Da Ponzano Veneto (TV)

Baldo e la gara de la pastasuta

Spagheti onti e bisonti de sugo rosso de pomodoro.

I partecipanti a la gara se postava davanti a la tola co le man ligàe drìo la schiena.

Ani difìssili e magri i primi ani Sinquanta; ghe jera ancora el ricordo de la fame patìa nel tenpo de guera. Eco ’lora ne le legre, propor la gara de la pastasuta, roba gnanca da pensar ’desso; ve partecipava ’na diesena de tini racli, che gaveva da parar zo un gran piato de spagheti condìi ’posta co na quantità fora misura de sugo rosso de pomodoro. Al momento giusto, vegneva portà in mezo a le giostre un gran careto, strassinà da un vecio trator, un Landini testa calda che co el so caraterìstico ronbo del motor, ciamava a l’atension i presenti: el jera un evento pien de alegressa e ciasso.
Sora el careto, par solito cargo de montagne de fen secà ne i canpi, vegneva issada na longa tola co ’torno na diesena de careghe, dove se gavarìa sentà queli che concoreva a la gara.
’Sti qua, co le man ligàe da drìo la schiena, in maniera che no le se podesse doparar, dopo che ghe vegneva postà davanti un piatasso pien de spagheti, al segnal stabilìo, i gavarìa dovesto parar zo co ingordisia e co pressa tuto quelo che ghe jera nel piato, o mèjo la pasta pareciada da brave man de le ciamarde, cussì noaltri se ghe diseva a le contadine; spagheti che nuava nel sugo che li onseva tuti co l’intento ben preciso de far deventar intrigoso ogni bocon e piturar de rosso le mutrie de i tosati che deventava mascaroni de carneval.
Fintanto che durava la gara se podeva sentir el subiar e rantolar de coalchedun che bochisava desparà, e védar altri che alsava el muso par parar zo mèjo le sboconàe, come che fa i ochi có ingiotisse el paston, sercando de tegner i jak serài, par via che se el sugo ’ndava drento i oci el faseva un brusor da sbaular; chi po’ credeva de sofegarse, bandonava la gara, parché no el jera più bon ne de respirar ne de smorfir el bocon.
Dopo coalche menuto i mui de i contendenti somejava a queli de i diavoli da tanto i jera desfigurài, no se podeva più conóssarli; ma se queli de i contendenti pareva grugni o mascare de soferensa, queli de chi vardava jera el ritrato de la alegressa e del boresso.
Xe mèjo no reportar le espression de incitamento che vegneva sigàe al proprio beniamin, dir che le jera colorite, xe dir gnente, chi vardava se copava dal rìdar e sbefejava tuti. Quelo che feniva la pastasuta par primo, sensa lassarghe le pene, el vinseva restando canpion pien de gloria par un ano intiero.
No senpre el vinsitor jera el tini raclo più gajardo, parché se vedeva i più mingherlini ingiotir quantità da paura de pasta che i parava zo sensa mastegar, e mai se ga capìo come el so stómego podesse far posto a tanta abondansa.
Sicome tuti podeva concórar, sensa distinsion de sorta, coalche volta se ga fato ’vanti anca un tosato che ne jutava, nativo da Venessia, ciamà da tuti “Baldo”, par dir el vero gnanca se saveva el so nome de batésimo, ’sto toso xe vegnùo drìo la nostra carovana par coalche ano. Baldo gaveva na corporatura stagna, sgajo e svelto ne le movense, rosso e risso de pelo, forse retajo de chissà qual antenato originario de la Serenissima Repùblica, el gaveva la barba longa par gnente curada, rossa anca quela, e anca un difetin: i so oci se incrosava, par spiegarse mèjo el jera straocio, tanto che chi ghe stava davanti no capiva mai chi che el vardasse o a chi el ghe parlasse; ma ’sta magagna a la qual lu no ghe badava e anca el so particolar parlar co la camoma venesiana, faseva sì che tuti lo gavesse in sinpatìa e ghe volesse ben.
El nostro Baldo se tegneva in bon e par lu jera un vanto partecipar a le gare de la pastasuta, ma dopo un poche de volte i lo ga butà fora da ogni conpetission, par “manifesta superiorità”, in quanto ciaro come el sol, tuti gaveva inteso che el jera massa forte e nessun podeva conpètar co lu. El vinseva senpre!
Mai se se ga spiegà o capìo come el podesse magnar piatassi de pasta in metà tenpo de i altri. Mi go el sospeto che sia sta “merito” de la fame patìa durante la guera! Mah?!

[torna sopra]