Da San Stèfano de Zimela (VR)

Parlemo ancora de vin

El vin se sposa ben co ’l pan e salame e co on bel mazzo de carte.

Dopo ’ver leto sul nùmaro de Otobre i artìcoli sul vin del me amico Luigi Frosi e de la brava Gemma Bellotto, a me xe vignù anca a mi la voja de scrìvare calcossa su ’sto argomento chì.
Charles Baudelaire el ga scrito che “Chi beve solo acqua ha un segreto da nascondere…” Zerto el conosséa el proverbio latino in vino veritas, che a vol dire che uno che ga beù tanti goti e el fa ’na bela bala a xe fàzzile che el tira fóra tante verità, fati personali, giudizi e pensieri che mai el gavarìa dito da sano de zarvelo. Un me amico, quando che el sentéa zerti discorsi da uno mezzo inbriago el ghe domandava: “Sito ti o èlo el vin che parla?”
L’acqua si chiede, il vino si offre, e xe proprio vero parché se vien a catarte un amico a te ghe disi de sentarse zo e te ghe domandi sùito se el vole un bicere de vin.
Ma anca i contrati, i conbinamenti, el catarse tra amizzi… tuto el finisse co’ un bel cincin.. a la salute de ci che bèe… e el proverbio sentènzia: “Fato ben o male, dopo el contrato se bèe el bocale”. Ma sul tipo de vin bisogna anca stare ’tenti parché bianco e moro méneme a casa, che vol dire che bisogna bere senpre vin del stesso colore senò el te fa male.
Eco altre sentenze: I pi bruti fiori i xe chei del vin… Quando che uno l’è inbriago, tuti i ghe dà da bére… El vin l’è el late de i veci… A se nega de pi gente in te ’l vin che in te l’aqua… A ci che no ghe piase el vin che el Segnore el ghe toga l’aqua…
Un ricordo particolare el va a la graspìa, che la faséa “un grado de pi de l’aqua”! Però la jera aspra come l’asedo e beù fresca, sul canpo fin che se tajava el fromento soto el sole, la te cavava la sé e no la te faséa mia male.
A ghe xe un detto che el sentenzia che a ghe xe tre robe che el Segnore no ’l perdona: robare par i altri, tradire to mojere co’ una pi bruta e inbriagarse co’ la graspìa…
A me xe restà in te la mente come che faséa zerte done a “convìnzare” le galine a coare i ovi. Le inbonbegava de la molena de pan in te ’l vin crinto, le ghe lo ficava zo par el bèco e quando che le jera ben incoconà le le ciapava par le zate e le le faséa girare come ’n’elica de ropelano… e le galine le deventava brave cioche, che le se metéa sùito a coare in te ’l punaro! A l’ostarìa i òmeni, par vèdare se l’osto el gavéa batezzà el vin co’ l’aqua, i ghe ne faséa cascare calche giozza su la tovaja e cussita i vedéa sùito se ’torno a la macia rossa a se faséa un alone, che voléa dire che el vin el jera stà slongà!
Sentendo el gusto strano de zerti vini, a se se diséa, scorlando la testa… ahi, ahi, el vin el se fa anca co’ l’ua. Ci che beèa aqua parché de vin no ghe ne jera mia, el diséa ridendo che el gavéa beù del bon recioto de gronda, che el jera solo aqua piovana! A un inbriagon se ghe diséa che el gavea la gotite, ’na infiamazion del brazzo a forza de dopararlo par bere goti de vin. A l’oste che tegnéa el vin scarso in te ’l bicere se ghe diséa: “Ciò, Ménego, a go sentìo parlare de i Goti, de i Ostrogoti, de i Visigoti, de la Linea Gotica, ma de i mezzi goti mai!” O senò, segnando co ’l déo el livelo del vin, i ghe diséa: “Ciò, Nani, varda che el coleto no lo porta pi gnanca i preti, inpina ben el bicere!”
A finisso co’ un ricordo che go in mente da tanti ani. ’Na note de istà jera al fresco sul balcon quando che a go sentìo a vegner ’vanti a pié uno pien de goti che el naséa de qua e de là, puntilàndose co’ la bicecleta.
El jera un me amico, co’ su le spale ’na vita de fadighe, che el sabo el se la cavava de vin. A un zerto punto el se ga fermà, el se ga indrizzà su l’atenti, el se ga cavà la bareta e, sbandieràndola e vardando drito a la Luna che lo iluminava tuto, el ga urlà in talian: Io sono Dio! No go mia ridesto, ma invezze a me so’ ingropà, come anca ’desso che lo scrivo. Chel’omo co’ la vita piena de sacrifici e umiliazion el gavéa catà in te ’l vin la forza de èssare par un momento lu stesso, de zigare a tuti che el jera vivo, che anca lu el jera ’na persona da rispetare.

[torna sopra]