|
Editoriale
Fare pace co ’l creato
Parole grosse cofà la valanga de 300.000 metri cubi de giazzo, neve, tera e piere, precipità el 3 de lujo passà, su la Marmolada, causando la morte de 11 alpinisti e feréndoghene altri 8. Xe el momento de ’ndare oltre el dolore e oltre le parole, ma con i fati.
 | | L’ultimo messagio del “ghiacciaio ferito” de la Marmolada. |
Tuti dovemo interpretare l’urlo de la montagna. La tragedia de la Marmolada, con le imagini del disastro, xe la cartolina de preceto par tuta l’umanità che ga da decìdare de fare pace co ’l creato e de inpegnarse a protègerlo, come se dovarìa fare con tute le creature. El destaco del giazzo che se ga roto, el ga distruto la vita de òmeni e done che magari no se conosséa, che gavéa biografie diverse, che vivéa in posti difarenti, ma che jera insieme in nome de on’unica passion: l’amore par la montagna.
Subito, la rabia par quelo che xe sucesso la ga fato nàssare tanti interogativi par tentare de individuare responsabilità de chi gavarìa dovesto tegnere soto controlo la “regina” de le Dolomiti. Le indagini farà luce su quelo che xe sucesso e sul parché no xe stà tolto le decision del caso, prima de la disgrazia.
A pensarghe ben, xe ani che se parla del canbiamento del clima, de l’aumento de la tenperatura, de le stajon che no ghe xe pi, de l’aqua che manca, de l’aria che xe ’velenà…
’Desso vien ciamà in causa la sienza e la politica che ga da ’vere a cuore la salute e la sicurezza de i so citadini. Ma anca i citadini i ga da rèndarse conto che, se i vole salvarse, ghe vole el contributo de tuti, ghe vole la cultura del “bene comune”. Nissun pole dire: “mi no lo savéa” e manco oncora: “mi no me intaressa”.
I avenimenti de sti ultimi ani: pandemia, economia in crisi, guera, sicità, tenpesta al posto de la piova dal zielo… i xe “segnali” che ghe ghemo petà in coste tuti quanti. La risposta? I incendi (dolosi?) de la Cità Eterna e le montagne de scoazze che inpina le so strade in piena istà! Solo par fare on esenpio de inciviltà e degrado che barufa tuti i giorni co ’l creato.
Par fortuna no la xe cussì dapartuto. In te on pìcolo paese (e no ’l xe l’unico!) del nostro Veneto (Bassa Veronese), na ordinanza del sindaco la inpone a i proprietari de tajare l’erba alta de i so giardini, e bruscare i àlbari e le passaje drio le strade del comune: se i citadini no i risponde, ghe pensa el Comune a farlo e dopo el ghe manda casa el conto da pagare.
No se trata de violare la libertà, ma de ricordare a la gente che ghe xe l’òbligo de rispetare el decoro e la sicurezza de tuti, che po’ la sarìa la cultura del “bene comune”!
E qua entra in balo el rispeto del creato. Massa volte se desmenteghemo che in sto nostro pianeta a semo ospiti e no podemo conportarse da paroni de tuto, soratuto de l’anbiente che ne ga acolto quando semo nati. Purtropo ghemo la memoria curta. Se lo ricordemo ‒ boja can, provisoriamente! ‒ solo quando le imàgini de on disastro le ne inpina i oci, la mente… e la boca, faséndone fare tanti discorsi che, a la fine, se riduse a na roba sola: dovemo a tuti i costi “fare pace co ’l creato”. Tuti! Veci e soratuto i zóvani!
Dopo tuto, avere cura del creato, vol dire coltivare la pace e tuti savemo de quanto ghe n’avemo de bisogno, co sti “vènti de guera” che se fa sentire anca da le nostre parte.
El futuro, el nostro futuro, che no conossemo, xe ne le nostre man.
Visto che nel stesso posto, nel 1916, in piena Prima Guera Mondiale, na valanga la ga sepelìo e copà 300 soldà austriaci, tachemo co ’l zercar de capire quelo che, oncora na volta, la montagna la ne ga dito… a nome del creato!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Fare pace co ’l creato
Parole grosse cofà la valanga de 300.000 metri cubi de giazzo, neve, tera e piere, precipità el 3 de lujo passà, su la Marmolada, causando la morte de 11 alpinisti e feréndoghene altri 8. Xe el momento de ’ndare oltre el dolore e oltre le parole, ma con i fati.
de Mario Sileno Klein
|
