Da Gavello (RO)

Cavatine da tratorìa

A se catemo a Crespin a magnare del pesse…

Come ogni ano, anca sto ano a se ca­temo a Crespin a magnare del pesse, mi e racoanti somelier de Como e del Piemonte e altri amighi de Valdobiàdene. Uno de quisti el xe Loris, on omo tanto inteligente e co na gran vuoja de vìvare in conpagnìa che lu in tuti i modi el zerca de ralegrare, con­pagnando le so cavatine co diversi ma­gnum de proseco superiore che ’l se fa lu, a la salute soa e de tuti!
Sto ano el jera on fià intavanà.
E tuto a nasse par el fato – el ne dise – che la television la ne inmatunisse: prima co ’l Covid che ogni dì par misi e misi la ne ga tormentà sia par la paura de ciaparlo e sia par dover scoltare la stessa zente ca ne parlava, disendo le stesse robe za dite in tante altre tra­smission come e mèjo de i virologi ca paréa ch’i ghesse studià par gnente in te i so confrunti.
E dopo a xe tocà a sta goera male­deta de l’Ucraina: anca staolta on calva­rio de discursi che i xe senpre quìi e senpre i xe i sòliti a conparire par tele­vision. Tanto ca sarìa ben métarli tuti insieme a parlare e po’ no ciamarli più par el ben de le nostre teste e de le no­stre rece. Sichè Loris el ga dito ste pa­role: “A bisogna che la zente la diga solo quelo che la sa e no quelo che la pensa, sinò no la finemo più de védarli e de scol­tarli.”
Eco, alora, el motivo ca se cuntemo racoante monade par passare ben el nostro tenpo, ciuciando pesse coto e cruo, de tute le sorte. A taca Loris, che ’l cunta de avere vi­sto on so amigo co ’l muso tuto sgra­fegnà.
“Come mai?” el ghe domanda.
“A go ’pena soterà me suòciara.”
“E parcossa tuti sti sgrafe­gnoti?”
“No la voléa mina!”
Dopo a taca Giorgio a dirne che a on so amigo de Runzi a ghè morta la suòciara invelenà.
“Gala magnà funghi?” a do­mando.
“No, parlando parlando, la se ga morsegà la lengua.”
“Adesso a dassemo stare le suòciare e pitosto parlemo del vin che onquò a se ciucemo co tanto amore” a digo mi.
A ghè Ugo che ’l beve in parte da lu solo e da lu solo el discore no se sa de cossa. “Na olta a me piasea le done – el me ga dito – ma a no me ricordo più el par­chè.”
Anca Mario no ’l me pare tanto con­tento come i ani passà. “Com’èla?” a ghe domando. “A me xe tocà de fare tri cursi par smétare de bévare.”
“E adesso, parcossa bìvito?”
“A lo fago contro la me volontà, solo par farve conpagnìa!” el me ga risposto.
Par serare el nostro discorso e anca la zena piena de ogni bendedìo de pesse, a dasso parlare Loris, che ’l me cunta de on fato vero.
“Vardè che questo l’è capità in te on paesoto del Trevisan. E no digo bale. El fato xe ca xe capità in te sto paese on do­tore meridionale che o par questo o par st’altro motivo el ghea senpre da fare co zente macà in facia o in te ’l corpo par via de bòte o incidenti vari. Tanto che sto do­tore el xe ’ndà dal sindaco: – Voi in que­sto paese avete problemi con l’alcol – el ga dito. E cussì el sindaco el ga ciamà la citadinanza a na conferenza pùblica.
“Ma come? – el ga dito a la so zente – a ghi el vin ca xe tanto bon e a ghi anca la grapa. Cossa ocore bévare alcol?”

[torna sopra]