Da Lugo de Vicensa

Ricordi de scola
Al terso piano de le Elementari

"Sono la nuova Direttrice!"

El gera un tipo roverso…

Al primo piano del mondo de ’a scola ghe sta i scolari, al secondo le maestre e qualche mosca bianca de maestro; al terso piano te truvi i Diretori didàtici e, su in mansarda, quei del Ministero de la Pùblica Istrussion. De i tusiti go parlà ’bastansa. Quanto a le me coleghe maestre le me ga soportà al punto che da 40 ani a ogni Oto de Marso me sento in òbligo de dedicarghe na poesia e có le va in pension on libreto personale a titolo de beatificassion. Sta volta se va sù al piano de i Dirigenti dove se presenta on canpionario che mèrita na visita. So un paeseto pìcolo e fora de man come ’l mio, Lugo de Vicensa par intèndarse, càpita spesso che riva Diretori de prima nòmina. Avendo paura de sbaliare, i te xe senpre ’dosso preocupà solo che le carte sia conpilà come dio comanda parché l'Italia xe la repùblica de le carte e ’l resto no conta: se le carte xe a posto, xe tuto a posto.
Qualche Diretore de primo pelo, ciapà da fogo sacro, se slarga anca a interpretassion personali de le legi, za de suo tute invergolà.
E sti novelini se inventa òblighi parfin difìssili da imaginare.
Sucedéa ’lora che ’l vecio maestro, mi, a nome del popolo magistrale, domandavo che la proposta, formulà in modo preciso, fusse messa a i voti del Consilio.
Al consenso de le maestre se abinava de sòlito el risentimento del Diretore ne i me confronti!
Na bela istà de i ani Otanta, on bravo Diretore l'è ’ndà in ferie, lassàndome el cònpito de passare qualche volta da la Segreteria par védare se ghe fusse problemi e par farghe on fià de conpagnìa al Segretario, na cara persona che da un par de ani xe zolà in Celo.
Riva na telefonata da l'aldelà del Po, zona de i mosaici bisantini. "Sono la nuova Direttrice", la se presenta. Tento de infilarme nel discorso par darghe qualche informassion. "So già tutto", la me stropa la boca!
La xe rivà gonfia de sicuresse e malà de dirigismo. Ne la memoria de le maestre (de le maestre!) la xe ’ncora inpiantà come quéa de la minigona che tegnéa poco querti i prossiuti de i galuni.
In più la presentava un davansale talia 8. Senpre secondo l'ocio conpetente de le maestre.
On bravo Diretore nostran, cargo de bonsenso, conpagnava el nostro lavoro co spirito seren e disponibilità a risòlvare i casi che se presentava.
I Consili d'Istituto i xe quei organismi che ga da durare almanco un'ora e mèsa par decìdare robe che tuti sa da prima in che modo. Ma par rivarghe se passa atraverso infiniti ciacolamenti, interventi che replica al sfinimento i discorsi za fati canbiando solo le parole... Jera in quei momenti che ’l bonsenso del Diretore tentava de fermare la frana de i bla-bla co sta sana esortassion:
"Ben dài, tose, ah!.."
Par ani le care coleghe le me ga petà ’dosso el cònpito de fare la relassion scrita de le riunion parché, meschine, la ghe risultava un inpegno che richiedeva giorni de lavoro.
Par farla curta ("Lòdete sesto che te ghè un bel mànego!"), a fine riunion consegnavo la relassion bela che finìa.
Naltra volta i ne ga mandà on Diretore trasferìo da on posto "per incompatibilità di carattere con l'ambiente". I ga pensà de sicuro che al me paese la malatìa de la inconpatibilità no la ghe fusse. Fato sta che sto Diretore, preocupà de trovarse ancora ne i guai, el pretendeva domanda scrita pa' ogni stupidàgine, tipo modificare la posission de i banchi, picare un manifesto…
Ogni mosca che se movéa gavéa bisogno del so consenso. Se ga creà un tale canpo elètrico tra la Diression e ’l corpo magistrale che a la fine... el trasferimento lo ga domandà el Diretore.
El gera propio un tipo roverso tanto che me xe scapà de scrìvare:
"L’ometo Preside griso ’fà on sorze / la roda del mondo nava a parare: / questo, savì, el podeva nar ’torno / solo in virtù de na so circolare".
Dopo, el progresso ne ga regalà l'Istituto Conprensivo e i Diretori i xe deventà Dirigenti!!!...

[torna sopra]