Da Roma, in diaeto de Este (PD)

Eà barba de Napoeon

Eo sò, eo sò: l’inperator no gheva barba, ma questo xe el tìtoeo de na gustosa pagina de ’e “Memorie” de Constant Wairy, Valletto di Camera, (na spece de factotum), che ga servìo Napoeon da eà nomina a Primo Cónsoe, fin a eà sconfita de Waterloo.
El libro conta eà vita privata del grande personagio, e publicà nel 1830, a nove ani da eà so morte, ga ’vù enorme sucesso in Europa e parfin in America, tanto jera viva ’ncora eà imàgine de l’omo che nel ben e nel mal ga segnà ’n’epoca.
Dó paròe su l’autor. Fameja borghese e òtima educassion; a vint’ani el va a servissio de Eugene de Beauharnais, fiòeo de primo leto de Giuseppina, e a vent’uno, presentà dal paron, el passa co ’l stesso incarico a Napoeon, aeora Primo Cónsoe. Costant xe discreto, svelto, inteigente, afidàbie tanto che ’l futuro inperator, pur ciamàndoeo ”Monsieur le drole” (Sior bufonsèo), eó stima, ghe se afeziona e eó trata co familiarità.
Vegnemo a eà barba. Napoeon fin da sototenente de artilieria se gheva senpre fato rasar dal stesso barbier, Monsieur Hambard, za aeora stagnoto, e el pretendéa che ’l ghe ’ndasse drio in tuti i so spostamenti.
Passa i ani. Quando Costant riva a servissio, el vecio tonsor ghe confida che, data l’età e eà saeute malferma, no ’l ghe ne pol pi de sti continui viagi e, visto che el Cónsoe ormai se fida totalmente del toso, eó incoragia a far pratica da barbier, par poder un doman sostituirlo. Constant ghe dà rèta, e nel tenpo libero, de scondon, va a botega del mèjo barbier de Parigi, a far el “ragasso, spàssoea” e inparar l’arte.
Ne ’e “Memorie” el confessa che ne i primi tenpi el ga sgarà pi de qualche sbèssoea, ma che po’ el ga miliorà rapidamente.
Monsieur Hambard fa da cavia e contròea i progressi, fin a constatare eà abiità e ’a sicuressa de l’alievo.
Napoeon ga da partir par un longo viajo nel nord Europa. Hambard dimanda de èsser esonerà par via de ’a cativa saeute. “Vedìo che tipo che si!?” ghe dise el Primo Cónsoe. “Senpre na lagna! E po’ ’desso chi me farà eà barba!?” “Generàe (el vecio figaro eó ciamava senpre cussì) ghe xe qua Costant, che sa rasar ben quanto mi!”
El dì dopo, fin che ’l valeto eó jutava a cavarse i stivài, Napoeon, a l’inprovisa, ghe fa: “Va ben, Monsieur le drole! Se si cussì in ganba come i me dise, vojo na prova sul canpo. Feme eà barba!”
“Adesso, Maestà!?” “Quando se no? Vojo védar come ve eà cavè!”
E qua Costant el scrive:
“Co ’l tremasso nel cor, ma con fare sicuro, go scaldà l’aqua e eó go insaonà. Quando però go verto el rasuro, el xe saltà sù de colpo da eà poltrona; el se ga voltà e per qualche secondo el me ga piantà i oci in coste. Po’ el xe tornà a sentarse, diséndome senplissemente: – Continuè! – Portà a bon fine ’e operassion, co ’l fià sospeso, ghe go parà ’vanti el specio… – Monsieur le drole: ’desso me rasarè senpre vu!
Sicome l’odiava i pei, gavevo da rasarlo tuti i giorni. Ve assicuro: no jera na cosa fàssie.
Fin che laoravo, el voltava ’e pagine del giornal, el se assestava su eà poltrona, el se voltava de colpo a parlar co qualchidun. Insoma na bissaboba, che par non ferirlo, me faseva suar sete camise!
Quando po’ el jera de cativo umor, el se irigidiva come na statua. No ghe jera verso de farghe sbassar o tirar sù eà testa par faciitarme el cònpito. Eà fortuna ga voesto che cose gravi no sia mai sucesse. In ultima, na vera e propria manìa: bisognava assoeutamente insaonarghe e rasar sóeo na guancia a eà volta.
Mi jero orgolioso de ’a fiducia che ’l me dava, ma el fato che ’l voesse farse rasar esclusivamente da mi, me inqietava. E se me maeavo, o par qualsiasi acidente no fusse stà disponìbie? Va ben che l’inperator jera convinto che tuti eó amasse, ma che ’l rasojo ’ndasse in altre man jera parlomen n’inprudensa.
Dopo tanti tentenamenti me so’ deciso a dirghe ’e me preocupassion e sercar de convìnserlo che eà sicuressa, voeva che ’l inparasse ne ’a necessità, a farse eà barba da sóeo.
Par un bel tòco el se ga rifiutà. El me diseva ridendo: – Pigron! Saressi ben contento, eh, de apiopàrme el vostro laoro! – A eà fine el ga acetà el me consilio e go scominsià ’e lession. El difìssie jera farlo concentrar.
Ogni momento entrava uno par na firma o par esporghe problemi urgenti, e più de qualche volta co ’l rasojo in man, distraéndose, el se sgrafava.
Aeora el se voltava verso de mi e:
– Eco! Xe colpa de tute ’e vostre ubìe se me so’ tajà!
Finalmente el ga inparà a evitar el ‘spargimento de sangue’, come diseva eù, e go ’vù eà sodisfassion de ’ver reso autosuficente, in quanto a barbe, el primo inperator de ’a storia! Ma, che fadigassa!”

[torna sopra]