Da i Coli Euganei

El dì de san Lorenzo

Na volta, da pìcoi, se spetava san Lorenzo come se gavesse da rivìvare na roba proprio bea. Certo che ghe gera el so parché. Gera queo el momento de ’a Fiera del Comune de Vo’ insieme anca a la Sagra.
Lo sentìvino nominare tuto el tenpo de l’ano, parché quando se sentiva dire da la mama: “Varda che se te fè ancora conbàtare no te magni pi el gelato el dì de san Lorenso.” Alora i gelati i se vedeva solo chel dì e cussì per un poco se sercava de stare pi tranquili. Ghe gera in chel dì i gelati e le granatine, co i banchiti de sagra, le spumilie, le caramele, le granatine, i pevarini, ec. E le giostre? E le angurie? Quele le se magnava a la matina co ’l nono Giacomo.
A la note se dormiva poco da l’agitassion de l’arivo de san Lorenso. Alora se sentìa i rumori e la gente che ’ndava a la Fiera a cronpare e vèndare qualcossa. Se sentiva le cavarete co ’l so bèe, bèe, qualche piegoreta, el musseto, ec., ec. Pi tardi passava le none co i pulsinèi, drento on bel sesto, ansi du sisti bei grandi, uno par parte tacà on bigolo traesso le spale, e via a piè che i passava, partendo dal monte, par rivare al Centro.
Passava anca le none co i sisti pieni de ovi da vèndare o da métare soto a qualche galina deventà cioca. Da noantri partìa el zio Gioanin, per ordinare on bel mas-ceto, da mantegnere per on bel po’ e dopo el ne bastava par tuto el tenpo de l’ano. Bisognava védare la contentessa de la me gente de casa, quando rivava el mas-ceto.
“Vegnì a védare che beo!” I ne sforsava noantri, ma a la nostra età se gavéa pi voja de zugare e de ’ndare in giostra.
Nantra roba che ne faséa contenti gera có se partìa co ’l nono, a man, e na volta rivà se sentàvino drio el rivon arente al canpo de la Fiera; el nono cronpava na bela anguria che, a vardarla, ne rideva i oci. Se tiràvino fora de la scarsèa on sculiero e na ciopa de pan biscoto, meza anguria paron e se magnava de gusto.
Dopo, na ocià a la piassa e via a casa a piè, continti e beati. No bisognava serto desmentegarse del scartosseto de pastine per i fradèi che gera restà a casa, parché i gera ancora massa pìcoi e mi invesse gera nata per prima, no de tanto, ma gera on poco pi grande.
Me ricordo che chei ani in tel dì de la Fiera gera on gran caldo e alora el nono Giacomo el tirava fora qualcun de i so proverbi. Eco queo giusto par quel dì: San Lorenzo da la gran calura e san Vincenso da la gran fredura: uno e l’altro poco i dura. Alora mi che son senpre stà na ciacolona ghe domandava cossa che voéa dire de preciso, e lu me contentava subito; ansi, ghe ne domandava de i altri, che adesso me so’ desmentegà quasi del tuto.
Ma me vien in mente on articolo leto so on giornale vecio, che parlava a proposito de la Fiera de san Lorenso a Vo’.
Dunque na persona, partìa da distante, el ga conprà in fiera on bel ròdolo de stofa. Ciapà la strada per andare a casa a piè, essendo stufo e straco, el se ga butà drio la riva del canàe, el se ga messo el ròdolo de stofa soto la testa e sensa acòrzerse el se ga indormessà. Dopo aver fato na bela dormìa, có el se ga svejà, no ’l ga pi catà la stofa che ’l ghea soto la testa.
Beh, go pensà mi lezendo sta notissia, el ghea tanto sòno sta persona… e me son fata na risadina, anca se sta persona me faséa pecà… Longa la storia, streta la via, contème la vostra che la mia xe finìa.
Cussì finiva i raconti na volta. Anca se questa paréa che la fusse proprio realtà.

[torna sopra]