Da Venezia

Létera a Venessia

(foto de Armando Mondin)

Cara Venessia, ’a to agonia ’a dura da tanto tenpo e de i milioni de persone che ga pestà i to masegni, ’e to piere bianche e rosse bèe come nissuna altra, quasi nissun se ga acorto che ti ze drio morir par colpa de tanti.
’A stanpa mondiàe ’a ga preferìo no scrìvar che ti ze ciapada cussì, no i gavarìa savesto come scusarse par èssar stài, co el so sienzio, cònplici de i assassini che ga condanà ’a più bea cità de tute, na cità che no gera na vèra e propria cità, ma un logo de l’anima, un splendor unico e iripetìbie, un mito e na storia talmente forte da missiarse co ’a legenda più singoeare e vissin a i dèi.
Cuori sensa sentimenti i ga deciso che invesse de salvarte, bisognava cavarte chel sangue che ancora te restava in circoeassion par far deventar siori òmani za siori de schei, ma orfani de inteigensa e de poesia.
Ma anca tanti to citadini i te ga aban­donà, chi par necesità, e tanti par egoi­smo che el gera un materiaismo incon­prensìbie, pensando che ’assàn­do­te, ’a so vita ’a sarìa stada più comoda ’ndan­do a star de là del ponte, no acorzén­dose che ’a so siera ’a deventava zaea come el fumo de ’e ciminiere de Marghera.
Intanto che ti sprofondavi senpre de più de ano in ano, un sindaco picoeto ga pensà ben de tentar de deventar el to re.
Poro gramo che no el saveva gnente de ’a to storia e de ’e to tradission, scanbiando ’e famege apostòiche che te ga fato Regina de tuti i mari, co famege de origine foresta.
Che el pensava de sfaltar i to incantévoi canài par far rivar ’e màchine fin soto l’entrata del Comune de Venessia.
El stesso personagio che ga costreto mieri de venessiani a lassar ’e so case par far alberghi, afita-càmare e far serar i più bei bàcari e tratorìe che conservava ’e tradission, par far posto a discutìbii Kebab sensa arte ne parte e boteghe de ogni genere che vendeva robassa pericoeosa anca par ’a saeute.
Ma no bastava questo, el voeva distrùger l’ultimo tòco de laguna restà a i pìe del Ponte de ’a Libertà par métar cemento, e ancora cemento, ignorando quanta inportansa gaveva par ’e maree chel tocheto de laguna restada là. El gaveva messo ’e man su tuto e ti, Venessia cara, cossa ti podevi far? I to stessi citadini i ’o gaveva messo là a coparte.
’A lista ’a sarìa longa de sti misfati, basta sóeo dir che come Napoleone Bonaparte el voeva farte deventar come tute ’e cità del mondo, in modo che no ti briassi più de luce tua.
Ma anca a sto personagio ghe ze scanpada de man ’a situassion parché se ga messo de mezo el canbiamento del clima e el mar se alzava in maniera inarestàbie, ocoreva canbiar piani e vendar el to scheetro sensa ’a to carne.
Cussì, intanto che l’ultimo sindaco che el voeva deventar el to re, e ti no ti ga ’vùo gnanca ’a forsa de rìderghe drio, el continuava el so progeto par far ’ndar via i ultimi venessiani, prometéndoghe de tuto e de più par eori in teraferma; el meteva i cancèi par serarte e far entrar sóeo i siori che gaveva i schei par conprar el costoso bilieto de entrata, el radopio del Canal de i Petroli voesto da tute ’e istitussion, conpreso el mancato re che meteva a disposission a pagamento i so tereni a Marghera par far na spece de novo inpossìbie porto par no far passar più ’e disatrose navi grandi in Bacino de San Marco che te meteva in perìcoeo i gaveva pensà un tacon pezo del sbrego parché, e questo lo saveva anca i putèi, el scavo par el radopio del canal el gavarìa destabiizà per senpre l’ultimo eqiibrio che, anca se co un sóeo fràgie ultimo fìo, el tegneva in qualche maniera in sesto tuta ’a laguna.
Distruto questo, el mar te entrava dentro co na forsa inarestàbie e le aque alte e vioente ’e gera senpre più devastanti par ti, cara Venessia.
Poco a poco te ze mancà el fià, i to polmoni anca se anfìbii e le to branchie i se ga maeà de tristessa de fronte a tanto, ma nonostante tuto ti resisti sdrajada, sprofondada sul to leto de aque che un tenpo distante ti ga sposà e ti vedi che el parco de cemento e de isoeamento ideà dal pìcoeo aspirante re el va ’vanti.
Da Buran, invasa ogni giorno da maregiate paurose, parte el via de na funivia che da qua ’a riva fin al Montiron in teraferma dove no ghe ze ancora gnente, ma ghe sarà presto parchegi e alberghi e casoti dove se podarà conprar i bilieti par ’ndar a védar queo che resta de ti.
Chi, come mi, che te ga voesto tanto ben se sente morir co ti par no averte savesto difèndar, par ’ver permesso tuto questo. ’Desso ti ze morta, Venessia mia, e ’a to incredìbie tonba de aqua ’a ze deventada un museo a pagamento che sóeo i siori pol védar.
Mi so’ sicuro però che el to mito no el ze finìo cussì, so’ sicuro che ti ze tornada ne l’Universo da dove ti ze rivada quasi domìe ani fà, regaeàndone calcossa de talmente beo che pochi de nialtri i ze riussìi a rènderse conto, e che el to mar no el se fermarà al Montiron o a i Pili, ma el coverzarà fra poco tuto el resto parché ti ti geri el limite tra ’a beessa assoeuta e l’ignoransa, l’avidità, ’a mediocrità.
’A domanda che me vien da far ’a ze questa: come ga fato zente cussì pìcoea a ferirte a morte?
Perdóname, me amata idea, mito intraducìbie, beessa assoeuta e ciàpame tra ’e to aque dove me speciavo da pìcoeo e da grando co ’a me dona che te amava come mi.

[torna sopra]