“La Sguaratà” - Ciàcole adriote

Braghe lunghe

Da fiòi, na volta, istà e inverno, se portava le braghe curte ca lassava respirare, co ’l caldo, ma ca inversigava, d’inverno, le ganbe, segnando de rosso la pèle e ciamando, a gran voce, pomate e unguenti.
Ma tanto valeva, i fiòi doveva créssere e le braghe curte stabiliva anca la so statura. Quando ca se rivava avanti, per dire su i dódese o trèdese ani, rivava le braghe lunghe ca te faseva sentire “omo”, dàndote inportansa fra i amici e ofréndote anca el tenpo de butare ocià in giro a le fiole ca se vestiva da donete. Le gera tape d’òbligo che el tenpo l’à canbià, segnando altre strade. Ogni selta gaveva, da resto, la so ragion e “braghe curte” diseva a i fiòi de no alsare tanto la cresta fin che no i gavesse più giudissio dentro la suca ca li metesse in grado de capire mèio le robe e intervegnere a ragion giusta e a tenpo debito in fameia.
Ancuò i ani à sugerì de covèrzerse mèio d’inverno perché, fiòi o no fiòi, el fredo ca punze el fa buso e chel fià de caldo ca porta le braghe lunghe el sparagna anca da serte influense invernali e altro.
Da resto, co ’l canbiare de i tenpi, ancuò se vede, d’istà, braghe curte a no finire sia in òmeni che in done, sia al mare o in montagna e anca in cità.
Na volta na dona in braghe curte la saria stà bolà come na “poco de bon” e poco rispetosa del pudore perché la mostrava “le vergogne”. Ancuò no ga nessun limite gnanca le braghe curte che le lassa, d’istà, respirare e ciapare anca la so bela tinta da sole sensa andare, per chi no pole, fora cità. Ghè, peraltro, chi ga el senso del limite anca in armonia co i tenpi e chi no lo conosse, metendo in mostra “ciape bele” e “ciape istrenì” e, qua, ghe vorìa almanco na vardà al specio prima de vegner fora de casa perché, se sa, le robe bele contenta l’ocio e le piase a tuti, ma quele brute le faseva ingossa na volta e le lo fa anca adesso.

[torna sopra]