco, ciamài anca ’a “Quadriga”. (foto A. Mondin)

El doge Enrico Dandolo.

I paroni de na sèna teatràe granda e magica.

Ne ’a prima Venessia i cavài i coreva par i canpi e par ’e cae de ’a cità, a volte anca tirando carosse e fasendo anca incidenti co morti e ferìi.
Ma qua no se parlarà de sti cavài, se contarà invesse de i quatro cavài più bei, forti e misteriosi de sta cità che anca ’desso i trovemo in bea mostra su ’a terassa in faciata de ’a Basìica de San Marco, ciamài anca ’a “Quadriga”.
I ze na opera beìssima de l’antichità che ze stada portada da i crociati come botin de guera da l’ipodromo de Costantinopoli e i ze fusi in bronzo dorà, i par vivi anca se i ze stai fati nel IV sècoeo prima de Cristo, come che dise na datassion dada da i storici.
Sti cavài incredìbii i ze stai par sècoi un sìnboeo de Venessia, e considerài cussì anca fora da ’a Serenissima parché quando che Genova nel Tresento ga tentà de entrar a Venessia co ’a guera de Ciosa, el comandante de ’a flota genovese, Pietro Doria, che el se sentiva sicuro de vìnsare, ’l gaveva mandà a dir a i venessiani che presto el ghe gavarìa messo el cavesso a i quatro cavài, fato che par ’a forsa de ’a Marina de Venessia e co ’a protession de ’e aque basse de ’a laguna no se ga averà e chi che ga perso chea guera ze stai proprio i genovesi.
I cavài originài, nel 1980, i ze stai restaurài e portài dentro ’a Basìica de San Marco, più proteti da i maeani de star fora, e sostituìi da quei che vedemo ’desso in na copia ben riussìa, tanto che chi che no varda quei dentro no i se acorse de gnente.
Ma oltre l’opera d’arte, ste bestie che mi me piase ciamar sacre, par ’a so storia sconta, par ’a beessa inpagàbie, ’a me fa créder che de note, in qualche note stregada co vento e piova i vóea sora ’a cità fantastica, dove tuto o quasi par ireàe, sconto.
Come contà ne i me raconti prima de questo, a Venessia ghe ze un numero grando de bestie de piera, ma de metàeo che par oro co el coeor de i sècoi come ga sti cavài no ghe ne ze, e par questo i par come i paroni de na sèna teatràe granda e magica.
I cavài protege ’a Basìica e i venessiani, e nialtri dovemo ricanbiarghe ’a protession, ricordàndoi ogni volta che podemo par farli imortài.
Un particoeare de ’a conposission co ’a quae i ze stai fusi el me ga fato alsar ’e rece.
El rame el ze el metàeo che in gran parte conpone ’e bestie, questo vol dir che el grado de fusion el ze ’torno i 1300 gradi, e el ze stà selto anca parché el dà na doratura inportante insieme al mercurio.
Co ’a nostra fantasia podemo scrìvar tante robe su sti particoeari. Mi, par esenpio, penso che, visto el grado de fusion, i cavài i gabia fato un pato co ’l fogo e co ’l mercurio anca, sia in riferimento al pianeta che gira intorno al sol e che el ze el più vissin, sia al elemento chimico liquido.
Basta sóeo questo par far nassar na legenda scrita da nialtri.
’E misure de ’a “Quadriga” ’a ze metri 2,80 de altessa, sentimetri 131 al garese, e longhi metri 2,52, peso totàe quintai nove.
Na meravegia da scoprir riflesso par riflesso, tòco par tòco dentro ’a Basìica, cavalcando ne i pensieri sora ’a cità de San Marco sensa paura de gnente.
E come tante volte no ghe dedichemo massa tenpo nel vardarli parché dovemo scanpar, córar via par ’ndar a védar calcossa altro ne l’infinità de pressiose robe da scoprir.
Quando el doge Enrico Dandolo el ga fato portar ’e statue equestri in Patria, el ga conpìo un rito su l’altar stesso de San Marco, consacrando i cavài a la grandessa de Venessia.
El perfido Napoleone, sconfita Venessia, li ga portài a Parigi, ma da là i cavài i ze ritornài su ’a terassa de ’a Basìica par restarghe.
Massa bei par cità tute conpagne, qua i se trova ben, rari in mezo a altre rarità che sóeo qua se trova.
Fermarse a vardarli te par che i te punta i oci ’dosso, che i te senta e che i sia i cavài che pol portarte su ’a Luna a vardar sta laguna popoeada da bestie de ogni parte del mondo, da àngei de piera, góndoe eleganti, storie de mari vissini e distanti, quando ’e vèe venessiane ’e sventoeava parone de i mari.

[torna sopra]