| de Vittorio Ingegneri-Dinerio |
|
Le storie de Dinerio
El galeto de la Imelda
 | | Cargà ’e patine, i s’à messo in andare co ’l samartin. |
− Sìo qua anca vu, Tarcisio, drio spetar el sindaco? Cossa ve xe capità? Gavìo qualche rogna da denunsiare come mi?
– Anca massa, Gaudensio! Co quei po’ sengiari che su i coli fa disastri, sto ano gavemo vendemà solo graspaje, parché eà ua de i nostri vegnài pi bassi ’e se eà ga ciucià tute quee bestiasse maledìe. E vu che briga gavìo da reclamare qua in munissipio?
− Ah, noaltri vilani malcunà de tuta eà Val Nogaredo semo a eà desperassion par eà stessa rason! Ne xe capità un rebalton ancora pi pèso del vostro: oltre a becolare i granèi de ùa, sti salvàdeghi delubiài se ga rosegà parfìn ’e vegne e i pali de ’e pèrgole. Siché oltre a èssare restà sensa del racolto, st’inverno dovaremo gratarse in scarsela par piantare visele nove. Co’ sti ciari de luna, inturbiài dal bisogno, eà gavemo ciapà propio tel gomio, par no dire tra ’e ciape del bero. A dire eà verità se gavemo roto i baguoti de poàre ’e vegne, ponpare verderame, supiare sólfaro contro eà pronòspara e i bissi de tute ’e rasse par po’ sunare pànpani. Speremo che el Comune ne vègna incontro co’ qualche benefissio pùblico, sinò semo propio a eà carità.
– Stando a ste lagne, xe un problema serio quelo de i cinghiali par eà zente che coltiva i canpi in quée zone colinose: sito d’acordo barba?
– Da sen, fiosso, i sengiari xe bestie ca magna de tuto, gnonde ch’i pàscola i conbina un desìo. Qua ultimamente sti bosgati salvàdeghi ga pesorà eà situassion parché i se inrassa pi de i coneji. Te credo che quée pore fameje ’e sia a eà desperassion. Me contava me pare, on omo descantà e ’tento a tuto, che có i gavéa eà desperassion in scarséa, Modesto Salvan, un fituale tacà a noaltri, el se ghea ’pena cronpà un bel logheto de siè canpi e sicome el ghe piaséa assè, pur de ’verlo el lo ghea pagà un fià dessora de la broca, metà in schei e metà in dèbito, sperando de francarlo a respiro co’ i racolti ano par ano. Invesse l’ano drìo xe sucesso quota novanta, cossì el poro Salvan, che ’l ghea mojere e siè fiòi, du mas-ci granditi e quatro fémane da slevare, ’vendo debiti sul gropon, el jera desperà, parché el ga cognesto svèndare tuto par tapare el buso. L’omo se ga messo inte le man de i pi bravi mediaturi par desbrigarse a le svelte sensa tanto lanbicare. Sicome despò ghe mancava domè un mese a Samartin e par chel dì el logo coréa che ’l fusse desgonbrà, a Modesto ghe sbrusava el dedrìo, ma par chei afari lì garìa volesto piassè tenpo da tratare co’ calma par poder ciapare el so justo. Però, dato che “el Padreterno vole i so fiòi crocefissi”, par farghe desblesare eà canpagnola in prestessa, un mediatore ga catà un logheto a la terzarìa. Vanti conbinarse, Modesto có el xe nà a védarlo, el se ga messo ’e man te i caveji: el jera in meso a le brècane. La tera la paréa anca de quea bona da rumare, ma ghe jera na caseta copà doso, co’ i solari dabasso smaltecà de còro e le andade fate de tera batù, quatro camarine de la misericordia, porte e balcuni tuti ruti, i telari de i viri scancagnà co’ mèse lastre e i muri descalsinà. Siben che a cunti fati, l’omo ga capìo che de so spetansa ghe sarìa saltà fora malapena da magnare par eù e eà so famejola, el ga pensà ca no ghe jera pi tenpo par strolegarghe sora e cussì “o magnare sta menestra o saltare da sta fenestra”. Cargà su du cari ’e patine i s’à messo in andare co ’l samartin.
Lu parava el primo caro, so mujere el secondo e la Imelda, so fioleta pi vecia de le quatro, la ghe tegneva drìo a piè descalsi, stando ’tenta ca no cascasse calche tàtara. Fin che eà putà la caminava tuta strangossà, ma sensa farse capire da i sui, t’un sbianso la ga visto un polastrin inpiotà sul zejo del stradon e co’ un buridon la lo ga brincà. La se ga vardà ’torno par capire de chi che ’l podéa èssare, ma lì ’rente no ghe jera case. A l’Imelda ga fato gola fermarse par cocolarse e caressarse sta bestiola, ma so pare paron che ’l ghea visto el ficheto e capìo de cossa ca se tratava el ga intìmà: “Eh, tosa, cade ca nemo delongo parché eà strada l’è ’ncora assè longa!” Alora la Imelda chietà e contenta come na pasqua la se lo ga strucà al sen, basàndolo parfin. La fiola sto polastrin la se lo ga slevà co’ tante cure e tanto amore fin che ’l xe deventà un galeto co’ na bela cresta spanìa e dó bardàgole rosse, grande cofà quée de na galina ovarola. Intanto a i du tusi mas-ci ghe xe tocà nare via miitare, spedìi al fronte a conbàtare contro i austriaci, cussì “pèso tacon del sbrego”, la Imelda xe restà l’ùgnola in fameja ca ghéa passion par nare drìo a le bestie. Na freda matina de marso, ’vanti nare in canpi a laorare, la ga messo el so galeto sul sélese in custiera, drento un corgo de stropèi incapelà da un vecio cain. Dopodisnà s’à levà sù na bora despetosa che la ga descuacià el corgo. Verso l’inbrunire, có eà xe tornà a casa nel corgo no ghe jera pi ’l galeto, ma la ga catà un vovo ’pena fedà. La ga ciamà so mama in lissiara che la jera drìo fenire eà bugà e la ghe ga domandà se la ghéa visto scanpare el so galeto. “Ma quale galeto! Sinpia che no te si altro” ga siga so mare, “la jera na galina, stufa de stare sacrificà t’un serajo e no la ga visto l’ora de scanpare parché eà gavéa voja anca ela de un fià de svànpolo, come ti ca te ghè catà un moroso e te parli de maridarte. Però gheto visto eà te ga lassà un vovo par ricordo? Co’ raquanti retài de panseta faremo na bela fortaja rognosa e stasera senaremo tuti de gusto.”
– Che storia, barba, propio de miseria nera. Ma anca sto raconto me ga insegnà che co’ gnente se trìbola ma co’ poco se pole canpare. Grassie, barba, te go scoltà a boca verta.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Li ciamemo “clandestini”…
El problema de i imigrati inte ’l nostro Paese el xe come i scaravazi de aqua che xe drio destrùsare anca la nostra bela Italia. Se trata de on problema talmente ingrejà che, par desgatejarlo, podemo provare a no ciamarli pi “clandestini”, ma “migranti irregolari”.
de Mario Sileno Klein
|
