Zente de Padova

Jacopo Sanguinacci

Jacopo Di Piero Guidi, Stemma del podestà Jacopo Sanguinacci (rilievo, 107 x 85 cm, Museo Nazionale del Bargello).

Interno de la Capela de la fameja Sanguinacci, ne la cesa de i Eremitani de Padova (foto de Damiano Bertolazzo) con l’afresco votivo de Giusto de’ Menabuoi (1373).

Mi no so’ stà bon de ’ver notissie de quando Jacopo Sanguinacci el gera pìcolo, solo che el xe nato a Padova intorno al 1400 e che so pare se ciamava Giovanni.
El se ga dedicà a i studi liberali, otegnendo el dotorato (artium doctor) a l’Università de Padova el 14 aprile 1426. Savemo che el 10 febraro 1427 el risulta fra i “centum cives imbussolati ad officia” e che nel 1429 el xe tra i consiglieri del Comune de Padova, carica che el conserva anca ne l’ano successivo. Malgrado sti incarichi no ’l ga abandonà i studi, frequentando le lession de dirito come scolaro “utrisque iuris”. Ste informassion le risulta dal cod. 970 de la Biblioteca Trivulziana de Milano. Fra ste carte ghe xe anca de le so rime e dó so létare in prosa volgare.
Come risulta da na pergamena de l’Archivio Civico del posto che ricorda l’investitura “iure livelli” fata da l’abate del Monastero de Peraga a un serto Jacopo q. Pietro Maroni per l’apezamento nel teritorio de Tencarola, in contrada “de precem”, confinante co i possedimenti de Jacopo Sanguinacci. Da sto documento risulta che el nostro gavesse de i tereni a Tencarola.
Nel 1434 el se ga trasferio a Ferrara, parché el contava sul mecetanismo de i Estensi, che gaveva favorìo altri letarati e artisti.
Durante el so sogiorno a Ferrara el se ga costruìo fama de inprovisatore volgare, che vol dire no in latin, ma in lingua taliana, tanto da èssare amirà da Guarino Veronese, che insegnava in chel tenpo a Ferrara, che se ga espresso “si per la spontaneità della vena poetica, come per la facilità con cui tesseva l’encomio ed il biasimo del medesimo soggetto alla maniera dei sofisti”. Xe in sta ocasion che Leonello, che sucederà al pare Nicolò III co ’l titolo de marchese nel 1441, el ghe ga comissionà “una poesia che lo consigliasse sull’opportunità o meno di seguire gli impulsi d’amore”.
Da sto invito xe nata la canson “Non perch’io sia bastante a dechiararte”, che xe considerà la più nota e fortunà fra la so produssion. Soto l’insegna de l’amore el nostro poeta el riesse a ragrupare tradission classica e leteratura in italian de l’epoca.
Ma el sogiorno ferarese doveva èssare bastansa curto, parché za nel 1435 da Padova, dove che el se gaveva trasferìo, el Sanguinacci el ga invià al Doge Francesco Foscari un longo sirventese intitolà “Oh incoronato regno sopra i regni” che come figura ne la didascalia del Codice Isoldiano el xe un “Triumphus in laudis civitatis Venetiarum”.
Anca nel 1439 da Padova el ga mandà al Doge Foscari n’altra canson: “Vorrei, principe excelso, inclito e pio” co la quale, a nome de i so concitadini, el domanda un “soccorso con dolcezza” par via de la congiura che ga tentà Marsilio da Carrara. El gaveva paura, insieme co i Padovani, che el Doge volesse castigarli. Padova, el dizeva, no meritava “infamia, né tristezza”.
Senpre nel 1439, in merito a i fati politico-militari che se stava svilupando co la terza guera veneto-viscontea, el ga scrito la canson “Inclita dona, intrepida e pudica” che se in maniera formale el gera un richiamo che el volgeva a “Brera fedelissima e virile”, che la saria stà in talian Brescia, in efeti el la ga scrita par dire “la sua sincera partecipazione al destino dei domini della Repubblica”.
Ne i ati de l’Archivio notarile de Padova el ga figurà fin al 1441 e forse el xe lu quel “Jacomino de Sanguinacci” che figura fra i testimoni in un processo a l’Uficio de la Volpe del 17 luglio 1442.
Dopo sta data no se trova più nessun riferimento su de lu e xe da ritegnere che ’l sia morto verso la fine del 1442 o poco dopo.
La so conposission poetica xe fata da almeno 30 poesie, 5 soneti, 13 canson, 9 serventesi, 2 fròtole e na sestina. Testimonianse de i so scriti le ghe xe a Berlino a la Deutsche Staatsbibliothek. A Bologna a la Biblioteca Universitaria, a Firenze a la Biblioteca Riccardiana, a Mantova a la Biblioteca Castiglioni, a Milano a la Biblioteca Trivulziana, a Oxford a la Bodleian Library, a Padova a la Biblioteca Universitaria, a Udine a la Biblioteca comunale Vincenzo Joppi, a la Città del Vaticano a la Biblioteca Apostolica Vaticana e a Venezia a la Biblioteca nazionale Marciana.
Da quelo che go scrito me pare che la figura de Jacopo Sanguinacci meritarìa na memoria a livelo generale più inportante de quelo che ghe xe. El personagio valarìa la pena de èssare conossùo de più, forse dedicàndoghe na stradeta qua a Padova, magari in periferìa.

[torna sopra]