Robe de Ciósa

Antichi “squeri” ciosoti

Antichi squeri ciosoti.

Motopeschereci in atesa de… restauro davanti al squero (ani ’60).

I cossidéti “squeri” (vocabolo dall’etimologia incerta, forse da l’inglese square, costrussion a quatro lati), fin a la fine de l’800 i ocupava paralelamente dó cordoni de isoloti a est e a ovest de Ciósa, longo i dó canali prinsipali, in numero de ben 41. Ora ghe ne soravive solo 3-4, unici testimoni de ’n’atività un tempo fiorentissima e che faseva parte del patrimonio folkloristico ciosoto.
Un mistiero, quelo del squerariolo o scorariolo (cioè lavoratore de un squero) vecio quanto la pesca e ricordà anche da Dante (i cossidéti arzanà (cioè i arsenali, i squeri venessiani): “Chi fa suo legno nuovo e chi ristoppa / le coste a quel che più viaggi fece; / chi ribatte da proda e chi da poppa; / altri fa remi e altri volge sarte; / chi terzaruolo e artimon ristoppa (Inf. C. XXI, 10-15).
Come e quando abia avùo inissio uficialmente ’sta vera e propria arte (se pensa o prima del 1000 o dopo) e cioè quando, cessà la paura del primo Milenio, i popoli s’à resvegià a vita nova, non ze dato stabilire.
Ze serto che l’arte de “far legni” ze cressùa co ’l créssare e fiorire de l’industria del pésse e del so comercio. ’Sta atività à subìo, nel corso de i secoli , periodi de alti e bassi: infati l’à tocà el massimo ne la prima metà de l’800 co la espansion de i cantieri navali. Ciò ze atestà da un’inissiativa nel 1799 de i calafati ciosoti al fine de otegnire dal Comune facoltà de interare per trezento metri la laguna del Lusenzo per costruire sìe cantieri navali, impegnàndose a versare un canone anuo.
La fase calante de l’industria cantieristica à registrà el minimo storico a i nostri giorni in seguito a la industrialisassion de l’atività, che à trovà impreparà i squeri ciosoti.
I calafati gera a Ciósa un tempo cossì tanti da costituire ’na categoria ben definìa: esisteva, infati, fra de lori ’na socetà de mutuo socorso, la prima sorta in Ciósa e forse una de le prime in Europa. La gera dotà de un proprio statuto, déto Mariègola de San Nicolado, risalente al 1211 (el patrono de i calafati).
I squeri ocupava tuta l’area coverta e scoverta del cantiere, dove se inalzava un carateristico capanon de pianta retangolare, ciamà tènza (cioè tenda, tetoia), costrussion in muratura, su la quale, mediante tiranti in legno, posava el teto. La parte anteriore, che vardava verso el canale, gera verta al de sora e sbarà in basso da ’na parete de tavole numerà, disposte verticalmente, acostà una a l’altra e scorevoli su un asse deto cantiero e su ’na trave passà sul teren.
Drento la tènza i muri gera anerìi dal fumo de la pégola; al de sora spicava ’na icona sacra déta cesiola (leteralmente ceséta); qua e là gera sparsi i atressi da lavoro e soratuto spicava el scheletro del navilio in costrussion co le so robuste costole bianche. Ne i squeri se costruiva un tempo grossi peschereci oltre a i tipici bragossi ciosoti, a i bragosséti, a i bateluci, a i sàndali, a le bragagne e a le verìgole. La squadra de i squerariòi gera direta dal maestro d’àssia (= maestro d’ascia), in sotòrdene veniva, dopo i squerariòi, i calafati, incaricà de stopare el scafo e spalmarlo de pégola; dopo veniva i sachignèi adeti a l’argano e ultimi i segantini, quei che siegava in copia co el siegon le grosse trave. Ne la trupa de reserva… figurava i puti de cantiere, fiòi che co ’na barcheta (la burcèla) traghetava da ’na parte a l’altra del canale pescaori, carpentieri e paroni de batelo: i obediva al comando: “Ohé, puto, vième a levare” opure “Ciò, puto, pòrtame de là!”
Un cerimoniale tuto particolare infine seguiva el varo del natante novo, che scoreva su dó grosse trave paralele come binari e su le quali slitava la chìlia del natante stesso al classico grido de “A ze sui vasi, a ze molào, tiréve in là, a va, a va…” mentre il sacerdote impartiva la benedission e tuti i presenti borbotava la “Chiàbita” (storpiatura del salmo 90 “Qui habitat”). A la fine de tuto entrava in sèna la vanzèga, cioè el rinfresco oferto dal paron del batelo novo, che a doveva èssare possibilmente sensa debiti…, a base de sardèle, canòce, buli e vin…

[torna sopra]