Da Roma, in diaeto de Este (PD)

I ultimi dinosauri

… Che i frigoriferi de ’desso i xe fati de lata…

Basta spionarli eà sera, quando eà bronto­saura vol védar l’Eredità e el brontosauro eà partìa!

I esenplari de sta spessie in estinsion vi­en descrita, in base a quel che i pensa o che i dise, da i paeontoeogi, in sto modo:
– Tuti naviga sora i anta e tuti ga eà fer­ma convinsion che, a scòea i tosi no fa altro che smanetar su i smartfon e ghe ne ve­gnarà fora de i miche­assi poco de bon... (i nevodi de i altri s’intende).
– Che i frigoriferi, lavatrici, oto­mòbii de na volta durava na eternità e quei de ’desso xe fati de lata e dopo qualche mese se sfassa.
– Che de ladri in sto Paese ghe n’è un scarafon.
– Che i genitori no insegna pi a no sprecar, quando i so veci diseva: “Gesù xe smontà dal musso par rancurar na frégoa de pan”.
– Unici depositari de i sacri “moti” de ’a brìscoea, i fa a chi sconquassa el tàvoeo có i caea assi e tre.
– A gustar a fondo graspa, proseco, bàcaro e, se se xe fortunà de trovarlo, clinton, xe de rigore tegner el goto co tuti i déi, fora che ’l menevèo.
I siensiati continua eà descrission co i gusti:
– Par sta spessie i fabricanti de sca­toeame pol ’ndar a remengo. Vègna: menestroni, risoti, lasagne, bìgoi, ba­caeà, parsuti, saeadi, brisiòe.
’Ncora: patate ordinarie e meriche, fasiòi borloti, co eoceto, bròcoi, raìci e quei che a sti spezenghi de zóvani fa scaresse: pessegati, tenche, bisati, bóvoi, rane. E eà poenta? A slepe!
Semo a i orientamenti poìtici. Basta questa:
– Xe ciaro che ognisìa governo, zanco o drito, ga da magnar!
– Tuti xe reigiosi, ghe mancarìa altro! Però, anca i preti no xe pi quei de na volta. Vòto métar ’e Messe in latin?
– El sport ghe piase: calcio e cicli­smo soratuto. Ma, quée tose de eà ’tlètica par córer gae proprio bisogno de métarse in costume da bagno?
– I xe ’passionà de musica, quea bona, s’intende: i pèssi d’òpara, Mina, Vanoni, Berti, Zanicchi, Ceentano. E quel bassoto de Villa che polmoni gavéveo?
Par finirla, i paeontoeogi a eà spessie prinsipàe ghe mete da rente na sotospece: i brontosauri. Come se fa a riconóssarli? Sènplice: basta spionarli eà sera, quando eà brontosaura vol védar l’Eredità e el brontosauro eà partìa! Comunque, su questo, tuti xe d’acordo: sia eà prinsipàe che eà sotospessie ga un taento straordinario. Riussir a rivar a fine mese co ’e quatro paeanche de ’a pension! E mi so’ onorato d’èsser de ’a conpagnìa!

[torna sopra]