Zente de Padova

Fina Buzzaccarini

Afresco del Batistero: San Giovanni Battista affida Fina alla Madonna. (Giusto de’ Menabuoi, sec. XIV)

Afresco: Francesco I da Carrara con Francesco Petrarca e la moglie Fina Buzzaccarini (particolare de I miracoli di Cristo).

Le tre fiole de Fina Buzzaccarini con una de le sorele.

Me pare che sia el caso de parlare de Fina Buzzaccarini, mujere de Francesco I da Carrara, dito “Il Vecchio”, Signore de la sità, a chel tenpo.
Fina Buzzaccarini, a seconda de la grafia usà Buzacarini, Buzacharini, Buzacharina, la xe nata qua a Padova nel 1328 da Pataro e da Francesca da Gonzaga.
La ga ’vudo le sorele e i fradèi che se ciamava cussì:
- Anna Sofia, che xe stà badessa de la cesa de San Benedetto.
- Orsola, anca ela suora.
- Imperatrice, che ga sposà Alvise Forzatè.
- Arcoano, che xe stà un omo inportante.
Co so marìo, sposà nel 1345, la ga vudo i fiòi che soto indico:
- Francesco Novello, futuro Signore de Padova.
- Elisabetta, che ga sposà Federico Graf von Ottingen.
- Cecilia Gigliola, che ga sposà Venceslao di Sassonia.
- Caterina che ga sposà Stefano Frangipane Veglio.
Ma l’inportansa de Fina xe el fato d’aver vossudo la Cesa dei Servi co reativo convento, portà a conclusion da so sorèa Anna Sofia, dopo la so morte.
Più ancora inportante xe el volere, insieme co so marìo, restaurare e afrescare el Batistero rente al Domo de Padova, che secondo le so intension gavarìa dovudo deventare el mausoleo de la so fameja.
El ghe ga da l’incarico de fare i afreschi a l’interno al pitore Giusto de’ Menabuoi che gera el pitore de corte de i Carraresi.
Fina Buzzacarini, in sti afreschi, la xe rafigurà in zenocio, vestia in modo sontuoso, circondà da santi che la ofre la òpara terminà a la Vergine.
La xe morta a Padova el 4 otobre 1378 e la ze stà sepolta apunto nel Batistero da ela tanto desiderà.
No me risulta che ghe sia stà intitolà qua a Padova na strada, che invesse la ghe xe stà intitolà a so pare, Pataro.

[torna sopra]